ის აპირებდა კიდეც საკუთარი კანდიდატურის დაყენებას გამგებლის პოსტზე, თუმცა, საბოლოოდ გადაიფიქრა.
თუ რა იყო ამ თავშეკავების მიზეზი, ამის შესახებ თვით თავად გია ცქვიტინიძეს ვესაუბრეთ.
_ ბატონო გია, თქვენ აპირებდით ოზურგეთის გამგებლობის კანდიდატი ყოფილიყავით, თუმცა, გადაიფიქრეთ.
_ კი, ასეა. მე მართლაც ვაპირებდი საკუთარი თავის წარდგენას გამგებლის მოვალეობის შემსრულებლის თანამდებობაზე. ეს ნაბიჯი განპირობებული იყო იმით, რომ ჩემს ირგვლივ თავი მოიყარეს იმ ადამიანებმა, რომლებიც გარკვეულწილად უკმაყოფილო იყვნენ კოტე შარაშენიძის მოქმედებებით. მართლაც ქვეყნის კეთილდღეობაზე ორიენტირებული ადამიანები ვიდექით ერთად და გამარჯვების შანსებიც რეალური იყო, რომ არა ერთი გარემოება _ ბატონმა ზვიად კვაჭანტირაძემ ვერ შეძლო ჩემი კანდიდატურის დაყენება, რადგან მისი თქმით, ეს იქნებოდა კოალიციის წინააღმდეგ წასვლა. სხვანაირად რომ ვთქვათ, კოალიციიდან ერთი ადამიანი უნდა ყოფილიყო წარდგენილი და ეს პიროვნება კოტე შარაშენიძე იყო. სწორია თუ არა ასეთი მიდგომა, ეს სხვა საკითხია. მე დამოუკიდებლად რომ შემეტანა განაცხადი გამგებლის მოვალეობის შემსრულებლის თანამდებობაზე, მხარდაჭერას ვერ მივიღებდი, რადგან ნაციონალური საკრებულოს წევრთა ფსიქოლოგიიდან გამომდინარე, მხარდაჭერას მიიღებდა ის, ვისგანაც მფარველობას ელოდებოდნენ. რა თქმა უნდა, საკრებულოში არიან ისეთებიც, ვისაც დამოუკიდებლად შეუძლია გადაწყვეტილების მიღება. ეს გახდა იმის მიზეზი, რომ განაცხადი აღარ შევიტანე.
_ როგორ შეაფასებდით ახალი გამგებლის კანდიდატურის დამტკიცებას?
_ კოტე შარაშენიძის გამგებლის მოვალეობის შემსრულებლად დამტკიცებას დრო შეაფასებს. ვინმე თუ ფიქრობს, რომ რაიმე კონკრეტული მუშაობით დაიდო ის შედეგი, რაც ოზურგეთში მივიღეთ საარჩევნოდ, ძალიან ცდება. ეს იყო გურულების და ბატონი ბიძინა ივანიშვილის მიერ მოპოვებული გამარჯვება. ასე რომ, ნურავინ მიიწერს იმას, რომ ვინმეზე მეტი საქმე გააკეთა და რომ უფრო მეტი დადო სასწორზე, ვიდრე სხვამ. ვფიქრობ, საკითხისადმი ასეთი მიდგომა ამორალურია, როდესაც სამშობლოს და ჩვენი შვილების მომავალს ეხება საქმე. სამწუხაროა, რომ ბევრი ვერ აცნობიერებს, თუ რამხელა საშიშროების წინაშე იდგა ქვეყანა და ამ გამარჯვებას უყურებს, როგორც ხელისუფლების ცვლილებას და შანსს საკუთარი კეთილდღეობის მოსაწყობად.
_ იყო თუ არა თქვენსა და კოტე შარაშენიძეს შორის დაპირისპირება?
_ დიახ, ჩემსა და კოტე შარაშენიძეს შორის იყო დაპირისპირება, რადგან არჩევნების პროცესში წარმოიშვა კითხვები, რომლებზეც მას პასუხები არ გაუცია. თუ ვინმე თვლის, რომ ის იყო შტაბის უფროსი და არავის წინაშე ვალდებულება არ გააჩნდა, რაიმე აეხსნა, ძალიან ცდება. მე ვთვლი, რომ ეს იყო საერთო საქმე და ამ არჩევნებით წყდებოდა საქართველოს ბედი.
_ არჩევნების პერიოდში კოტე შარაშინიძე იყო ის ადამიანი, რომელმაც საკუთარ სახლში განათავსა შტაბი. “ნაციონალური” მოძრაობის მოგების შემთხვევაში, არ იყო გამორიცხული, რომ მის მიმართ ზეწოლას ჰქონოდა ადგილი. ხომ ცნობილია, რომ კოტე შარაშენიძეს 7 ნოემბერს მიკროავტობუსი დაუმტვრიეს, რადგან მას თბილისში აქციაზე ხალხი მიჰყავდა. ეს არ არის მისი მხრიდან თავდადება?
_ “ნაციონალური მოძრაობის” გამარჯვების შემთხვევაში, არავინ იცის, ვინ როგორ დაისჯებოდა. მე მგონია, რომ კოტეს არავინ დასჯიდა. ძალიან ბევრმა გადადო თავი წინასაარჩევნო პერიოდში, ბევრმა კოტეზე გაცილებით მეტი გააკეთა და ამას არავის აყვედრის.
_ ეს აგრესია და კოტე შარაშენიძის მიმართ კრიტიკა ხომ არ არის იმის ნიშანი, რომ ერთ თანამდებობაზე კოალიციის რამდენიმე წევრს სურდა მოსვლა?
_ თუ რაიმე კრიტიკა ან აგრესია არსებობს ამ ადამიანის მიმართ საზოგადოებაში, ეს პირადად მისი დამსახურებაა. ის უკვე არჩეულია გამგებლის მოვალეობის შემსრულებლის თანამდებობაზე და იმედია, წარმატებით გაართმევს თავს იმ უზარმაზარ პასუხისმგებლობას, რაც კოალიცია “ქართული ოცნების” გამარჯვებიდან გამომდინარეობს.
კოტე შარაშენიძე ჩვენთან საუბრის დროს არ ადასტურებს გია ცქვიტინიძესთან დაპირისპირებას: _ არანაირი დაპირისპირება არ მქონია გიასთან. მას გაუჩნდა ამბიცია. როდესაც რაღაცას ვამბობ და კომენტარს ვაკეთებ, მინდა სწორად გაიგოს ყველამ _ ადამიანს, რომელსაც ამბიცია გააჩნია, რომ გამგებელი გახდეს, მინიმუმ, თვითმმართველობის კანონი წაკითხული მაინც უნდა ჰქონდეს. “გამგებლობა მინდა” _ ეს ასე არ არის. ზვიად კვაჭანტირაძემ თუ მხარი არ დაუჭირა, რა? მას თუ უნდოდა გამგებლობა, ებრძოლა. ამ ბრძოლის მეთოდი იყო ის, რომ მისი ხედვები საკრებულოს წინაშე პროგრამის სახით დაედო, _ გვითხრა შარაშენიძემ.
