“საიას” იურისტის, ქეთი თოიძის თქმით, ამ საიტზე იმ დარღვევების შესახებ წერია, რომელიც წინასაარჩევნო პერიოდში, “საერთაშორისო გამჭირვალობა _ საქართველომ”, “საქართველოს ახალგაზრდა იურისტთა ასოციაციამ” და “სამართლიანმა არჩევნებმა” დააფიქსირეს.
_ ასევე, ვებ-გვერდზე შეუძლია ნებისმიერ ადამიანს ატვირთოს იმ დარღვევის შესახებ, რომელიც დაფიქსირდება, _ თქვა ქეთი თოიძემ.
“სამართლიანი არჩევნების” წარმომადგენელმა, მადონა ბერიძემ განაცხადა, რომ ამ პერიოდისთვის, გურიაში უფრო მეტი დარღვევა დაფიქსირდა, ვიდრე მეზობელი აჭარის რეგიონში.
მისივე თქმით, გურიაში 30 დარღვევა დაფიქსირდა, მათ შორის არის პოლიტიკური ნიშნით ადამიანების გათავისუფლება სამსახურიდან, ზეწოლები და ადმინისტრაციული რესურსის გამოყენების ფაქტები.
დაფიქსირებულ დარღვევებში შევიდა „გურია ნიუსის“ მიერ დაფიქსირებული ფაქტებიც.
მაგალითად, 5 აგვისტოს, ოზურგეთის რაიონის სოფელ დვაბზუში, სოფლის რწმუნებული ვაჟა მახარაძე თავად არიგებდა “ერთიანი ნაციონალური მოძრაობის” სააგიტაციო მასალას. მასალების დარიგების პროცესს, ოზურგეთის საკრებულოს ნაციონალური ფრაქციის ხელმძღვანელი თემურ მოქიაც ესწრებოდა.
2012 წლის აპრილში, ოზურგეთის მუნიციპალიტეტის სოფელ მელექედურის საჯარო სკოლის სამურვეო საბჭოს გადაწყვეტილებით, დაკავებული თანამდებობიდან გათავისუფლეს დირექტორი ნათელა თოხაძე. ქალბატონი ნათელას განცხადებით, მისი გათავისუფლება პოლიტიკური ნიშნით განხორციელდა. გათავისუფლებული სკოლის დირექტორი მის გათავისუფლებაში სოფლის რწმუნებულს ამხელს და განმარტავს, რომ ვინაიდან იგი არ ასრულებდა მის დირექტივებს, სოფლის რწმუნებულმა შესაბამის ორგანოებს მიაწოდა ინფორმაცია, რომ საჯარო სკოლის დირექტორი იყო ოპოზიციურად განწყობილი, რაც გახდა მისი გათავისუფლების საფუძველი.
2012 წლის 8 აგვისტოს, ლანჩხუთში, 2008 წლის აგვისტოს მოვლენებისადმი მიძღვნილი აქციის ფარგლებში, ცოცხალი ჯაჭვი მოეწყო. აქციაში მონაწილეობის სურვილი გამოთქვა „ქართული ოცნების“ მაისურში გამოწყობილმა ეკა კვაჭაძემ, რომელსაც წინააღმდეგობა აქციის ორგანიზატორმა, ლანჩხუთის მუნიციპალიტეტის კულტურის, ძეგლთა დაცვის და სპორტის განყოფილების ხელმძღვანელმა, ირმა მგელაძემ გაუწია. მან ეკა კვაჭაძეს უთხრა – „შენ ჩვენიანი არ ხარ, აქ დგომის უფლებაც არ გაქვს, „ქართულ ოცნებაში წადიო“.
ეკა კვაჭაძის დედა სკოლაში მუშაობს, ამიტომაც ძალიან წუხს, რომ შესაძლოა, პრობლემები შეექმნას. „სამართლიანი არჩევნების“ გრძელვადიანი დამკვირვებელი აღნიშნული ფაქტის გადამოწმების მიზნით, დაუკავშირდა ირმა მგელაძესაც, რომელმაც კომენტარის გაკეთება არ ისურვა.
2012 წლის 13 აგვისტოდან, ლანჩხუთის მუნიციპალიტეტის სოფელ სუფსაში, საპრეზიდენტო პროგრამის „ღიმილიანი საქართველო“-ს ამოქმედება დაიწყო.
პროგრამის შესაბამისი წარწერიანი ორი ავტობუსი სუფსის ცენტრშია განთავსებული და მხოლოდ სუფსის თემის მოსახლეობას უწევს სტომატოლოგიურ მომსახურებას. „სამართლიანი არჩევნების“ გრძელვადიანი დამკვირვებელი თავად გაესაუბრა პაციენტებს და შეიტყო, რომ სტომატოლოგიური მომსახურება, კერძოდ, ორთოპედიული და ქირურგიული, მხოლოდ განსაზღვრული ასაკის ადამიანებს (50 წლიდან ზემოთ) უფასოდ უტარდებათ. აღნიშნული პროგრამა ორკვირიანია.
2012 წლის 19 აგვისტოს „ერთიანი ნაციონალური მოძრაობის“ მიერ ორგანიზებულ შეხვედრაზე ჩოხატაურის სკოლის რამდენიმე პედაგოგი დასწრებას არ აპირებდა. ამ ინფორმაციის გაჟღერებისთანავე, სკოლის დირექტორი მათ ხელფასის დაქვითვით დაემუქრა, რის გამოც პედაგოგები შეხვედრას დაესწრნენ.
2012 წლის 19 აგვისტოს, მიხეილ სააკაშვილი ბახმაროში მოსახლეობას ხვდებოდა, რა დროსაც, „გურია ნიუსის“ ინფორმაციით, ცალკეულ ჟურნალისტს შეხვედრაზე დასწრების საშუალებას არ აძლევდნენ. „გურია ნიუსის“ ცნობით, პრეზიდენტის პრესსამსახურის ხელმძღვანელმა, ნათია ბანძელაძემ ჟურნალისტებს განუცხადა, რომ მათ შეხვედრაზე დასწრება მხოლოდ აკრედიტაციის გავლის შემდეგ შეუძლიათ.
„გურია ნიუსის“ ინფორმაციით, ბახმაროში, პრეზიდენტის ვიზიტისას, პრეს-ზონა მომზადებული არ იყო რისი შექმნის ვალდებულებაც პრეზიდენტის ადმინისტრაციამ უწყებათაშორისი კომისიისა და ჟურნალისტების შეხვედრის დროს აიღო.
2012 წლის 17 ივნისს, ჩოხატაურის მუნიციპალიტეტის დაბლაციხის რწმუნებულმა ბეჟან ხაბეიშვილმა, დაბლაციხის საჯარო სკოლის პედაგოგ მარიკა ონიანს „ურჩია“, რომ არ წასულიყო კოალიცია “ქართული ოცნების” მიერ ორგანიზებულ აქციაზე ოზურგეთში, რადგან შესაძლებელია მას პრობლემები შექმნოდა.
30 დარღვევაში ასევე შესულია ჟურნალისტებზე ფიზიკური და სიტყვიერი შეურაცხყოფების ფაქტები.
