“სახალხო კრების“ ახმეტის რაიონული კომიტეტის ხელმძღვანელი ირაკლი გრძელივანიშვილი 2011 წლის მაისში დააკავეს. გავრცელებული ინფორმაციით ის თბილისში მიმდინარე საპროტესტო აქციებში მონაწილეობდა. რამდენიმე თვის წინ გრძელივანიშვილმა ციხე პოლიტპატიმრის სტატუსით დატოვა და მალევე დაინიშნა კახეთში “ქართული ოცნების”კურატორად. როგორც პანკისის ხეობაში ჰყვებიან, ირაკლი გრძელივანიშვილი რამდენჯერმე შეხვდა მოსახლეობას, მათ შორის არჩევნების შემდეგ საჯარო სამსახურებიდან დათხოვნილ პირებს, რომლებსაც სამსახურებში აღდგენას დაჰპირდა.
პანკისის “ქართული ოცნების”აქტივისტები გრძელივანიშვილის შეხვედრებზე არავის მიუწვევია,როგორც ამბობენ, ეს უკანასკნელი მხოლოდ ვიწრო წრეში ატარებს შეხვედრებს.
“მიუხედავად იმისა რომ “ქართული ოცნების”კახეთის კურატორია, ჩვენ პარტიის აქტივისტებს არ შეგვხვედრია,როგორც გავიგეთ, ძირითადად ნაციონალური მოძრაობის აქტივისტებს და მხარდამჭერებს ხვდება .ისინი გრძელივანიშვილს ზურაბ ზვიადაურის უყურადღებობაზე , სამსხურიდან გაშვებაზე, უშუქობასა და უგზოობაზე ესაუბრნენ.ირაკლი მათ პრობლემების მოგვარებას დაჰპირდა და დააიმედა, რომ 2 თვეში ახმეტაში ყველაფერი შეიცვლება.ხალხი უკვე ლაპარაკობს, რომ ზვიადაური სპორტის სამინისტროში გადაჰყავთ”_ ამბობს “გურია ნიუსთან” “ქართული ოცნების”ერთ-ერთი აქტივისტი.
“ქართული ოცნების”ახმეტის ოფისის ხელმძღვანელი მამუკა ხოლეგაშვილი ადასტურებს, რომ გრძელივანიშვილთან ერთად ერთხელ მართლაც შეხვდა პანკისის ხეობის მოსახლეობას, მეორე შეხვედრა კი გრძელივანიშვილმა მის გარეშე ჩაატარა.
გრძელივანიშვილის გეგმების შესახებ არაფერი იცის ახმეტის მუნიციპალიტეტის საკრებულოს თავმჯდომარემ ზაქარია ქინქლაძემ. ის ფიქრობს, რომ ვარაუდი გრძელივანიშვილის შესაძლო გადეპუტატების შესახებ უსაფუძვლოა.
“არ მგონია, ეს ინფორმაცია გრძელივანიშვილის ერთ შეხვედრას და მის ერთ წინადადებას გამოეწვია.ეგ უფრო სურვილი შეიძლება იყოს გრძელვანიშვილის, რომლის დაკმაყოფილებაც საეჭვოა.”
ზაქარია ქინქლაძეს არ სჯერა, რომ გრძელივანიშვილმა თანაპარტიელებთან შეუთანხმებლად დაიწყო წინასაარჩევნო კამპანია.
“არ შეიძლება “ქართული ოცნების” კახეთის კურატორი ჩამოდიოდეს ადგილზე, მოსახლეობას ხვდებოდეს, რემონტებსა და სამუშაოებს ჰპირდებოდეს ისე, რომ ამით ადგილობრივ ხელისუფლებას უპირისპირდებოდეს.. თანაც არშემდგარ და არდანიშნული პოლიტიკური მოვლენებისთვის ემზადებოდეს.”
ირაკლი გრძელივანიშვილის მოსახლეობასთან შეხვედრის შესახებ არაფერი იცის დუისში მცხოვრებმა მათე ქავთარაშვილმა, რომელიც წინასაარჩევნოდ ხეობაში “ქართული ოცნების” შტაბს ხელმძღვანელობდა, ამჟამად ის ახმეტის გამგებლის მოადგილეა.
“თავიდან რაღაც მსგავსი ინფორმაცია მართლაც გავრცელდა, რომ თითქოს ზვიადაური სპორტის მინისტრის მოადგილედ გადაჰყავდათ,მაგრამ ეს ჭორის დონეზე იყო. ვკითხეთ ჩვენს დეპუტატს და გვითხრა რომ არსად წასვლას არ აპირებს. რაც შეეხება გრძელივანიშვილის შეხვედრებს მოსახლეობასთან, ეს ბუნებრივი პროცესია, ის კახეთის “ქართული ოცნების” ხელმძღვანელია და აქვს ამის უფლება. ასევე გაურკვეველია, რომელი გათავისუფლებული ნაციონალები ხვდებიან მას,ისინი არც არიან გათავისუფლებულები, დღესაც უმრავლესობაში არიან,მათ ვინ გაათავისუფლებს, დღესაც ხელშეუხებლები არიან.”
