წინასაარჩევნო პერიოდში გათავისუფლებული 120-მდე პროფესიონალი თანამშრომელი, მუქარის ქვეშ დაწერილი უთარიღო განცხადებები, ყოველდღიურად გათავისუფლების მოლოდინში მყოფი, პოლიციურ რეჟიმში მომუშავე კოლექტივი და ჩაბნელების საფრთხის წინაშე მდგარი დედაქალაქი… _ ასეთია არსოშვილის ოთხთვიანი “მოღვაწეობის” შედეგი “თელასში”.
„თელასის“ ყოფილი თანამშრომლები “გურია ნიუსთან” საუბარში ამბობენ, რომ გათავისუფლებული პროფესიონალების ნაცვლად, ინიშნებოდნენ პოლიციის თანამშრომლები, ზურაბ არსოშვილის ახლობლები და მეგობრები.
“გურია ნიუსის” ინფორმაციით, კომერციულ დირექტორს, ამ ეტაპზეც რამდენიმე ათეული უთარიღო განცხადება უდევს დარჩენილი თანამშრომლების დასაშანტაჟებლად.
ზურაბ არსოშვილი, რომელიც სხვადასხვა დროს იყო პარლამენტის წევრი, ეროვნული გვარდიის დეპარტამენტის უფროსი, ფინანსური პოლიციის ხელმძღვანელი, შიდა ქართლის გუბერნატორი და ენერგეტიკისა და ბუნებრივი რესურსების მინისტრის მოადგილე , „თელასში“ სასწრაფო წესით მას შემდეგ გაამწესეს, რაც გავრცელდა ინფორმაცია, რომ კომპანიის ყიდვას ბიძინა ივანიშვილი აპირებდა.
როგორც „თელასის“ თანამშრომლები ამბობენ, „ნაცმოძრაობის“ აქტივისტის, ზურაბ არსოშვილის კომერციულ დირექტორად დანიშვნის მთავარი მიზანი „თელასში“ შემოსული თანხების არჩევნებისკენ მობილიზაცია და მმართველი პარტიის ბიუჯეტის შევსება იყო. საჭიროების შემთხვევაში, თუკი პარტიას დაჭირდებოდა, მისი მხრიდან არც რაიმე საბოტაჟს გამორიცხავდნენ.
არსოშვილის „მარჯვენა ხელი“ და დამხმარე ძალა „თელასში“ ავთანდილ მეტივიშვილი იყო. კომპანიის მმართველი, აშოტ მანუკიანი, რომელიც თანამშრომლებს შეპირდა, რომ არავითარი პრობლემები არ შეექმნებოდა და მშვიდად იმუშავებდნენ, ამ პროცესებში არ ერეოდა. ის ხანგრძლივ შვებულებაში გავიდა და მას შემდეგ, თანამშრომლებს თვალით არ უნახავთ.
ნინო ტივაძე, რომელიც „თელასში“ 15 წელი მუშაობდა და კრიზისული მართვის მენეჯერის ფუნქცია ჰქონდა, კომპანიიდან ისე გაუშვეს, რომ მიზეზიც არ უთქვამთ. როგორც ყველას, მასაც განცხადების დაწერა თარიღის დასმის გარეშე მოთხოვეს:
_ თავიდან, დამიბარეს და მითხრეს, ძალიან წარჩინებული თანამშრომელი ხარ, გენდობით, იმედია ამ ნდობას დააფასებო და გლდანის რაიონიდან გადამიყვანეს სამგორის რაიონში. ხელფასი ისე დამაკლეს, საქმის კურსში არც კი ჩავუყენებივარ არავის. 20 დღის თავზე, ტელეფონზე მირეკავს ავთო მეტივიშვილი და მეუბნება, _ ნინიკო, ნინიკო, დაწერე განცხადება, ისე რომ თარიღი არ დაუსვა, უბრალოდ დაწერე განცხადება და დასაქმებაზე მერე ვიფიქროთო. სიმართლე გითხრათ, შოკში ჩავვარდი. როცა მიზეზი ვიკითხე, _ ამ პოზიციაზე ახლა სხვა ხედვები გვაქვსო. განცხადება დავწერე, მაგრამ არა უთარიღო, როგორც ისინი მთხოვდნენ, არამედ თარიღდასმული და ისე წამოვედი. განცხადება, რა თქმა უნდა, დააკმაყოფილეს.
