“გურია ნიუსის“ ინფორმაციით, გურიის სამხარეო მთავარ სამმართველოში დიდი საკადრო ცვლილებები გახორციელდა და რაიონული სამმართველოების უფროსების დანიშვნის ბრძანებაც ამ კვირაში იქნება.
ლანჩხუთის პოლიციის უფროსად ლანჩხუთელი გოჩა ჟღენტი დაინიშნა. მან ამ პოსტზე ირაკლი შავიშვილი შეცვალა. შავიშვილი კი, რომელიც ლანჩხუთის პოლიციის უფროსად რამდენიმე თვის მანძილზე მუშაობდა, გურიის სამხარეო მთავარ სამმართველოში უბნის რწმუნებულად დაინიშნა.
ლანჩხუთის რაიონული სამმართველოს უფროსის მოადგილე დავით იმნაძე დეტექტივად გადაიყვანეს. კიდევ ერთი მოადგილე ლევან ჩხაიძე კი, დავით იმნაძის ადგილზე დანიშნეს, ლევან ჩხაიძის ადგილზე კი ლანჩხუთელი გია ბოლქვაძე დაინიშნა. ლანჩხუთის პოლიციაში კიდევ რამდენიმე საკადრო ცვლილება გახორციელდა. უბნის რწმუნებულების განყოფილების უფროსი ვენე კეჭაყმაძე დეტექტივად გადაიყვანეს, მისი ადგილი კი, ჯერჯერობით, ვაკანტურია. ლანჩხუთის რაიონული სამმართველოს სუფსის განყოფილების უფროსად პაატა ნოზაძე ინიშნება, რომელიც აღნიშნულ განყოფილებაში უბნის რწმუნებული იყო.
ოზურგეთის რაიონული სამმართველოს უფროსად წარმოშობით შემოქმედელი ალექსანდრე ჭანუყვაძე ინიშნება, რომელიც აქამდე შინაგან საქმეთა სამინისტროს კადრების განყოფილებაში მუშაობდა. მისი ერთ-ერთი მოადგილე ოზურგეთის პოლიციის ყოფილი უფროსი ეროდი გორდელაძე, ხოლო მეორე მოადგილე ლანჩხუთის პოლიციის უფროსი ტარიელ ცერცვაძე იქნება. ეს ორი კადრი ადრე ბახმაროს გახმაურებულ სკანდალურ მიწების ფაქტებს გადააყოლეს. ისინი, დიდხანს მუშაობდნენ გურიის სამხარეო მთავარ სამმართველოში სხვადასხვა თანამდებობებზე.
ურეკის განყოფილების უფროსად კი ნატანებელი ნიკა ქარჩავა ინიშნება, რომელიც პატრულის თანამშრომელი იყო, ის ამ პოსტზე უჩა ჩაგუნავას შეცვლის.
ჩოხატაურის პოლიციის უფროსად გია დოლიძე დაინიშნა, მისი ერთ-ერთი მოადგილე ჩოხატაურელი ზაზა დოლიძე, მეორე კი მალხაზ მამალაძე იქნება. ზაზა დოლიძე ყოფილი ძალოვანის გია ურიდიას ახლობელია. მოადგილე გოჩა თავაძე კი, დეტექტივის თანაშემწედ გადაიყვანეს.
ჩოხატაურის პოლიციის უფროსი გია დოლიძე “გურია ნიუსთან” აღნიშნავს, რომ ჯერ ისევ ფოთში მუშაობს უფროსის მოადგილედ.
_როგორ გითხრათ, ჩემი დანიშვნა გადაწყეტილი იქნება მაშინ, როცა ვნახავ ბრძანებას. ბრძანება კი ამ კვირაში იქნება, რომელსაც ხელს შინაგან საქმეთა მინისტრი ირაკლი ღარიბაშვილი აწერს.
_ბატონო გია, როგორც ვიცი, უკვე თქვენი მოადგილეები დანიშნულია. . .
_ როცა დავინიშნები, მაშინვე გაძლევთ ინტერვიუს, მე თქვენთან ურთიერთობის არანაირი პრობლემა არ მექნება, -გვითხრა დოლიძემ.
ლანჩხუთის პოლიციის უფროსი გოჩა ჟღენტი „გურია ნიუსთან“ ადასტურებს მის დანიშვნას და მოადგილეების შეცვლას.
ალიკა ჭანუყვაძე, ჩვენი ინფორმაციით, ოზურგეთის რაიონული სამმართველოს უფროსი იქნება და მისი დანიშვნის შესახებ ოფიციალური ბრძანება ამ კვირაში დაიწერება. ჭანუყვაძე „გურია ნიუსთან“ ხაზგასმით აღნიშნავს, რომ მას არ აქვს უფლება პრესასთან კომენტარი გააკეთოს, თუმცა მისი და მოადგილეების დანიშვნის შესახებ ინფორმაცია, ფაქტობრივად, დაადასტურა.
_ არ მაქვს უფლება, გავაკეთო კომენტარი, უნდა მიმართოთ პრესსამსახურს, ჩვენ კანონმორჩილი ხალხი ვართ, – გვითხრა ჭანუყვაძემ.
ინფორმაციის დასაზუსტებლად, „გურია ნიუსი“ გურიის სამხარეო მთავარი სამმართველოს უფროსს ზაზა პეტრიაშვილს დაუკავშირდა.
_ ბატონო ზაზა, როგორც ვიცით, უკვე დანიშნული არიან გურიის სამხარეო სამმართველოში სამივე რაიონული სამმართველოს უფროსები და მათი მოადგილეები. რაიმე ცვლილება თუ არის მოსალოდნელი?
_ ჯერჯერობით, დანიშნულია მხოლოდ ლანჩხუთის რაიონული სამმართველოს უფროსი გოჩა ჟღენტი. ოზურგეთისა და ჩოხატაურის რაიონული სამმართველოების უფროსების, ადგილი ჯერ ვაკანტურია.
_ როგორც ვიცით, მათი ვინაობაც გადაწყვეტილია.
_ ჯერ არაფერი არ არის გადაწყვეტილი, გადაწყვეტილი იქნება მაშინ, როცა ბრძანებები დაიწერება.
_ ანუ შეიძლება ისევ შეიცვალოს?
_ თქმა უნდა, _ გვითხრა პეტრიაშვილმა.
