2011 წელს, სოფლის მხარდამჭერი პროგრამის ფარგლებში, ოზურგეთის მუნიციპალიტეტის სოფელ ნატანებისთვის 77 190 ლარი იყო გამოყოფილი.
ოფიციალური დოკუმენტების თანახმად, ოზურგეთის მუნიციპალიტეტის სოფელ ნატანებში კრება 2011 წლის 29 მარტს ჩატარდა. დღის წესრიგით, სხდომის თემა ნატანების თემში, სადაც სამი უბანი შედის _ ზემო ნატანები, ქვემო ნატანები და შეკვეთილი, 2011 წლის “სოფლის მხარდამჭერი პროგრამით” გასახორციელებელი სამუშაოების პრიორიტეტების განსაზღვრა იყო. დანიშნულებისთვის გამოყოფილმა თანხამ 77 190 ლარი შეადგინა. მოსახლეობამ პრიორიტეტად დაასახელა ნატანების ცენტრში სარიტუალო სახლის მოწყობა.
ოფიციალურ დოკუმენტებში ვკითხულობთ: “ზემო ნატანების, ქვემო ნატანების და შეკვეთილის მოსახლეობა თანახმაა, მიიღონ წილობრივი მონაწილეობა აღნიშნული პროექტების გახორციელებაში. მოსახლეობამ მიიღო გადაწყვეტილება, ნატანების თემში 2011 წლის “სოფლის მხარდამჭერი პროგრამით” გახორციელდეს შემდეგი პროექტი _ სარიტუალო დარბაზის მოწყობა”.
ოფიციალურ დოკუმენტს ნატანების რწმუნებული კახაბერ კოპლატაძე და სპეციალისტები აწერენ ხელს.
საერთო კრებაზე მონაწილე პირთა რაოდენობამ 37 შეადგინა, რომლებიც ხელს აღნიშნულ დოკუმენტს აწერენ.
სარიტუალო დარბაზი, რომლის მოწყობისთვის 77 190 ლარი გამოიყო და უნდა გაკეთებულიყო, აბსოლუტურად უფუნქციოდ არის. სოფლის ცენტრში მდებარე დარბაზი ისევ გაურემონტებელი და ავარიულ მდგომარეობაშია.
“გურია ნიუსმა” ოზურგეთის მუნიციპალიტეტის სოფელ ნატანების მოსახლეობის უმრავლესობა გამოკითხა, რომლებიც “გურია ნიუსთან” საუბარში განცვიფრებას ვერ მალავენ იმის გამო, რომ მათ არ იციან იმის შესახებ, თუ რამდენი ლარი იყო გამოყოფილი 2011 წელს სოფლის მხარდამჭერი პროგრამით, რა პრიორიტეტი იყო დასახელებული და რა სამუშაო უნდა გახორციელებულიყო. ერთ-ერთმა მათგანმა კი, როცა ოფიციალურ დოკუმენტში თავისი სახელი და გვარი ნახა, აღნიშნა, რომ ამ დოკუმენტზე მისი ხელწერა ნამდვილად არ ყოფილა.
რაში დაიხარჯა 77 190 ლარი, როცა საერთოდ არ გაკეთებულა სარიტუალო დარბაზი? მეტიც, არც კი დაწყებულა. ჩვენ შევეცადეთ, ოფიციალური კომენტარი მოგვეპოვებინა ამ საკითხთან დაკავშირებით და ნატანების რწმუნებულს, კახაბერ კოპლატაძეს მივმართეთ. მან თავი აარიდა ჩვენთან საუბარს და გვითხრა: “მიმართეთ პრესსამსახურს, მე არანაირად არ გაგცემთ პასუხს”, _ გვითხრა კოპლატაძემ სოფლის ცენტრში შეკრებილი მოსახლეობის თანდასწრებით. კომენტარზე უარი ერთ-ერთმა სპეციალისტმაც გვითხრა: _ საქმე მაქვს, გადავალ მეორე შენობაში და მოვალო, _ თუმცა რამდენიმესაათიანი ლოდინის მიუხედავად, ის აღარ გამოჩენილა.
როგორც ოზურგეთის მუნიციპალიტეტის სოფელ ნატანების მოსახლეობა ამბობს, სარიტუალო დარბაზის მოწყობისთვის ხელის შეშლის ერთ-ერთი ფაქტორი, მაშინდელი ოზურგეთის მუნიციპალიტეტის ყოფილი გამგებლის და ამავე სოფლის მაჟორიტარი დეპუტატის, გია ტაკიძის დაკავება იყო: _ გია ტაკიძის დაკავებამ მთელი სოფელი შოკში ჩაგვაგდო. არ არის გია ცუდი ადამიანი, იგი მთელ სოფელს უყვარს და ნამდვილად დიდ პატივს სცემენ. მაშინ აირია ყველაფერი სოფელში და აღარ გახორციელდა შესასრულებელი სამუშაო. ვეღარ მოაბეს თავი, მაგრამ რამდენიმე უბანში გააკეთეს და მოაწესრიგეს წყლის პრობლემა.
როგორც მოსახლეობა ამბობს, სოფელ ნატანებში წყლის პრობლემა ასე თუ ისე მოგვარებულია.
_ დაიწყეს გაზის შემოყვანა, თხინვალიდან გამოჰყავთ, მაგრამ, ჯერჯერობით, მიტოვებულია. გადაჩიჩქნეს გზა, გადათხრილია ყველაფერი, _ აცხადებენ ზემო ნატანების მცხოვრებლები და დასძენენ, რომ “სოფლის მხარდამჭერი პროგრამით” სოფლისთვის არაფერი კეთდება.
_ გასაკეთებელი ძალიან ბევრია, გზას გვპირდებიან და ალბათ, მალე გაკეთდება და მალე შემოვა გაზიც, წყალი მოსულია, სოფლის დახმარების პროგრამით რა გაკეთდა, არ ვიცი!
_ არ გაინტერესებთ?
_ როგორ არ გვაინტერესებს, მაგრამ გვეტყვიან, ალბათ. იქნება შეხვედრები, _ გვითხრა კორნელი ცენტერაძემ.
სოფლის ცენტრში შეკრებილი მოსახლეობა გაურკვევლობაშია: “სარიტუალო დარბაზი?! უნდა ყოფილიყო, მაგრამ არაა, ისტორიას ჩაბარდა. ათას მიზეზს ამბობდნენ, ზვავი ჩამოწვაო, ბიუჯეტში თანხა არ არისო. ვერაფერს გეტყვით მეტს. მოგეხსენებათ, გია ტაკიძის ამბავი და ამანაც ხელი შეუშალა. მთელი სოფელი ვიყავით თანახმა, რომ სარიტუალო დარბაზი გაკეთებულიყო, რომელიც არ გაკეთებულა. წყლის პრობლემა გადაჭრეს სხვადასხვა უბნებში, ჭაბურღილები გააკეთეს. თუმცა, არ ვიცით, რამდენი დაიხარჯა და როგორ. მოსახლეობა კმაყოფილია, წყალიც მთავარია სოფელში. ახლა გზას გვიგებენ, ნატანები-შრომა-ურეკის დამაკავშირებელი გზაა და ეს ძალიან კარგია ჩვენი სოფლისთვის. გლეხს უნდა გზა, შუქი, წყალი და დასაქმება. გვპირდებიან და ალბათ, გააკეთებენ, ჩვენ ამის იმედი გვაქვს”, _ ამბობენ ნატანების მცხოვრებლები.
