გავრცელებული ინფორმაციით, ნინა ხატისკაცთან სერიოზული მოლაპარაკებები მიმდინარეობს და არ არის გამორიცხული, სახალხო დამცველის პოსტზე სწორედ ის ვიხილოთ.
_ ჩემს კანდიდატურასთან დაკავშირებით, ბევრი ინფორმაცია არ მაქვს. მე ორიენტირებული ვიყავი ერთ-ერთ კანდიდატზე, თამარ გურჩიანზე და მის კანდიდატურას ორივე ხელებით ვუჭერდი და ვუჭერ მხარს. ახლა მაქვს კითხვები იმასთან დაკავშირებით, თუ რამდენად არის პოლიტიკური მხარდამჭერა ამ კანდიდატის და თუ არ არის, მაშინ უნდა არსებობდეს სერიოზული არგუმენტები, რადგან მიმაჩნია, რომ თამარი ძალიან პრინციპული ადამიანია. ის ყველაზე ახლოს დგას ჩემს პრინციპებთან და ღირებულებებთან.
უცებ გადაწყვეტილების მიღებას და გურჩიანთან დაპირისპირებას ნამდვილად არ ვაპირებ. აქედან გამომდინარე, პირველ რიგში, მინდა გავარკვიო მიზეზები, რატომ დაიწყო ფიქრი ახალ კანდიდატებზე და რატომ არ განიხილება ვთქვათ არსებული კანდიდატები, მათ შორის თამარ გურჩიანის კანდიდატურა.
რაც შეეხება ჩემს დამოკიდებულებას ამ პოსტთან დაკავშირებით, გეტყვით, რომ ვფიქრობ და განვიხილავდი ჩემს კანდიდატურას ჩემი პრინციპებიდან გამომდინარე. არ მიმაჩნია, რომ ჩემზე უკეთესი კანდიდატები არ არიან. ვინც დასახელდა, ნამდვილად კარგი კანდიდატებია.
სახალხო დამცველი ერთ-ერთი მნიშვნელოვანი პოსტია, სადაც საჭიროა ისეთი ადამიანი, რომელიც საქმეს გააკეთებს, ამ საქმეს მიუდგება პროფესიონალურად, ობიექტურად და საქმეს მიიყვანს ბოლომდე.
_ “ქართული ოცნების” წარმომადგენლებთან გქონდათ ამ საკითხთან დაკავშირებით შეხვედრა?
_ შეხვედრები არ ყოფილა, გუშინდელი დღიდან თბილისში არ ვარ, სატელეფონო საუბარი მქონდა ბევრ ადამიანთან, მათ შორის სამოქალაქო საზოგადოების წარმომადგენლებთან და „ქართული ოცნების“ წევრებთან, მაგრამ ეს კითხვა არ დამისვამს, ვისგან მოდის ეს ყველაფერი.
_ დღეს, თამარ გურჩიანმა სატელევიზიო ეთერით გამოსვლისას, დადებითად შეაფასა გიორგი ტუღუშის მუშაობის პერიოდი. სახალხო დამცველის აპარატმა თუ გაავრცელა განცხადება მაშინ, როდესაც თქვენი მეუღლე დააკავეს და საქმეში სამხედრო დანაყოფი ჩაერთო, რაც აშკარად კანონდარღვევა იყო?
_ სახალხო დამცველის აპარატისთვის არც „ქართულ ოცნებას“ და არც მე მიმიმართავს. თუმცა, თქვენ კარგი თემა ახსენეთ. დაკავება, რომელიც ჩემს ქმართან დაკავშირებით განხორციელდა, ერთადერთი არ იყო და ზოგადად, არაერთი უკანონო დაკავება მოხდა. ამაზე, როგორც მახსოვს, სახალხო დამცველის აპარატი საუბრობდა. კონკრეტულად ჩემს ქმართან დაკავშირებით, შეიძლება არ უსაუბრიათ, მაგრამ ზოგადად ვამბობ, ეს ალბათ არ არის გასაკვირი, რადგან დაძაბული დღეები იყო ამ საარჩევნოდ.
თუმცა, რაც შეეხება ჯარისკაცების საკითხს, ეს მნიშვნელოვანი თემაა, იმაზე მეტიცაა ჩემი აზრით, ვიდრე უბრალოდ ადამიანების დაკავება. სამხედროების მონაწილეობა, სამოქალაქო-პოლიციურ ფუნქციებში ზოგადად და განსაკუთრებით წინასაარჩევნო პერიოდში, ყველა იმ პრინციპის დარღვევაა, რომელიც სააკაშვილის ხელისუფლებას დეკლარირებულად გააჩნდა. ყველა პრინციპის იგნორი მოხდა ამ სამხედროების გამოჩენით. ამასთან დაკავშირებით, ვფიქრობ, აუცილებლად უნდა დაინტერესდეს ყველა შესაბამისი უწყება. ჩემს მიერ მოპოვებული ინფორმაციით, ნატო უკვე დაინტერესებულია ამ საკითხით. სახალხო დამცველის აპარატიც უნდა იყოს ერთ-ერთი, როდესაც ადამიანის უფლებების შელახვა ხდება.
_ დღეს სოციალურ ქსელში იურისტმა, თამარ კორძაიამ დაწერა, რომ ნინა ხატისკაცი, როგორც პროფესიონალი, ცსკოს თავმჯდომარეობას იმსახურებს. ამასთან დაკავშირებით რას იტყოდით?
_ თამარ კორძაიას დიდი მადლობა ასეთი ნდობისთვის და ასეთი წინადადებისთვის. ეს არ არის ის საკითხი, რომელიც განიხილება და არ მგონია, რეალური იყოს. ზოგადად ვიტყვი: ჩემს დამოკიდებულებას იმგვარ საქმესთან, რომელიც არის ცენტრალური საარჩევნო კომისია, სახალხო დამცველის აპარატი, მე არ ვუშინდები არცერთ საქმეს, არცერთ მომენტში არ ვაპირებ პრინციპულობის დაკარგვას და რაღაცის გამო რაღაცის დათმობას. ზოგადად, საარჩევნო კომისია და არჩევნები ისეთი თემაა, სადაც თავს საკმაოდ კომფორტულად და კარგად ვგრძნობ. რა თქმა უნდა, ეს არ არის ის მომენტი, რომ ჩემი კანდიდატურა რაიმე თანამდებობაზე განვიხილო. უბრალოდ, ეს შემოთავაზებები მეტყველებს იმაზე, რომ სამოქალაქო საზოგადოება აქტიურობს და ეს ძალიან კარგია.
