დოკუმენტების დეტალური შესწავლის შემდეგ კი რეგიონული განვითარებისა და ინფრასტრუქტურის სამინისტრომ დაადგინა, რომ მისი რეალური ღირებულება 3,9 მლნ ლარია. მხოლოდ ერთ პროექტში არსებულსა და რეალურ საბაზრო ღირებულებას შორის სხვაობამ 700 ათსი ლარი შეადგინა.
ნადიკვრის პარკის ფინანსურ დეტალებს სამინისტრო “კახეთის რეგიონული განვითარების პროექტის” ფარგლებში გაფორმებული ხელშეკრულებების შესწავლისას გაეცნო.
ხელშეკრულებებში აღმოჩენილ ფინანსურ შეუსაბამობებზე დღეს რეგიონული განვითარებისა და ინფრასტრუქტურის სამინისტროში ერთობლივი ბრიფინგი მინისტრმა დავით ნარმანიამ და მისმა მოადგილემ შოთა მურღულიამ გამართეს. მათი განცხადებით, ყველა დოკუმენტი, სადაც დარღვევები აღმოაჩინეს, ფინანსურ პოლიციაშია გადაგზავნილი. სწორედ ეს უწყება დაადგენს, თუ ვისი ბრალეულობა იკვეთება საქმეებში.
“სამინისტრო დეტალურად სწავლობს განხორციელებული და მიმდინარე პროექტების ხარჯთაღრიცხვებს (მასალებისა და სამუშაოების ღირებულებას) და ადგენს მათ შესაბამისობას რეალურ ფასებთან. კახეთში განხორციელებულ პროექტებში მასალებისა და მომსახურების ღირებულება არარეალურად მაღალია. ციფრები შევადარეთ მაშინ არსებულ ფასებს, ასევე ავიღეთ შეწონილი, მშენებელთა კავშირის მიერ დადგენილი ფასები და გავარკვიეთ, რომ დახარჯული თანხა არარეალურია. ეს ყველაფერი ტენდერით იყო განხორციელებული, მაგრამ ტენდერამდე საკითხი საპროექტომ უნდა შეისწავლოს და სანამ ტენდერს გამოაცხადებს, რეალური ფასი ჩადოს. ნადიკვრის შემთხვევაში აღმოვაჩინეთ, რომ არმატურის ფასი ტონაზე, საბაზრო ფასსთან შედარებით 470 ლარით მეტია, არის სამშენებლო სამუშაოები სადაც რეალურსა და პროექტით გათვალისწინებულ ფასს შორის 80 პროცენტიანი სხვაობაა. აქედან გამომდინარე ჩვენ ვკითხულობთ, რატომ მოხდა ისეთი ხარჯთაღრიცხვის დადება და შემდეგ ტენდერის გამოცხადება, რომელმაც სახელმწიფო აზარალა? დანარჩენი საგამოძიებო სამსახურების პრეროგატივაა, რომელიც დაადგენს კომპანია იყო ამაში ჩართული, მხოლოდ საპროექტოს ბრალეულობაა, თუ დამკვეთის,” – ამბობს შოთა მურღულია.
“მუნიციპალური განვითარების ფონდი” ძირითადად უცხოური რესურსებით ფინანსდება. მათ შორის მსოფლიო ბანკის და აზიის განვითარების ბანკის მიერ. იმ პროექტების დიდი ნაწილი, რომლების ხარჯვით ნაწილშიც რეგიონული განვითარებისა და ინფრასტრუქტურის სამინისტრომ დარღვევები აღმოაინა, უცხოური კრედიტით არის დაფინანსებული. “კრედიტი მოგეხსენებათ უკან დასაბრუნებელი ფინანსური რესურსია და ამ მიმართულებით მონიტორინგის განხორციელება, ისევე როგორც საბიუჯეტო სახსრების კონტროლი, განსაკუთრებით მნიშვნელოვანია,” – გვითხრა დავით ნარმანიამ.
რეგიონული განვითარებისა და ინფრასტრუქტურის სამინისტროში აცხადებენ, რომ ფინანსურ პოლიციაში გადაიგზავნება ასევე თელავის ქუჩების გამწვანება-კეთილმოწყობის, სანიაღვრე არხების რეაბილიტაციისა და სხვა დოკუმენტები. ამ პროექტებში სამინისტრომ არსებულსა და რეალურ საბაზრო ღირებულებას შორის 7, 10, 15 პროცენტიანი სხვაობა აღმოაჩინა… დავით ნარმანიას თქმით, თელავში რეაბილიტაციის პროცესი არ შეჩერდება. ქალაქში ყველა იმ პროექტის განხორციელება გაგრძელდება, რომლებიც უკვე დაკონტრაქტებულია.
