რომელმაც განაცხადა, რომ “გურია ნიუსის” მიერ ჩატარებული ჟურნალისტური მოკვლევის საფუძველზე, შესაბამისი პროცედურების გავლის შემდეგ, პატიმრობიდან გათავისუფლდა გლდანის #18 მსჯავრდებულთა და ბრალდებულთა სამკურნალო დაწესებულებაში მყოფი პატიმარი კ. ჯ.
“გურია ნიუსი” პატიმრობიდან გათავისუფლებულ კ. ჯ.-საც ესაუბრა, რომელმაც განაცხადა: “საერთოდ არ ველოდი დღეს თუ გამათავისუფლებდნენ. ეს გათავისუფლება ჩემთვის მოულოდნელი იყო. მითხრეს, თავისუფალი ხარო. ჩამსვეს “კალიასკაში” და გარეთ გამომიშვეს. ათმაგად მიხარია… დღეს, ბარბარობას გამათავისუფლეს, ყველაფერი უფლის ნებაა”…
“გურია ნიუსი” თვეზე მეტია აქვეყნებს სტატიებს გლდანის #18 მსჯავრდებულთა და ბრალდებულთა სამკურნალო დაწესებულებაში მყოფ პატიმარ კ. ჯ.-ზე, რომელიც 14 ოქტომბერს თურქეთიდან ჩამოვიდა და ქართველ სამართალდამცავებს ჩაბარდა. სამედიცინო დასკვნების მიხედვით, იგი სიმსივნის მეოთხე სტადიით არის დაავადებული.
2012 წლის 30 ოქტომბერს, “გურია ნიუსის” ვებგვერდზე გამოქვეყნდა სტატია სათაურით “გთხოვთ, მისცეთ ჩემს მეუღლეს ოჯახში სიკვდილის უფლება!” _ სტატიაში საუბარი იყო გლდანის #18 მსჯავრდებულთა და ბრალდებულთა სამკურნალო დაწესებულების ქირურგიულ განყოფილებაში 14 ოქტომბერს შეყვანილ პატიმარზე, რომელიც სიმსივნის მძიმე ფორმით არის დაავადებული. სამედიცინო დასკვნაში, რომელსაც ხელს აწერს მედიცინის დოქტორი, #18 მსჯავრდებულთა და ბრალდებულთა სამკურნალო დაწესებულების ქირურგიული განყოფილების ონკოლოგი თეიმურაზ ქემოკლიძე, ვკითხულობთ: “ავადმყოფს ჩაუტარდა მუცლის ღრუსა და გულ-მკერდის ღრუს კომპიუტერული ტომოგრაფიული კვლევები… ტომოგრაფიული მონაცემებით უდგინდება მარცხენა ფილტვის კიბო, მეტასტაზები თირკმელზედა ჯირკვალში, ელენთაში, მუცლის წინა კედელში (დაწყლულებით) და ლიმფურ კვანძებში. ზოგადი მდგომარეობა მძიმეა, გამოხატულია სიმსივნური ინტოქსიკაცია. დაავადება IV სტადიისაა, პაციენტი მიეკუთვნება IV კლინიკურ ჯგუფს”. პატიმრის მეუღლე, საქართველოს პრეზიდენტს მიხეილ სააკაშვილს და საქართველოს სასჯელაღსრულების, პრობაციისა და იურიდიული დახმარების საკითხთა მინისტრს სოზარ სუბარს თხოვდა, მის მეუღლეს შემსუბუქებოდა სასჯელი და საკუთარ სახლში სიკვდილის უფლება მიეცათ…
პატიმარი გასათავისუფლებელთა სიაშიც შეიყვანეს, მაგრამ, რატომღაც, უწყებებს შორის გავლილ პროცედურებში, მისი გვარი ამ სიიდან გაქრა, რასაც შესაბამისი პუბლიკაციაც მოჰყვა. პატიმრის მეუღლე, ამ ფაქტის გამო, 4 წლის შვილთან ერთად, შიმშილობის დაწყებას გეგმავდა: “ძალიან ცუდი მდგომარეობა აქვს. მარჯვენა ფეხს საერთოდ ვერ ამოძრავებს. 4 ადგილას სხეულზე მეტასტაზები აქვს გამოსული. პერიოდულად აქვს სისხლდენა, სუნთქვა უჭირს და ძლივს ლაპარაკობს. ასე მითხრა: რატომ უნდათ ციხეში მოვკვდე, ვერ გავიგე, რას მიკეთებენო. დღეს ძალიან გაღიზიანებული იყო. ერთსაათიანი პაემანი გვქონდა, მაგრამ ნახევარ საათზე მეტი ვერ გაჩერდა. ცუდად გახდა. ვინ ამოიღო ჩემი ქმარი სიიდან, ამაზე პასუხი ვერავინ გამცა…” _ ამბობდა პატიმრის მეუღლე.
დღეს კი, პატიმარ კ. ჯ.-ს სასჯელი გადაუვადდა და პატიმრობიდან გათავისუფლდა.
