ჩიტაიშვილის თქმით, რამდენიმე წლის წინ, არავინ არ იფიქრებდა, რომ სოფელ მაკვანეთში ასეთი დონის ქარხანა აშენდებოდა.
_ ბატონო ვალერი, თქვენი აქ მოსვლა ბიზნესმენების წახალისებას ხომ არ ნიშნავს?
_ ძალიან მნიშვნელოვანია, რომ ასეთი საწარმო იხსნება სოფელ მაკვანეთში. კარგია, რომ ადგილობრივი მეწარმეების მიერ არის აშენებული, ხდება ადგილობრივების დასაქმება ხელისუფლების მხარდაჭერით. ეს არის ინფრასტრუქტურის მოწესრიგება, ეს არის შუქი რომ ნორმალურად იყოს, ეს არის გზა რომ ნორმალური იყოს, ეს არის წყალი რომ იყოს, გაზიფიცირების სამუშაოები მიმდინარეობდეს. აი, ეს არის ხელისუფლების ვალდებულება, რაც შემდგომ ხელს უწყობს ინვესტორების მოზიდვას. რამდენიმე წლის უკან არავინ იფიქრებდა, რომ სოფელ მაკვანეთში აშენდებოდა ასეთი დონის ქარხანა.
_ ბატონო ვალერი, ბოლო რამდენიმე დღის განმავლობაში, პრეზიდენტი ორჯერ იყო ოზურგეთში, გუშინ განათლებისა და მეცნიერების მინისტრის მოადგილე სტუმრობდა სოფელ კონჭკათშს, სასჯელაღსრულების მინისტრმა ხათუნა კალმახელიძემ ოთხი სოფელი მოიარა. რას უკავშირდება ხელისუფლების წარმომადგენელთა გააქტიურება? ბიძინა ივანიშვილის აქციას ხომ არა?
_ რა შუაშია აქცია? კარგი არ არის მერე, რომ პრეზიდენტი ორჯერ ჩამოვიდა ამ კვირაში?
_ თუმცა, დამერწმუნები, რომ გურია არავის ახსოვდა და ამ დღეებში ხელისუფლების გააქტიურებას, ხალხი აქციას და ივანიშვილის გამოჩენას უკავშირებს.
_ მე მგონი, გურულებისთვის ძალიან კარგია, მინისტრებისა და პრეზიდენტის ჩამოსვლა. მოსახლეობაც ხედავს ამ ყველაფერს. მანამდეც ხდებოდა ეს. მინისტრებისა და პრეზიდენტის ჩამოსვლას არანაირი კავშირი არ აქვს აქციასთან, ხედავთ, რომ რამდენიმე მიმართულებით ტარდება სამუშაოები. არ გახსოვთ პრეზიდენტის რამდენიმე თვის წინანდელი ვიზიტი, როცა განაცხადა, რომ გურიაში დაიწყებოდა სერიოზული სამუშაოები? კეთდება კიდეც, გრაფიკის მიხედვით.
_რატომ არის გასაიდუმლოებული ადგილობრივი მედიისთვის მინისტრებისა და პრეზიდენტის ჩამოსვლის ვიზიტები?
_გასაიდუმლოებული არ არის. თქვენი გაფრთხილება მათი პრესსამსახურის პრეროგატივაა.