_ ხალხი ამბობს, რომ გრძელივანიშვილს დაზიანებული გზის შეკეთება სთხოვეს და რამდენიმე დღეში სარემონტო სამუშაოები დაიწყო.
_ რესპუბლიკური მნიშვნელობის გზა ადის ბირკიანიდან წიბახევამდე და სწორედ ამის შეკეთება ხდება.ეს არ არის დაკავშირებული გრძელივანიშვილის დაპირების შესრულებასთან.
_ ამბობენ, გრძელივანიშვილს ზურაბ ზვიადაურის ბიძაშვილის ბერდია ზვიადაურის გამოც შესჩივლეს, რომელიც თურმე მთელს ახმეტას განაგებს და ყველა საკადრო საკითხს წყვეტს.
_ ბერდია ზვიადაური აბსოლუტურად არაფერს განაგებს. ის იყო გამგებლის მოადგილე სოციალურ საკითხებში და განაგებდა იმ სფეროს, რაც ებარა. როგორც კი ზვიადაურის წინააღმდეგ რაღაც კამპანია დაიწყეს, ბერდიამ განცხადება დაწერა და გადადგა. მის ადგილზე მე დავინიშნე.
საკუთარი თანაგუნდელების მიერ ზურაბ ზვიადაურის უგულვებელყოფის პირველი ნიშნები მაშინ გამოჩნდა, როდესაც ახმეტაში, კერძოდ კი პანკისის ხეობაში ორი მინისტრი კახი კალაძე და ირაკლი ღარიბაშვილი მის გარეშე შეხვდა მოსახლეობას. ზურაბ ზვიადაური “გურია ნიუსთან” ადასტურებს რომ მინისტრების ვიზიტის შესახებ მისთვის ცნობილი არ იყო.
“ღარიბაშვილის ახმეტაში ჩასვლის შესახებ არანაირი ინფორმაცია არ მქონდა. არაფერი ვიცოდი კახი კალაძის ვიზიტის შესახებაც, კულტურის მინისტრმა გურამ ოდიშარიამ დამირეკა და მითხრა რომ ხეობაში აპირებდა ჩასვლას. თუმცა მაშინ მე ქუთაისში ვიყავი და ვერ მოვახერხე ჩასვლა. სპორტის მინისტრი ორჯერ იყო ხეობაში და ორივეჯერ ერთად ვიყავით”.
_ ამბობენ, რომ სპორტის მინისტრის მოადგილის თანამდებობას გთავაზობენ.
_ არსად არ ვაპირებ წასვლას, მათ შორის არც მინისტრის მოადგილედ, სანამ წინასაარჩევნო დაპირებას არ ავასრულებ. როდესაც დაპირებებს შევასრულებ, ვისაც უნდა, იმან იყაროს კენჭი.
_ ხალხი ლაპარაკობს, რომ პარლამენტში გრძელივანიშვილი შეგცვლით.
_ ეს უბრალოდ ჭორია და ალბათ ამ ჭორების გავრცელება თვითონ იმ პირს სჭირდება, ვიზეც დადის ეს ინფორმაცია. გრძელივანიშვილი კახეთის “ქართული ოცნების”კურატორია და ნება მისია, იაროს და შეხვდეს ხალხს, მაგას თავისი საქმე აქვს, მე ჩემი საკეთებელი. არიან ადამიანები, ვისაც უბრალოდ პიროვნულად არ მოვწონვარ, თორემ მე ვაკეთებ ყველაფერს, რაც მევალება და რაც დროულად საკეთებელია. თუ ვინმეს არ მოვწონვარ, აგერ არის ხალხი და იყარონ მაშინ კენჭი. მე ვფიქრობ, ხალხი არაფერ შუაშია, თვითონ ავრცელებენ ამ ჭორებს. არსებობს ოპოზიცია და პოზიცია, ხოდა შეიძლება გრძელივანიშვილი იმ ოპოზიციას ხვდება, ვისაც თავიდანვე არ უნდოდა რომ მე მოვსულიყავი დეპუტატად.
_ ახმეტაში ბევრი განაწყენებული ადამიანი გყავთ?
_ განაწყენებულები არიან ის ადამიანები, ვინც სამსახურები დატოვეს. იყო გაბერილი შტატები, იყო შეცდომები და მოხდა ამ ხალხის საფუძვლიანი გათავისუფლება სამსახურებიდან. თავისთავად, ეს ხალხი განაწყენებულია და ჩამიდგება ოპოზიციაში.
ზურაბ ზვიადაური ამბობს, რომ ყველა წინასაარჩევნო პირობას შეასრულებს, იქამდე კი არსად წასვლას არ გეგმავს.