ამის შემდეგ, დაიბარეს ჩემი და, რომელიც ასევე „თელასში“ მუშაობს მენეჯერად და უთხრეს, _ ნინო მეოცნებე არის და თუ არ გინდა პრობლემები შეგექმნას, უთხარი გაჩუმდესო. მაშინ გაირკვა, რომ ჩემი გათავისუფლების მიზეზი ჩემი მეუღლის „ქართულ ოცნებაში“ საქმიანობა იყო.
ორი კვირა იყო დარჩენილი არჩევნებამდე, მაშინ გავრისკე დავით უსუფაშვილის წაქეზებით და პატარა სიუჟეტი გავიდა მე-9 არხზე ჩემი კომენტარებით.
სიუჟეტის გასვლისთანავე დაურეკეს ჩემს დას და უთხრეს, სასწრაფოდ დაეწერა განცხადება. ამაზე მან უარი განაცხადა _ წასვლა რომ მდომებოდა, ჩემი და როცა წავიდა, მეც მაშინ წავიდოდი, მაგრამ ჩემს ოთხ შვილს მშიერს ვერ დავტოვებო. წადი, დაუდე შენს დას ალტერნატივა, _ ან დაწერ განცხადებას და დავაკმაყოფილებთ, ან შენი და გაჩუმდებაო,“ _ აცხადებს „გურია ნიუსთან“ საუბარში ნინო ტივაძე.
ნინო ტივაძის დას უთარიღო განცხადება მაინც დააწერინეს. თამარ ტივაძეს ბოლოს გუშინ დაურეკეს და უკანასკნელად გააფრთხილეს. არ არის გამორიცხული, დღეს მისი უთარიღო განცხადება დააკმაყოფილონ…
_ თქვენ ქურდები ხართ, მაიმუნები ხართ, იპარავთ, აშენდით, შეიძლება ახლა ვერ დაგიმტკიცოთ, მაგრამ ვიცით ყველაფერი და მალე დაგიმტკიცებთ, _ ასე დაიწყო ზურაბ არსოშვილმა თავისი შეხვედრა ოქროს უბნის აბონენტთა მომსახურების ცენტრში. მაგიდაზე ფეხებშემოწყობილ და აგდებული ტონით მოლაპარაკე კომერციულ დირექტორს, ცენტრის ხელმძღვანელმა ლევან გაგნიძემ ციფრებთან დაკავშირებით ვერაფერი გააგებინა:
_ ზურაბ არსოშვილი თავის მოადგილესთან, ავთანდილ მეტივიშვილთან ერთად შემოვიდა, მოგვესალმა, შემდეგ მაგიდაზე ფეხები შემოაწყო და ციფრების ამბავი იკითხა. რაც ავუხსენი, ვერაფერი გაიგო და მითხრა, _ ზღაპრებს ნუ მიყვებითო და დაიწყო საუბარი პოლიტიკურ სიტუაციაზე.
თავიდანვე ყველამ იცოდა, რომ „თელასში“ შემოსული ყველა თანხა და რესურსი არჩევნებისკენ იქნებოდა მობილიზებული.
არსოშვილმა იმ დღესვე მომთხოვა უთარიღო განცხადება დამეწერა _ შენ ახლა პატარა ბიჭი არ ხარ, საბჭოთა კავშირის დროსაც გექნება ნამუშევარი და უნდა იცოდე, ერთი ჯგუფი რომ მოდის, წინა ჯგუფი მიდისო.
როცა მიზეზეზი ვიკითხე, რატომ უნდა დამეწერა განცხადება, რა დავაშავე, ასეთი პასუხი გამცა: _ არ დაწერ განცხადებას და შეიძლება რაღაც შეგემთხვეს, ან უჯრაში იპოვო რამე, ხომ იცი, გამკეთებელი ვარო.
საღამოს დავწერე განცხადება, თარიღის გარეშე და იმავე დღეს მივიტანე სამდივნოში. ერთ კვირაში დამირეკეს და მითხრეს, თქვენი განცხადება დაკმაყოფილებულიაო…“ _ აცხადებს „გურია ნიუსთან“ ოქროს უბნის აბონენტთა მომსახურების ცენტრის ყოფილი ხელმძღვანელი, ლევან გაგნიძე.
