შეხვედრის მიზანი ის იყო, რომ დავით დარახველიძეს სურდა, კიდევ ერთხელ აეხსნა არასამთავრობო ორგანიზაციებისთვის მიზეზი და გარემოებები, რის გამოც მან საარჩევნო კამპანიის დროს აგრესიული ტონი გამოიყენა მასმედიასთან
შეგახსენებთ, რომ 2012 წლის 16 ოქტომბერს პრემიერ – მინისტრობის კანდიდატმა ბიძინა ივანიშვილმა წარადგინა მინისტრთა კაბინეტი. საქართველოს ოკუპირებული ტერიტორიიდან იძულებით გადაადგილებულ პირთა, განსახლებისა და ლტოლვილთა მინისტრობის კანდიდატად დასახელებული იქნა ბატონი დავით დარახველიძის კანდიდატურა.
არასამთავრობო ორგანიზაციებმა შეშფოთება გამოთქვეს აღნიშნულ კანდიდატურასთან დაკავშირებით, რადგან მინისტრობის კანდიდატის მიერ ამბროლაურის რაიონში ჩატარებული საარჩევნო კამპანიის დროს გამოყენებული იქნა სიძულვილის ენა და რასისტული გამონათქვამები, ისევე როგორც აგრესიული ტონი მას-მედიასთან ურთიერთობისას. აღნიშნული გამონათქვამები ეწინააღმდეგება ევროპულ ფასეულებებს და ევროინტეგრაციის კურსს, რაც საქართველოს საგარეო პოლიტიკის გაცხადებული პრიორიტეტია და არღვევს ადამიანის ძირითად უფლებებსა და თავისუფლებებს, _ ნათქვამია არასამთავრობოების განცხადებაში, რომელსაც 10 ორგანიზაცია აწერს ხელს.
ამ განცხადების შემდეგ, დავით დარახველიძემ ღია ეთერში გააკეთა ახსნა-განმარტებები იმ ფრაზეოლოგიის შესახებ, რომელიც მან გამოიყენა.
არასამთავრობო ორგანიზაციების მიმართვას მინისტრობის კანდიდატ დავით დარახველიძესთან დაკავშირებით, ბიძინა ივანიშვილის წერილი მოჰყვა საპასუხოდ.
დღეს, დარახველიძემ არასამთავრობოებთან ახსნა-განმარტება გააკეთა იმასთან დაკავშირებით, თუ რა სიტუაციაში მოუხდა მას აღნიშნული ფრაზეოლოგიის გამოყენება. მისი თქმით, ამ თემაზე ბიძინა ივანიშვილთანაც ჰქონდა საუბარი, სადაც განაცხადა, რომ თუ მისი კანდიდატურა გუნდს რაიმე პრობლემას შეუქმნიდა, ის მზად იყო უარი ეთქვა თავის კანდიდატურაზე.
დარახველიძის თქმით, მისთვის მთავარია არა თანამდებობა, რომელზეც წარადგინეს, არამედ ის, რომ საზოგადოებისთვის მისი პერსონა არ იყოს ასოცირებული ქსენოფობისტთან.
“რეგიონული მედიის ასოციაციის” თავმჯდომარე ია მამალაძე აცხადებს, რომ ქვეყანაში მიმდინარე ყველა პროცესზე პასუხისმგებლობა უნდა აიღოს პრემიერ-მინისტრმა და მისი გადასაწყვეტია, ვინ იქნება მინისტრთა კაბინეტში.
_ მესამე სექტორის ფუნქცია არის მუდმივი მონიტორინგის რეჟიმში ყოფნა. “ჯერ ვაცალოთ პოლიტიკას” _ ამ ცნებას, მწარე გამოცდილებიდან გამომდინარე, მესამე სექტორი არ ცნობს და ასე გაგრძელდება მომავალშიც, _ განაცხადა ია მამალაძემ “გურია ნიუსთან”.
