საქართველოს შინაგან საქმეთა სამინისტროს პასუხიდან ირკვევა, რომ იანვარ-მარტის თვეებში საქართველოში სულ რეგისტრირებულ იქნა 11,708 დანაშაული, რაც წინა წლის შესაბამის თვეებში რეგისტრირებულ 10,033 დანაშაულთან მიმართებაში წარმოადგენს დანაშაულის 16,6%-ით მატებას. მართალია 2013 წლის იანვარი-მარტის თვეებში, წინა წლის შესაბამის თვეებთან შედარებით, აგრეთვე იმატა გახსნილ საქმეთა პროცენტულმა მაჩვენებელმა, თუმცა მეტი რაოდენობის გაუხსნელი დანაშაული (7871) წინა წელიწადთან შედარებით (7143) მაინც 2013 წლის პირველ კვარტალზე მოდის.
2013 წლის 24 აპრილს, საქართველოს შინაგან საქმეთა სამინისტრომ ინსტიტუტს მიაწოდა ინფორმაცია, თუმცა არასრულყოფილი სახით. კერძოდ, ინფორმაციის მომთხოვნს არ მიეცა საშუალება გაცნობოდნენ დანაშაულთა სტატისტიკურ ინფორმაციას საქართველოს სისხლის სამართლის კოდექსის კონკრეტული მუხლების მიხედვით – რადგან შსს-ს მიერ მოწოდებული იქნა მხოლოდ ჯამური მაჩვენებლები. ამასთან, აღსანიშნავია, რომ შესადარებლად, შსს-მ ინსტიტუტს დამატებით მოაწოდა 2012 წლის შესაბამის თვეებში რეგისტრირებულ დანაშაულთა სტატისტიკაც – რაც განცხადებით მოთხოვნილი არ იყო.
“საინტერესოდ მიგვაჩნია შსს-ს მიერ მოწოდებული სტატისტიკური მაჩვენებლების კონკრეტული თვეების მიხედვით შედარებაც. აღსანიშნავია, რომ ყველაზე მეტი რეგისტრირებული დანაშაული, 2012 და 2013 წლის პირველ კვარტლებში მოდის მარტის თვეზე. 2012 წლის მარტის თვეში რეგისტრირებულ იქნა 3525, ხოლო 2013 წლის ამავე თვეში 4396 დანაშაული. მიღებული ინფორმაციიდან აგრეთვე იკვეთება, რომ 2012 წელთან შედარებით მომატებულია რეგისტრირებულ დანაშაულთა რიცხვის პროცენტული მაჩვენებელი. კერძოდ, დანაშაულის სტატისტიკა გაზრდილია: 2013 წლის იანვარში 20,2 %-ით, თებერვალში 15,7 %-ით, ხოლო მარტის თვეში 24,7 %-ით. მთლიანობაში, დანაშაულის რიცხვის ზრდამ 2013 წლის პირველ კვარტალში 2012 წლის იგივე პერიოდთან მიმართებაში შეადგინა 16,6%.
საქართველოს შინაგან საქმეთა სამინისტროს მიერ სრულყოფილი პასუხის მოწოდების შემთხვევაში მოგვეცემოდა საშუალება აგრეთვე წარმოგვედგინა კონკრეტული მუხლების მიხედვით ჩადენილ დანაშაულთა დინამიკაც, რაც ჩვენი აზრით მომეტებული საზოგადოებრივი ინტერესის საგანს წარმოადგენს. სამწუხაროდ, საზოგადოებისათვის გასაცნობად, აღნიშნული სტატისტიკური მონაცემები ვერც საქართველოს შინაგან საქმეთა სამინისტროს ვებ-გვერდის (www.police.ge) სტატისტიკისათვის განკუთვნილ განყოფილებაში მოვიძიეთ”. _ ნათქვამია IDFI-ის წერილში.