გაგნიძის თქმით, მის ადგილზე, ისევე როგორც სხვაგან, პოლიციის თანამშრომელი დაინიშნა. პროფესიონალების ნაცვლად დანიშნული პოლიციელები კი „თელასში“, გარკვეული პერიოდის განმავლობაში, პოლიციის მანქანებით და შეიარაღებულები დადიოდნენ.
ზურაბ არსოშვილის „თელასში“ მისვლის შემდეგ, ყველანაირი შესყიდვები შეჩერდა, რაც ტექნიკური თვალსაზრისით, კომპანიას სერიოზული რისკის ქვეშ აყენებდა,
თენგიზ გოცირიძე: (ავჭალის აბონენტთა მომსხურების ცენტრის ყოფილი ხელმძღვანელი)
_ საერთოდ, თელასის ტექნიკური ქსელი ცოტა რთული თემაა. ეს არის პროცესი, რომელსაც სისტემატური ცვლა სჭირდება. თუ ამ პროცესს გააჩერებ, სერიოზულ დისკომფორტს გამოიწვევს. დისკომფორტი და უშუქობა რაც არის, ყველამ გავიარეთ. ასეთი დისკომფორტი იწვევს იმას, რომ ადამიანი გამოდის ყველანაირად უკმაყოფილო და აგრესიული ფორმით. არეულობის პრინციპი მეტი კი არაფერია. საბოლოო ჯამში, ეს ყველაფერი მიდის არეულობისკენ. ამიტომაც, საერთოდ არ გამოვრიცხავ იმას, რომ არსოშვილის ამგვარი პოლიტიკის მიზანი, საჭიროების შემთხვევაში, სწორედ არეულობის გამოწვევის მცდელობა ყოფილიყო.
თენგიზ გოცირიძე „თელასში“ 1995 წლიდან მუშაობდა. მისი ამდენწლიანი გამოცდილება და პროფესიონალიზმი მხოლოდ ზურაბ არსოშვილისთვის გახდა მიუღებელი.
_ არსოშვილმა ორი თვის შემდეგ გამიშვა სამსახურიდან. მაგრამ მისთვის უთარიღო განცხადების დაწერის სიამოვნება არ მიმინიჭებია. როგორც კი წავედი, „ნაციონალებმა“ დამირეკეს, _ რაიონული შტაბის ხელმძღვანელი ვარ, სამსახურიდან რომ გაგიშვეს ვიცით, თუ კორუფციაში შემჩნეული არ ხარ, დავაბრუნებინებთ შენს თავსო… ამდენი წელი პატიოსნად ვიმუშავე და თურმე, ვიღაცას სამადლოდ უნდა დავებრუნებინე სამსახურში. ვუთხარი, ისეთ ადამიანთან, როგორიც არის არსოშვილი, უცოდინარი, არაპროფესიონალი და არაკომპეტენტური, ჩემი მუშაობა არ შეიძლება მეთქი,“ _ აცხადებს თენგიზ გოცირიძე „გურია ნიუსთან“.
„გურია ნიუსის“ კითხვაზე, _ რა მოხდებოდა იმ შემთხვევაში, თუ განცხადების დაწერაზე უარს იტყოდა, გოცირიძემ განაცხადა, რომ მის თანამშრომლებს, „გააფუჭებდნენ“ და ყველას უმუშევრად დარჩენას მისი წამოსვლა ამჯობინა.
„თელასის“ გათავისუფლებული თანამშრომლები გაჩუმებას არ აპირებენ და სამართლებრივ ბრძოლას იწყებენ. ისინი “თელასის” ხელმძღვანელობას კიდევ ერთხელ მიმართავენ განცხადებით, სადაც აღნიშნულია: „მიგვაჩნია, რომ ჩვენ გავხდით არსებული ხელისუფლების უკანონობის მსხვერპლნი, შეილახა ჩვენი უფლებები, დაგვტოვეს უმუშევრები. მსგავს სიტუაციაში რამდენიმე ათეული თანამშრომელია. ამიტომ, გთხოვთ დახმარებას ჩვენს სამსახურში აღდგენასთან დაკავშირებით”.
