ის საკმაოდ სერიოზული კომპანიის წარმომადგენელი და საპასუხისმგებლო თანამდებობაზე მყოფი პირია, თუმცა, “გურია ნიუსისა” და უამრავი ექიმის თანდასწრებით, თანამდებობისთვის შეუფერებელი უპასუხისმგებლობით მოეკიდა მინისტრისთვის მიცემულ სიტყვას. ყველაფერი ამ ინტერვიუს ჩაწერის დროს მოხდა. მის ვინაობასაც ამ წერილის ბოლოს შეიტყობთ.
_ ბატონო ზურაბ, კომპანია “ალდაგის” მიერ, რომელმაც ქობულეთის ცენტრალური საავადმყოფო შეისყიდა, ხელფასების მომატება თუ იგეგემება? როგორც გავარკვიე, ქობულეთში, ქალთა კონსულტაციის ექიმების ხელფასი 100-120 ლარია, საავადმყოფოს დაცვის თანამშრომლის კი 160 ლარი. როგორ ფიქრობთ, ეს ნორმალურია?
_ ეს არის საკითხი, რომელიც ძალიან გვაღელვებს. თქვენ კარგად იცით, რომ ხელფასების საკითხის ოდენობას სახელმწიფო არ წყვეტს. ანუ წყვეტს მმართველი კომპანია. სწორედ იმიტომ ჩამოვედი აქ, რომ გამეგო, რა ხდება. როგორც თქვენ ხართ ჩამოსული საკითხის შესასწავლად, ისე ვარ მეც. ბუნებრივია, ჩვენ კომპანიასთან გვექნება იმ საკითხზე საუბარი, თუ როგორია მათი სახელფასო ფონდი.
_ ქობულეთის სამშობიარო სახლი ხუთ თვეში უკვე მეორედ იყიდება. პირველი მეპატრონის, “იმედი ელ”-ის ხელში, ტესტირების შედეგად 90-მდე ადამიანი გაათავისუფლეს. “ალდაგი” ამბობს, რომ კიდევ მოხდება ტესტირება. ეს იმას ნიშნავს, რომ მორიგ შემცირებებს ექნება ადგილი?
_ კვალიფიკაციის ამაღლება ჩვენი მუდმივი ზრუნვის საგანია. წარმატებული ჯანდაცვის სისტემებში აბსოლუტურად ყველა მედპერსონალს _ ექიმებსაც და ექთნებსაც რეგულარულად უწევთ ტესტირების ჩაბარება. უნდა დაამტკიცონ, რომ მათი კვალიფიკაცია შეესაბამება თანამედროვე მოთხოვნებს. ეს ბუნებრივი და ნორმალური პროცესია.
თქვენ იცით, რომ “ალდაგი ბი სი აი” და “იმედი ელ” გაერთიანდა. შესაბამისად, “ალდაგი” არის ის კომპანია რომელსაც ჰყავს დაზღვეულები, ხოლო “ჩემი ოჯახის კლინიკა” არის მმართველი კომპანია. მათ აქვთ თავიანთი შიდა სტანდარტი. ბუნებრივია, აინტერესებთ, შიდა სტანდარტს როგორ შეესაბამება მედპერსონალის კვალიფიკაცია.
ჩვენ ტესტირება არ უნდა გავიგოთ, როგორც შემცირების აუცილებელი წინაპირობა. 70-საწოლიანი ახალი კლინიკა შენდება და “ალდაგი” და “ჩემი ოჯახის კლინიკა” გადაწყვეტს 70-კაციან კლინიკას რა რაოდენობის სამედიცინო პერსონალი სჭირდება. ამის ჩვეულებრივი სტანდარტი არსებობს. ისეთი კვალიფიციური პერსონალი, რომელიც აქ მუშაობს, არ დაიკარგება.
_ რაც შეეხება სტანდარტებს, ბატონო ზურაბ: ამავე შენობის გვერდით არის ტუბდისპანსერი. შენობაშივე კი, სანამ დედათა და ბავშვთა განყოფილებამდე მიხვალთ, უნდა გაიაროთ მთელი ინფექციური განყოფილება. ზოგიერთი ინფექციური დაავადება კი გადადის ჰაერწვეთოვანი გზით. ელემენტარულად, ფეხმძიმე ქალბატონს წითურა რომ შეეყაროს, ახალშობილი აუცილებლად რაიმე პათოლოგიით დაიბადება. ამ სტანდარტებს ვინ დაარეგულირებს და მსგავსი რისკების აცილება ვის ევალება?
_ ევროპასა და ამერიკაში, ყველა განვითარებულ ჯანდაცვაში ინფექციური დაავადებები, მათ შორის ტუბერკულოზიც, მრავალპროფილურ საავადმყოფოებშია ინტეგრირებული. ამიტომ არის, რომ ჩვენი სახელმწიფო სტანდარტით, ყველა ახლად აშენებულ საავადმყოფოში გათვალისწინებულია ინფექციური განყოფილება.
_ ოღონდ ცალკე, მოშორებით და არა საერთო შესასვლელში.
