“თავისუფალი საქართველო” საქართველოს თვითმმართველ ერთეულებში მიმდინარე პროცესებს მიიჩნევს ადგილობრივი მოსახლეობის მხრიდან “ნაციონალური მოძრაობის” მიერ ჩამოყალიბებული მახინჯი თვითმმართველობის სისტემის წინააღმდეგ მიმართულ ბუნებრივ რეაქციას, რომელიც მორგებული იყო ერთპიროვნულ ცენტრალიზებულ მმართველობაზე, არ გააჩნდა არანაირი საკუთარი ფინანსური სახსრები და ემსახურებოდა მხოლოდ მოსახლეობის დათრგუნვასა და საკუთრების წართმევას ადგილობრივი გამგებლებისა და პრეზიდენტების რწმუნებულების სასარგებლოდ.
ამის ნათელი გამოხატულებაა მარტვილის რაიონი, სადაც წლების განმავლობაში, სააკაშვილის მიერ არჩევნების გაყალბების შედეგად დანიშნული საკრებულოს თავჯდომარე (გუბერნატორის ძმა), გამგებელი – მათი ნდობით აღჭურვილი პირი და გუბერნატორი გოროზია წლების განმავლობაში დაკავებული იყვნენ გლეხებისა და სოფლის საკუთრებაში არსებული სახნავი მიწებისა და საძოვრების დატაცებით, ამ მიწებზე საკუთარი თხილის პლანტაციების გაშენებით და აუარებელი ფულის შოვნით.
მარტვილის მოსახლეობის წლების განმავლობაში არაერთი თხოვნისა, პროტესტისა, სამართლის დადგენისა, ასევე სასამართლოში აპელირებისა შესმენილ არ იქნა და დღეს, როცა მარტვილის „ნაციონალურ მოძრაობის“ ხელმძღვანელ ყაჩაღებს პოლიციის ზურგი აღარა აქვთ, განაწამები, ქონება წართმეული მოსახლეობის პროტესტი სავსებით სამართლიანია და „ხელმძღვანელი“ პირების გადადგომის მოთხოვნის დაკმაყოფილება სავსებით ლეგიტიმური, ადგილობრივი მოსახლეობის ცხოვრების ნორმალურ კალაპოტში ჩასაყენებლად.
ამასთანავე, როდესაც „ნაც“ აქტივი თვითმმმართველობის სისტემაზე, თვითმმართველობის ინსტიტუტზე საუბრობს არის ბლეფი, ვინაიდან, აღნიშნული სისტემა, რომელიც სწორედ მათი ტოტალიტარული მმართველობის პირობებში არის მიღებული, არ შეიძლება იწოდებოდეს თვითმმართველობად, ვინაიდან, თვითმმართველობებს არ გააჩნიათ არანაირი კომპეტენცია, არანაირი ფინანსური სახსრები, რაც ასე აუცილებელია მოსახლეობისათვის ადგილობრივი თვითმმართველობის სრულყოფილად განხორციელებისათვის და მთლიანად ცენტრის ხუშტურებზე არის აწყობილი – სააკაშვილს მოუნდება წყალს გაუყვანს, მოუნდება გზას გაუყვანს, მოუნდება გაზს გაუყვანს და არ მოუნდება არც არაფერს არ გაუყვანს.
უფრო მეტიც, „საქართველოს დედაქალაქის თბილისის შესახებ“ კანონით, გაწერილი არ არის სავსებით ბუნებრივი შემთხვევა, თუ როგორ უნდა ვიმოქმედოთ კანონის ფარგლებში, როცა დედაქალაქის მერი ან საკუთარი განცხადებით გადადგება, ან კრიმინალისათვის დაიჭერენ ან ადამიანები ვართ და გარდაიცვლება.
ასეთი საკანონმდებლო ვაკუუმი წარმოუდგენელია. შეუძლებელია კანონით არ იყოს განსაზღვრული, თუ რა ხდება მერის პოსტის ვაკანსიის დადგომის შემთხვევაში: ვინ იკავებს მის პოსტს ვიდრე ვადამდელი არჩევნები არ დაინიშნება და ახალი მერი არ აირჩევა, რა ვადებში ტარდება მერის ვადამდელი არჩევნები, ვინ ნიშნავს არჩევნებს, რა უფლებამოსილებები ექნება მერის მოვალეობის შემსრულებელს და კიდევ მრავალი სხვა ნიუანსი, რომელიც ამ ინსტიტუტის მუდმივმოქმედ ფუნქციონირებას უზრუნველყოფს.
დღეს კი ამ აბდაუბდის შემოქმედმა ადამიანებმა, სააკაშვილის ხელმძღვანელობით, რომლებმაც მათ მიერ ჩადენილი კორუფციული ქმედებების გამჟღავნებისა და შესაბამისად დაჭერების საფრთხე დაინახეს, მხოლოდ ეხლა გაახსენდათ, რომ თვითმმართველობა, ისევე, როგორც საკანონმდებლო, აღმასრულებელი და სასამართლო ხელისუფლებები, ასევე სახელმწიფო დამოუკიდებელი სახელისუფლებო შტოა და ამით ცდილობენ “თვითმმართველობა” თავიანთი დანაშაულებრივი ქმედებების შესაფუთად და პოლიტიკური დევნის მოტივად გამოიყენონ მხოლოდ.
მოვითხოვთ საქართველოს პარლამენტმა დაიწყოს თვითმმმართველობის სისტემის ძირეული რეფორმირება!
ამასთან სასწრაფო წესით, ჩვენ შევდივართ საქართველოს პარლამენტში საკანონმდებლო წინადადებით „საქართველოს დედაქალაქის თბილისის შესახებ“ კანონში ცვლილებების შეტანის თაობაზე, მერის პოსტთან დაკავშირებული ყოვლად უმსგავსო ვაკუუმის დაუყოვნებლივ აღმოსაფხვრელად.
