როგორც 2012 წლის 15 თებერვლის ბრძანებიდან ჩანს, ყველაზე მაღალი ანაზღაურება სასჯელაღსრულების დეპარტამენტის თავმჯდომარეს ჰქონდა _ თვეში 2520 ლარი, 2012 წლის 12 ოქტომბრის ბრძანებით კი მისი ხელფასი 3350 ლარი გახდა. საბადრაგო სამსახურის უფროსის ხელფასი 2012 წლის თებერვლის ბრძანებით 1800 ლარი იყო, გიორგი ტუღუშმა ხელფასი მასაც გაუზარდა 2115 ლარამდე. თუკი თავისუფლების აღკვეთის დაწესებულების (ციხის) დირექტორის ანაზღაურება თებერვლის ბრძანებით შეადგენდა 2280 ლარს, ოქტომბრიდან მისი ხელფასი 2705 ლარამდე გაიზარდა. ციხის დირექტორის ორი მოადგილის ნაცვლად, რომელთა ჯამური თვიური ანაზღაურებაც შეადგენდა 3080 ლარს, ამჟამად დარჩენილია მხოლოდ ერთი, რომლის ხელფასიც 2540 ლარით განისაზღვრა. საინტერესოა აგრეთვე მებრძოლის თანამდებობა (სპეციალური დანიშნულების მთავარი სამმართველო), რომელიც ოქტომბრამდე 940 ლარად იყო შეფასებული, ხოლო ოქტომბრიდან 1250 ლარი გახდა.
მინისტრის შეცვლის შემდეგ სამინისტროში შტატების რეორგანიზაცია გახორციელდა. ზოგიერთ პირს ანაზღაურება შეუმცირდა. ზოგიერთი საშტატო ერთეული კი საერთოდ გაქრა _ მაგალითად, სასჯელაღსრულების დეპარტამენტის თავმჯდომარის ორი მოადგილის ნაცვლად (რომელთა ჯამური თვიური ხელფასი შეადგენდა 4800 ლარს), დარჩა მხოლოდ ერთი, რომლის ხელფასიც 2700 ლარს შეადგენს. ასევე, გაუქმდა რანგირების სისტემა, რომელიც ანაზღაურებას სამ კატეგორიად ყოფდა.
