“თეთრ სიაში” მოხვედრა მხოლოდ იმ კომპანიებისთვის იყო შესაძლებელი, რომლებიც “სახელმწიფოს ინტერესებს ატარებდნენ”. ამ სიაში ჩამოთვლილი კომპანიების უმეტესობა “ნაცმოძრაობის” შემომწირველები არიან. მათ შორის: “ზიმო”, “ალიანსი”, “ვისოლი”…
ცნობისთვის, ამ “სიაში” მოხვედრა ბევრ პრივილეგიას ნიშნავს, კომპანიას შეუძლია ყოველგვარი კონკურენციის გარეშე მიიღოს მონაწილეობა ტენდერებში.
კომპანია “ალდაგი ბისიაის” სახელს უკავშირდება ექიმების მასობრივი გათავისუფლება სხვადასხვა რაიონის საავადმყოფოებიდან, რასაც ისინი რესტრუქტურიზაციით ხსნიდნენ. ხშირ შემთხვევაში, ექიმების ინფორმირება გათავისუფლების შესახებ მოკლე სატელეფონო ტექსტური შეტყობინებით ხდებოდა და ამას სახელად რესტრუქტურიზაცია ერქვა. ექიმების ამ ფორმით გათავისუფლების შესახებ “ალდაგი”კომენტარს არ აკეთებდა.
მოსახლეობის შეღავათებზე ზრუნვა “ალდაგი ბისიაიმ” არჩევნების დასრულებისთანავე დაასრულა და კომპანიამ მომსახურება ორჯერ გააძვირა. თუკი სექტემბრის თვეში კონსულტაცია 10 ლარი ღირდა, ახლა ეს მომსახურება 25 ლარს შეადგენს; 400-ლარიანი მშობიარობა 600 ლარი გახდა; 290-ლარიანი რეანიმაცია _ 450 ლარი. ერთი ღამის საფასური სამკურნალოდ შემოსული პაციენტებისთვის, თანაც ყოველგვარი პირობების გარეშე, 100-ლარიანი “სიამოვნებაა”.
ასეთი ტარიფებია ქობულეთის სამედიცინო ცენტრში, რაც იმას ნიშნავს, რომ “ალდაგი ბისიაის” პატრონაჟის ქვეშ მყოფ ყველა კლინიკაში ანალოგიური სიტუაციაა.
როგორც “გურია ნიუსს” კომპანიაში განუცხადეს, ფასები მთავრობის 2012 წლის 14 მაისის #177 დადგენილებით განისაზღვრა და ერთნაირი სტანდარტიზაცია მოხდა, რომელიც დადგენილების საფუძველზე სექტემბერში შევიდა ძალაში.
_ ფასები სტანდარტული გახდა საქართველოში არსებულ ყველა ჩვენს კლინიკაში, _ აცხადებენ “ალდაგი ბისიაში” და იქვე დასძენენ, რომ ქობულეთში ყველაზე შეაღავათიანი ფასებია სხვა რეგიონებთან შედარებით.
“გურია ნიუსის” კითხვაზე, რა ღირს მშობიარობა სხვა რეგიონებში, გვიპასუხეს, რომ 650 ლარი. მართალია, კომპანიაში არ იციან ზუსტად, რატომ გაუწიეს შეღავათი ქობულეთს, მაგრამ “ალდაგის” წინასაარჩევნო “მზრუნველობის” მიხედვით თუ ვიმსჯელებთ, პასუხი ძალიან მარტივია: წინასაარჩევნო პერიოდი ტურისტულ სეზონს დაემთხვა და დამსვენებელ-ამომრჩეველთა დიდი ნაწილი სწორედ ქობულეთში ისვენებდა. ამას ზედ ემატებოდა ქობულეთის მოსახლეობის ოპოზიციური განწყობა ხელისუფლების მიმართ და აქედან გამომდინარე, “საშეღავათო” მისიაც გასაგები ხდება.
_ რატომ მოხდა არჩევნების დამთავრებისთანავე ტარიფების თითქმის გაორმაგება, _ ამ კითხვაზე “ალდაგში” პასუხს ვერ გვცემენ.
მომატებული ფასების კვალობაზე, კატასტროფულად გამოიყურება ექიმების ხელფასები. ქობულეთელი ექიმების საშუალო ხელფასი საარსებო მინიმუმზე დაბალია.
საქსტატის 2012 წლის აპრილის თვის მონაცემებით, საშუალო მომხმარებლის საარსებო მინიმუმი 136,5 ლარით განისაზღვრა. ქობულეთელი ექიმების საშუალო ხელფასი კი 100-იდან 120 ლარამდე მერყეობს. მაგალითად, ქალთა კონსულტაციის განყოფილების გამგის თვიური ანაზღაურება 140 ლარია, ხოლო ამავე კონსულტაციის ექიმები (მათ შორის მეცნიერებათა კანდიდატი), ხელზე 80 ლარს იღებენ.
“ალდაგში” გაგვიცხადეს, რომ ინფორმაცია 80-ლარიანი ანაზღაურების შესახებ სიმართლეს არ შეესაბამება და ექიმების ხელფასი 100 ლარია… მცირე არითმეტიკული გაანგარიშების შემდეგ, რაც ამ 100 ლარს საშემოსავლო გამოვაკელით, მაინც იმ დასკვნამდე მივედით, რომ დამსახურებული ექიმების შემოსავალი საარსებო მინიმუმზე დაახლოებით ერთნახევარჯერ ნაკლებია.
