(გურია ნიუსი) _ როგორც ცნობილია, გურული კლუბები პირველი ლიგის გათამაშებაზე წარმატებით გამოდიან _ “გურიაც” და “მერცხალიც” საუმაღლესლიგო პლეიოფში მოხვედრის მთავარი ფავორიტები არიან. თუ ლანჩხუთელებს ეს თითქმის განაღდებული ჰქონდათ და უახლოეს მდევრებს გვარიანად უსწრებდნენ, ოზურგეთელებს კონკურენტის სუნთქვა ყურთან ესმოდათ. ახლა ვითარება თითქმის გათანაბრდა _ “მერცხალმა” სწორედ მთავარ კონკურენტს მოუგო საკუთარ მოედანზე 1:0, ხოლო “გურიამ”, ბოლო 2 ტურში ერთხელაც ვერ მოიგო და ვითარება გაირთულა _ “ზოოვეტთან” წინა ტურში განცდილ მარცხს, საშინაო მოედანზე აუტსაიდერ ვანის “სულორთან” ფრე მიაყოლა. არადა, წინა წრეში, ვანში, ლანჩხუთურმა კლუბმა 6:0 მოიგო. ამჯერად კი, მატჩის დასრულებამდე 20 წუთით ადრე, იმერლებთან 1:2 აგებდნენ და ფრეც ძნელად მოიპოვეს. ამას გარდა, მატჩი იმითაც გამოირჩა, რომ ფეხბურთელებს შორის ხშირი იყო შეხლა-შემოხლა, ვითარება ტრიბუნებზეც დაიძაბა, რადგან ვანელმა ქომაგმა მსაჯს ქვა ესროლა და ამის გამო, ადგილობრივებმა შეუტიეს.
მეტად სკანდალური გამოდგა მატჩი ოზურგეთშიც. მიუხედავად იმისა, რომ ჩვენებურებმა მატჩი კაცნაკლულებმა ჩაამთავრეს, მათ ურთულეს ბრძოლაში გამარჯვების მოპოვება შეძლეს. მატჩის მნიშვნელობიდან გამომდინარე, მას ფიფას არბიტრი ლევან კვარაცხელია სჯიდა. სტუმრებს მის მიმართ საპრეტენზიო არაფერი ჰქონიათ, თუმცა, ოზურგეთული დახვედრით ძალიან აღშფოთებულან და წაგებას შექმნილ ატმოსფეროს აბრალებენ.
ქართულ ფორუმებზე ჭიათურელი ქომაგებისა და ხელმძღვანელობის განცხადებები ვრცელდება, სადაც ბრალდებების კორიანტელია, თუმცა, აშკარად დაუსაბუთებელი. მატჩის წაგებას არც მეტი არც ნაკლები, ხარიტონ ჩხატარაშვილის მიერ დარიგებულ პროკლამაციებს აბრალებენ, რომელშიც, თითქოს, ჩვენებურთა თავკაცმა ქომაგებს მოუწოდა “ეგინებინათ სტუმარი ფეხბურთელებისთვის”. ჩვენ უკომენტაროდ გთავაზობთ ფორუმზე “ქართული პორტის ქომაგის” სახელით დარეგისტრირებული პირის კომენტარს, რომელსაც, რატომღაც, იმერელთა გუნდის ხელმძღვანელობა ეთანხმება და მხოლოდ ერთს დავძენთ: სტადიონზე გინება ახალი ამბავი არაა და ამ მხრივ, ჭიათურაში გამართული შეხვედრაც გამოირჩა, ხოლო თუ ოზურგეთის შეხვედრაში ეს ორგანიზებულ სახეს მიიღებდა, რაც ფეხბურთელებს თამაშის საშუალებას არ მისცემდა, შეხვედრას ისეთი კვალიფიკაციის მსაჯი სჯიდა, ის აუცილებლად მოახდენდა სათანადო რეაგირებას!