_ რა თქმა უნდა, ცალკე. ბუნებრივია, ჩვენ ახლა არ ვსაუბრობთ ახალ კლინიკაზე, ვსაუბრობთ ძველზე, რომელსაც, ბუნებრივია, აქვს პრობლემები ამ სტანდარტებთან შესაბამისობაში. მაგრამ კიდევ ერთხელ ვიმეორებ _ ახალ კლინიკაში ყველაფერი იქნება დაცული. თავისთავად, თუნდაც ჰაერწვეთოვანი გზით გადამდები დაავადებების მკურნალობის პრაქტიკა მრავალპროფილურ კლინიკაში არანაირი სტანდარტის დარღვევა არ არის. ეს იყო საბჭოთა მოდელი, როდესაც ცალკე იყო გატანილი. ჩვენ თუ მივდივართ ევროპული ჯანდაცვისკენ, იქ ყველაფერი ინტეგრირებულია კლინიკაში და არანაირი საშიშროება არ არის. ნანახი მაქვს ყველა ახალი კლინიკა. ღრმად ვარ დარწმუნებული, სტანდარტები დაცულია. სხვანაირად არ გავცემდით ნებართვას.
სწორედ ამ კითხვის დასმის შემდეგ მინისტრმა მამაკაცზე მიგვითითა და გვითხრა: “აგერ არის მაგ დარგის სპეციალისტი და უფრო დეტალურად მოგახსენებთ ყველაფერს მაგ საკითხთან დაკავშირებით”.
“რა თქმა უნდა, რა თქმა უნდა, ყველაფერს დეტალურად აგიხსნით, ერთი წუთით, გავაცილებ მინისტრს და მოგახსენებთ ყველაფერს,” _ გვითხრა ზურაბ ჭიაბერაშვილის თანდასწრებით ახალგაზრდა მამაკაცმა, რომელიც მინისტრს შეხვედრის განმავლობაში გვერდიდან არ მოსცილებია.
მინისტრის მანქანაში ჩაჯდომა და ამ ადამიანის ჩქარი ნაბიჯებით საავადმყოფოს შენობაში შევარდნა, ერთი იყო. უკან მივდიეთ, მაგრამ ვერ დავეწიეთ და ვეღარც თვალი მოვკარით.
ბოლოს, გადავწყვიტეთ, გარეთ დავლოდებოდით. რადგან საავადმყოფოს ერთი შესასვლელი აქვს, გვერდს ვერ აგვივლიდა. ასეც მოხდა. დაგვინახა თუ არა, სათვალე გაიკეთა და ახლა უკვე ისეთივე ჩქარი ნაბიჯებით, საავადმყოფოს გასასვლელისკენ გაიქცა.
_ უკაცრავად, ჩვენ თქვენ გელოდებით ამდენი ხანია.
_ მე, მელოდებით? რატომ?
_ ათი წუთის წინ არ მითხარით მინისტრის თანდასწრებით, მე გაგცემთ კომპეტენტურ პასუხსო?!
_ ააა, გისმენთ და რა გაინტერესებდათ?
_ ჯერ მითხარით, ვინ ბრძანდებით, რომ ვიცოდე ვისგან მაქვს ეს კომპეტენტური პასუხი.
_ ერთი ის გვაქვს რა, ზოგადად ინტერვიუს მიცემისგან თავს ვიკავებ. თქვენ რაც თქვით, ინფექციურ დაავადებებზე, დამოუკიდებელი შემოსასვლელი აქვს ინფექციურს იქედან.
_ რომელი შემოსასვლელი? რომელიც მუდმივად ჩაკეტილია? წამობრძანდით, ვნახოთ ერთად.
_ ახლა როცა ინფექციური მოდის, მაშინ შედის…
_ ყველა ამ ერთი შესასვლელიდან შემოდის და ამას თქვენც ხედავთ. თქვენ ვინ ბრძანდებით?! იქნებ, მითხრათ სახელი და გვარი, როგორ მოგიხსენიოთ სტატიაში? მინისტრის თანდასწრებით ხომ შემპირდით რომ გამცემდით ამ კითხვაზე პასუხს, ახლა რატომ გარბიხართ?
ადამიანი, რომელსაც ძალიან ელემენტარულ კითხვაზე არ აღმოაჩნდა პასუხი, რომელმაც მინისტრისთვის მიცემული პირობა “კომპეტენტურ კომენტარზე” არ შეასრულა და რომელიც თავქუდმოგლეჯილი გაურბოდა “გურია ნიუსის” კითხვებს, “ალდაგი ბი სი აი”-ს შვილობილი კომპანიის, ქობულეთის ცენტრალური საავადმყოფოს ახალი მეპატრონის, “ჩემი ოჯახის კლინიკის” საოპერაციო დეპარტამენტის დირექტორი, გიგა ნემსაძე აღმოჩნდა.
ამ ყველაფრის შემდეგ, მის “კომპეტენტურობაში” ეჭვის შეტანის უფლება ნამდვილად აღარ გვაქვს”
