სოციალური დახმარება, როგორც თავად აცხადებდა, 12 თებერვალს გაუუქმეს. სოციალური აგენტის მოსვლის შემდეგ ელოდა, რომ დახმარებას გაუგრძელებდნენ და მისი შეჩერება გულშიც კი არ გაუვლია. მოხდა კი ისე, რომ უმძიმეს მდგომარეობაში მყოფ მარტოხელა, 84 წლის მოხუცს, რომელსაც სიარულიც კი უჭირს, სოციალური დახმარება შეუჩერეს.
“გურია ნიუსის” ვებგვერდზე 30 მარტს გამოქვეყნდა სტატია სათაურით: “დახმარება კიდევ ერთ მარტოხელა მოხუცს გაუუქმეს“.
აღმოჩნდა, რომ ბატონ ნიჟას სოციალური დახმარება ჯერ კიდევ 2011 წელს მოეხსნა.
ვინ და რატომ დატოვა 84 წლის მარტოხელა მოხუცი ყოველთვიური დახმარების გარეშე, “გურია ნიუსი” ამასთან დაკავშირებით, სოციალური სააგენტოს ხელმძღვანელს, ნოე ქინქლაძეს ესაუბრა:
“ბატონ ნიჟა კვაშალს სოციალური დახმარება 2011 წელს მოეხსნა. ბოლო თანხა მან 2011 წლის ივნისში მიიღო. იმის შემდეგ სოციალური დახმარება მას არ ჰქონია. იმავე წლის დეკემბერში მიმართა სააგენტოს. მაგრამ, დადგინდა მაღალი ქულა. შემდეგ, 2013 წლის იანვარში მიმართა და ისევ დადგინდა მაღალი ქულა.
მეთოდიკაზე თუ რა ხდება და რატომ ხდება ძალიან ბევრი ვისაუბრეთ. მე აგიხსნით რატომ ჰქონდა დახმარება და რატომ არ აქვს. მას ჰქონდა დახმარება იმიტომ, რომ ოჯახში ორი ასაკიანი წევრი იყო თვითონ და მისი მეუღლე. როდესაც ოჯახში ორი პენსიონერი იყო, შესაბამისად დაბალი ქულა ჰქონდა ოჯახს. როცა დარჩა ერთი ადამიანი, ჩვენი შეფასების მეთოდიკის შესაბამისად, ქულა შეიცვალა.
სხვათაშორის, ამ პიროვნებას დაზღვევა აქვს, რომელიც 1 ივლისამდე მოქმედებს. შემდეგ კი თავისთავად ექნება სახელმწიფო დაზღვევა. მას აქვს პენსია, ასევე იღებს სამსახურეობრივ დანამატს 22 ლარს, ჯამში გამოსდის 147 ლარი. გადავხედეთ მონაცემებს, ოჯახში ვენახი აქვს, ხეხილი აქვს. სამწუხაროდ, ფორმულამ ასეთი შედეგი მოგვცა. 2013 წლის იანვარშიც დადგინდა მაღალი ქულა. მიუხედავად იმისა რომ, მას სახლში აქვს ვენახი, ხეხილი, ბოსტანი, გვაქვს ინფორმაცია, რომ სარეცხი საპნის გარდა, არანაირი ჰიგიენური საშუალება არ აქვს. ჩვენი აგენტები კიდევ ერთხელ გადაამოწმებენ რამე გაუგებრობას ხომ არ აქვს ადგილი”. _ განაცხადა ნოე ქინქლაძემ.
“გურია ნიუსი” ამ ისტორიას კვლავ ყურადღებით მიადევნებს თვალყურს.