აი, ქართული ფორუმიდან შემოკლებული კომენტარი, რომელშიც ყველაზე შემაშფოთებელი ისაა, რომ “მერცხალის” ფეხბურთელებს ემუქრებიან: _ თამაშის წინ, მოწინააღმდეგე გუნდის მწვრთნელის “ბატონ” ხარიტონის ინიციატივით დარიგდა პროკლამაციები, სადაც აღწერილი იყო თუ როგორ აგინეს ჭიათურაში ფეხბურთელებს, გუნდის სამწვრთნელო შტაბს და ა.შ. აღნიშნული ფაქტის პროპაგანდა მიდიოდა უკვე ჭიათურაში დასრულებული თამაშის შემდეგ (ყოველივე ზემოთ ჩამოთვლილი, ზედმეტად იყო გამუქებული და ამ ფაქტებით მანიპულირება ხალხის აბუნტებისკენ იყო მოწოდებული)… სტადიონზე დაახლოებით 500 გულშემატკივარი იყო მოსული (მატჩის ოფიციალურ ოქმში 1500 ქომაგია მინიშნებული. ავტ.), რომელთა 99%, დაწყებული ბებერი ბაბუებიდან, დამთავრებული ქალებით, 90 წუთის მანძილზე, დედის ყველაფერს აგინებდნენ მოწინააღმდეგე გუნდის ფეხბურთელებს. ამასთან დაკავშირებით, პროტესტი არ გამოუთქვამს არც ერთ ოზურგეთელ ფეხბურთელს, თამაშის დასრულების შემდეგ განახლდა ორმხრივი (აღიარებენ, რომ ჭიათურელებიც იგინებოდნენ? ავტ.) გინება, თუმცა “სეტკის” მიღმა ყველანი მაგარი ბიჭები იყვნენ. ერთ-ერთმა მათგანმა ისიც თქვა, რომ წინა თამაშზე გამგებელიც გვაგინებდაო. ამ ყველაფერს უხსნიდა ჭიათურელ პიროვნებას, რომელიც დაინტერესდა, თუ რატომ აგინებდნენ ასე გამეტებით მისი ქალაქის ფეხბურთელებს. აღმოჩნდა, რომ ეს ჭიათურელი პიროვნება თვითონ იყო ქალაქის გამგებელი, რომელსაც ეუბნებოდნენ, რომ გამგებელი თვითონ გვაგინებდაო. რაც შეეხება დანაპირებს, პირდებიან, რომ ოზურგეთი თუ როდისმე აღმოჩნდება ჭიათურაში სათამაშოდ, იქ გაეცემათ ყველას საკადრისი პასუხი. და თუ წელს ოზურგეთი გავიდა პლეი-ოფში, ურჩევნიათ საჩხერეში არ ჩავიდნენ. ჩათვალეთ, რომ მთელი ჭიათურა იმ დღეს ფეხბურთის საყურებლად არ მივა.
ქართული სპორტის ქომაგთა ერთგული წევრები, ალბათ, გულისყურით ადევნებენ თვალს საქართველოს ეროვნული საფეხბურთო ჩემპიონატის როგორც უმაღლესი, ასევე პირველი ლიგის თამაშებს. ამჯერად თქვენს ყურადღებას პირველი ლიგის ა ზონაში გამართული 19 ნოემბრის შეხვედრის შესახებ შევაჩერებ. შეხვედრა ოზურგეთში გაიმართა და მას უდიდესი სატურნირო მნიშვნელობა ჰქონდა. პირველ ადგილზე ბათუმის “დინამო” მყარად იყო დამკვიდრებული, ხოლო პლეიოფში გადასასვლელი მეორე ადგილისთვის ოზურგეთის “მერცხალი” და “ჭიათურა” იბრძოდნენ. მასპინძლებს ჭიათურელებზე 2 ქულით მეტი ჰქონდათ (თუმცა, ჭიათურას ერთი თამაშით ნაკლები და, შესაბამისად, პოტენციური მე-2 ადგილიც სწორედ ჭიათურელების იყო) და შეხვედრაში გამარჯვება ესაჭიროებოდათ. პირველი წრის შეხვედრა ჭიათურაში 2-1 ჰქონდათ მასპინძლებს მოგებული…
