ის ამჟამად მთავარ სამმართველოშია გადაყვანილი და ბრალი დიდი ოდენობით ნარკოტიკული საშუალებების უკანონო შენახვა დამზადებაში ედება, წინასწარი შეთანხმებით, ჯგუფის მიერ. აღმკვეთ ღონისძიებას მას ხვალ შეუფარდებენ. გამოცხადებული შიმშილობა, გიორგი გოგოხიას ჯანმრთელობისთვის, შესაძლოა, საშიში აღმოჩნდეს, რადგან მას გულსისძარღთვთა საკმაოდ მძიმე დაავადება აწუხებს.
„ქართული ოცნების“ ადამიანის უფლებათა დაცვის კომიტეტის წევრი, ადვოკატი ვარლამ ხათრიძე, ქალაქის მთავარ სამმართველოში ყოფნისას, თავად გახდა იმის მოწმე, როგორ გასცა განკარგულება იზოლატორის უფროსმა ვალერი კაკაურიძემ, რომ გიორგი გოგოხიასთვის საჭმელი არ შეეტანათ.
„გიორგი გოგოხია თავს დამნაშავედ არ ცნობს და მან შიმშილობა დაკავებისთანავე გამოაცხადა, უბრალოდ მაშინ არ განუცხადებია ამის შესახებ. დაკავებულს სერიოზული პრობლემები აქვს გულთან დაკავშირებით და ამის სამედიცინო ცნობებიც არსებობს, რომელსაც მისი მეუღლე წარმოადგენს.
იზოლატორში ის ცუდად გახდა და ექიმი მოითხოვა. მორიგე ექიმმა, რომელმაც მხოლოდ მაჯისცემა გაუსინჯა, ისე რომ წნევაც არ გაუზომავს მისთვის, ისე მიაღებინა მედიკამენტი „ანაპრილინი“. როდესაც დაკავებულმა წნევის გაზომვა მოითხოვა, ექიმმა განუცხადა, _ ფონეიდოსკოპი და აპარატი ზემოთ მაქვს და ხვალ გაგიზომავო. ეს მოხდა გუშინ, მაგრამ მისთვის წნევა არც დღეს გაუზომავთ.
უფრო მეტიც, ჩემი თანდასწრებით, ჩემი იქ ყოფნის დროს, იზოლატორის უფროსმა, ვალერი კაკაურიძემ თავის თანამშრომელს ასეთი მითითება მისცა: „გოგოხიას საჭმელს არ შეუტანთ!“, რაც აბსოლუტური უკანონობაა. კაკაურიძემ, უკანონო მითითება გასცა, რადგან მიუხედავად იმისა, დაკავებული აცხადებს თუ არა შიმშილობას, მათ არანაირი უფლება არ აქვთ, აკრძალონ მისთვის საჭმელის ან სასმელის მიწოდება.“, _ აცხადებს ვარლამ ხათრიძე „გურია ნიუსთან“ საუბრისას.
როგორც ჩვენთვის გახდა ცნობილი, გოგოხიასთან ერთად დაკავებულმა მეორე პიროვნებამ, დათო შამუგიამ დანაშაული უკვე აღიარა. ადვოკატი ეჭვობს, რომ ის პოლიციასთან თანამშრომლობდა და ეს ყველაფერი წინასწარ იყო მომზადებული.
14 აგვისტოს კი მოვლენები ასე განვითარდა:
ვარლამ ხათრიძე: „გიორგი გოგოხიას დაკავება, 14 აგვისტოს, დაახლოებით 13:30 საათზე მოხდა. როგორც თავად განმარტავს, გადასასვლელ ხიდთან ვინმე დათო შამუგიასთან ერთად იმყოფებოდა, რომელიც მისი თქმით, ასევე „ქართული ოცნების“ ჩუღურეთის რაიონის წარმომადგენელია. ამ უკანასკნელისთვის დაურეკავს ვინმე შმაგი გაჩეჩილაძეს და მიუწვევია სახლში. გოგოხიას, რატომღაც, თავიდანვე არ მოწონებია ეს მიპატიჟება და პირდაპირ უკითხავს, _ ყველაფერი რიგზეაო? მიუხედავად ამისა, ის მაინც გაჰყვა შამუგიას ნახალოვკაში, ნინუას ქუჩაზე.“
როგორც ვარლამ ხათრიძე განმარტავს, შმაგი გაჩეჩილაძესთან მისულებს, სახლში არავინ დახვედრიათ, ისინი შევიდნენ ოთახში, მაგიდაზე კოკა-კოლა იდგა, დალიეს და სწორედ ამ დროს შევარდნენ იქ სამართალდამცველები, რომლებმაც სპეცოპერაცია ჩაატარეს გოგოხიას დასაკავებლად. როგორც გოგოხიამ ადვოკატს უთხრა, მას გამზადებული შპრიცი ჯერ ჩაუდეს ჯიბეში და შემდეგ ამოუღეს.
„დაკავებიდან დაახლოებით 3 საათის შემდეგ, გიორგი გოგოხიას გულის ტკივილი დაეწყო და ექიმი მოითხოვა. როგორც ამბობს, მას საკმაოდ სერიოზული პრობლემები აქვს გულთან დაკავშირებით და გადაუდებელ მკურნალობას საჭიროებს. მიუხედავად ამისა, სასწრაფო დახმარება არ გამოიძახეს და საკუთარი ინიციატივით, ექიმის ყოველგვარი კონსულტაციის გარეშე დაალევინეს 2 აბი, რომელზედაც უთხრეს, რომ კორსიზი იყო. სწორედ ამის შემდეგ მოხდა მისი გადაყვანა ნარკოლოგიურ შემოწმებაზე“, _ განაცხადა ხათრიძემ „გურია ნიუსთან“ საუბრისას.
გიორგი გოგოხიას დამცველი ეჭვობს, რომ შესაძლოა, რაიმე ყოფილიყო გარეული ან კოკა-კოლაში, ან ე.წ „კორსიზის“ აბებში, რომელიც არავინ იცის, სინამდვილეში რა პრეპარატი იყო.
შეგახსენებთ, რომ აღმკვეთ ღონისძიებაზე სასამართლო ხვალ იმსჯელებს.