“თეთრ სიაში” მოხვედრილ, “წარმატებულ” კომპანიაში აცხადებენ, რომ ყველაფერი ეტაპობრივად ხდება, თუმცა “ამ ეტაპზე”, გარდა 80-ლარიანი ხელფასებისა, ქობულეთის ცენტრალურ კლინიკაში ასეთი სიტუაციაა:
სამშობიარო ბლოკის გვერდით კარდიოლოგიური პალატებია, 10-საწოლიან მელოგინეთა და ორსულთა განყოფილებას (ამას ზედ ემატება მედპერსონალიც) ერთი საერთო სველი წერტილი აქვს, ონკანიც აქვეა განთავსებული და ჭურჭელიც აქ ირეცხება. ბავშვთა განყოფილებას კი ონკანი საერთოდ არ გააჩნია. მიუხედავად იმისა, რომ ამ ყველაფრის შესახებ პირველი დღიდანვე იცოდა “ალდაგის” წარმომადგენელმა, “ჩემი ოჯახის კლინიკის” საოპერაციო დეპარტამენტის დირექტორმა გიგა ნემსაძემ, მდგომარეობა უცვლელი რჩება.
უფრო მეტიც, ნებისმიერი სახის პრეტენზიას ან მოთხოვნას ექიმის მხრიდან, მოკლედ და მოჭრით პასუხობენ _ “არ მოგწონს? წადი!”
მმართველობის 5 თვის თავზე, “ალდაგი ბისიაის” მომუშავე მედპერსონალთან შრომითი ხელშეკრულებაც კი არ გაუფორმებია.
კომპანიაში თავიდან გაგვიცხადეს, რომ ხელშეკრულება ყველა ექიმთან ჰქონდათ გაფორმებული: “შეიძლება ერთი ეგზემპლარი ჩვენთან ინახება, მეორე -კლინიკაში და თვითონ ექიმებს არ აქვთ”, _ განგვიმარტეს” ალდაგში”. მოგვიანებით დაადგინეს, რომ ექიმები ჯერ კიდევ “იმედი ელთან” გაფორმებული ხელშეკრულებებით მუშაობენ. როგორც გაგვიცხადეს, ამაში კანონდარღვევა არაფერია, რადგან ცვლილებები არ შესულა და ხელფასები იგივე დარჩა.
“გურია ნიუსის” კითხვაზე, _ ჰქონდა თუ არა კანონდარღვევას ადგილი მაშინ, როცა იგივე “იმედი ელთან” გაფორმებული კონტრაქტებით მომუშავე მედპერსონალი ყოველგვარი გაფრთხილების გარეშე გაათავისუფლეს, “ალდაგში” ამაზე კონკრეტული პასუხი არ აქვთ.
კიდევ უფრო აბსურდულია, სადაზღვევო კომპანიის კორპორაციული დაზღვევა, რომელსაც ის თავის მედპერსონალს სთავაზობს. როგორც აღმოჩნდა, კორპორაციული დაზღვევის ფასი 25-დან 50 ლარამდე მერყეობს, საოჯახო დაზღვევის ფასი კი 105 ლარია. თუ 100-ლარიან ანაზღაურებასაც გავიხსენებთ, ეს იმას ნიშნავს, რომ საოჯახო დაზღვევის სურვილის შემთხვევაში, ექიმებმა ერთი თვის ხელფასი დაზღვევისთვისუნდა გადაიხადონ და ზედ 5 ლარიც დაამატონ.
ასეთია “წარმატებული” და თეთრ სიაში მოხვედრილი კომპანიის “ეტაპობრივი განვითარების სტრატეგია”, რომლის გენერალური დირექტორი ამ წლის 12 ოქტომბრამდე, ბიძინა ივანიშვილის ჯანდაცვის მინისტრობის კანდიდატის, ამირან გამყრელიძის ვაჟი, ნიკოლოზ გამყრელიძე გახლდათ.
წარდგენის დღეს, ამირან გამყრელიძემ “გურია ნიუსთან” განაცხადა, რომ მისი შვილი არაფერ შუაში იყო, თუმცა, 16 ოქტომბერს მან ჯანდაცვის მინისტრობაზე უარი ასე ახსნა:
_ პირველ ეტაპზე ვერ გავითვალისწინეთ ერთი მნიშვნელოვანი გარემოება, რომ არსებობდა გარკვეული უხერხულობა და მორალური ინტერესთა კონფლიქტი ჩემს მომავალ პოზიციასა და ჩემი შვილის თანამდებობას შორის, რომელიც ბოლო ხუთი წლის განმავლობაში გახლდათ ყველაზე დიდი კერძო სადაზღვევო კომპანიის “ალდაგი ბისიაის” გენერალური დირექტორი.
ეს არ გახლდათ ინტერესთა სამართლებრივი კონფლიქტი, მაგრამ იყო მორალური უხერხულობა და ამის შესახებ დაიწერა პრესაშიც, – განაცხადა ამირან გამყრელიძემ.
მასალა ამ ინტერესთა კონფლიქტის შესახებ პირველად სწორედ “გურია ნიუსის” ვებგვერდზე გამოქვეყნდა სახელწოდებით “ამირან გამყრელიძის შვილის კომპანია პრივილეგირებულთა “თეთრ სიაში!”
2012 წლის 12 ოქტომბერს – საქართველოს ბანკმა, განაცხადა ბანკის სამეთვალყურეო საბჭოს გადაწყვეტილების შესახებ, რომლის თანახმადაც ნიკოლოზ (ნიკა) გამყრელიძე დაინიშნა საქართველოს ბანკის ჯგუფის ფინანსური დირექტორის თანამდებობაზე. ფინანსების დარგში, ბანკის გენერალური დირექტორის მოადგილე, მურთაზ კიკორია კი “ალდაგი ბისიაის” გენერალურ დირექტორად გადაიყვანეს..