…მსაჯის სასტვენი და სტადიონზე მყოფი გულშემატკივრის მხრიდან მიზანმიმართული გინება ერთი იყო, 90 წუთის მანძილზე გინება ისმოდა 99% გულშემატკივრის მხრიდან, განურჩევლად სქესისა და ასაკისა. გამოირჩეოდა ახალგაზრდა თაობა, რომელსაც საკუთარი ბილწსიტყვაობის გამოცდილებით ზურგს უმაგრებდა ასაკოვანი ხალხიც. გინება მოდიოდა უშუალოდ ფეხბურთელებზე და შეურაცხყოფას აყენებდნენ ჩვენს ოჯახებს,” _ აცხადებენ მატჩში მონაწილე ფეხბურთელები. მათივე თქმით თამაშის მიმდინარეობის დროს არც ერთ მოწინააღმდეგე გუნდის ფეხბურთელს აზრადაც არ მოსვლია, რომ რომელიმე გულშემატკივარი გაეჩერებინა და აეხსნათ მათთვის, რომ ამგვარი საქციელი მსუბუქად რომ ვთქვათ არ იყო ლამაზი. გაგულისებული ქომაგი გულზე მჯიღს იცემდა და აცხადებდა, რომ ყოველივე ამის თავი ჭიათურელთა გამგებელი ყოფილა, რომელსაც თურმე ჭიათურაში უგინებია ოზურგეთელებისთვის. სტადიონზე არ იყო არანაირი წესრიგი, არც დაცვის პოლიციის სახით, ისინი საერთოდ არ ესწრებოდნენ შეხვედრის მიმდინარეობას (მხოლოდ მას შემდეგ მოხდა მათი გამოჩენა, რაც ჭიათურელთა ხელმძღვანელობისთვის აუტანელი გახდა სტადიონზე ყოფნა და თავად მოითხოვეს დაცვის მოყვანა სტადიონზე). შეხვედრის დასრულების შემდეგ ჭიათურელ ფეხბურთელებსა და “მასპინძელ” გულშემატკივარს შორის მოხდა სიტყვიერი შეურაცხყოფა, თუმცა მათ ერთმანეთისგან “სეტკები” ჰყოფდა და შესაბამისად ინციდენტიც 20 წუთზე (!) მეტს არ გაგრძელებულა. კლუბის გულშემატკივარი არ აპირებს ამ ფაქტის ასე უგულისყუროდ დატოვებას და საპასუხო ქმედების განხორციელებას აპირებს. თუკი ოზურგეთის გუნდი მოახერხებს პლეიოფში გადასვლას, შესაბამისად, დიდი ალბათობით მას მოუწევს საჩხერეში ჩასვლა. “ჭიათურას” გულშემატკივარი აპირებს საჩხერეში ჩასვლას და მათი მიზანი არ იქნება ფეხბურთის ყურება!
პირადად ჩვენ “ქართული სპორტის ქომაგები” ვერ დავტოვებდით ამ ფაქტს უყურადღებოდ. ვთხოვთ, პასუხისმგებელ ორგანოებს, ყურადღება მიაქციონ ამ ფაქტს, გამოიძიონ თამაშის დროს მომხდარი მოვლენები და გაზარდონ ინტერესი პირველი ლიგის მატჩებზე”.
მიუხედავად იმისა, რომ ბრალდებებს არ ახლავს კონკრეტული ფაქტები და დადასტურება, ჩვენ მაინც გვსურდა “მერცხალის” თავკაცის, ხარიტონ ჩხატარაშვილის კომენტარის მოსმენა, მაგრამ მას ტელეფონი გამორთული ჰქონდა. ვიმედოვნებთ, ამგვარი გაწიწმატება წაგებულის “კარგად ნაცნობი” პოზიციაა და არა დაგეგმილი პროვოკაცია ან ურთიერთწაკიდების მცდელობა.
თუმცა, გასათვალისწინებელია ერთი ფაქტიც: ბოლო დროს, რატომღაც, გაძლიერდა თავდასხმა “მერცხალსა” და მის თავკაცზე. როგორც ჩანს, ამის მიზეზი ისაა, რომ ხარიტონ ჩხატარაშვილის შეგირდებს ფავორიტებს შორის არავინ ასახელებდა, მაგრამ “მერცხალმა” სასიამოვნოდ გაგვაოცა.
ამასწინათ, ლანჩხუთში “გურიას” იუბილეზე სტუმრობისას, ფეხბურთის ფედერაციის თავკაცმა, ზვიად სიჭინავამ განაცხადა, რომ გაისად, ორივე გურული კლუბი უმაღლეს ლიგაში ხილვას ისურვებს. როგორც ჩანს, ეს განცხადებაც და გურული კლუბების წარმატებაც ზოგიერთს გულზე მოხვდა!
