ამ მოთხოვნით გამგებლობის ყოფილი კანდიდატი დავით ჩხაიძე ხელმოწერებსაც აგროვებს. ქვეყნის დიდ ქალაქებში რამოდენიმე დღეა განახლდა აქციები მიხეილ სააკაშვილის საპრეზიდენტო უფლებამოსილების შეწყვეტის მოთხოვნით, რასაც დღეიდან ლანჩხუთიც შეუერთდა. უამინდობის მიუხედავად, კოალიცია “ქართული ოცნების” ერთი ჯგუფი, ძირითადად, რომან ბიწაძის მხარდამჭერები, სპეციალურ ბლანკებში მსურველთა ხელმოწერებს აფიქსირებენ.
დავით ჩხაიძეს თავდაპირველად ლანჩხუთის გამგებლობა სურდა, მაგრამ მას შემდეგ, რაც საკონკურსო-საატესტაციო კომისიამ, გარკვეული მოტივით, უარი უთხრა საბუთების მიღებაზე, იგი პოლიტიკური ბრძოლის სხვა მეთოდებზე გადავიდა _. ჩხაიძე აცხადებს, რომ იმ ორგანიზაციის რეგიონული კოორდინატორია, რომელიც მთელი ქვეყნის მასშტაბით ატარებს კოორდინირებულ აქციებს პრეზიდენტის გადადგომის მოთხოვნით.
ამ აქციის პარალელურად, ლანჩხუთის ცენტრალურ პარკში იმავე მოთხოვნით, კიდევ ერთი საპროტესტო გამოსვლა გაიმართა. ამ მცირე აქციის ორგანიზატორი “თავისუფალი დემოკრატების” ლანჩხუთის ორგანიზაციის ხელმძღვანელი ელგუჯა ჩხაიძე აღმოჩნდა, თუმცა იგი ამბობს, რომ ეს არ არის მისი პარტიის მიერ გამართული პოლიტიკური ქმედება: “აქ მოსული არიან საზოგადოების წარმომადგენლები, რომლებიც გამოხატავენ თავიანთ უკმაყოფილებას იმის გამო, რომ პრეზიდენტი თვითნებურად იგრძელებს საპრეზიდენტო მმართველობის ვადას,” _ ამბობს ადგილობრივი პოლიტიკოსი.
“გურია ნიუსის” შეკითხვას, რატომ ტარდება ორი სხვადასხვა აქცია ერთი და იმავე მოთხოვნით, ამავე პოლიტიკური ორგანიზაციის წევრი ვახტანგ ზენაიშვილი ასე პასუხობს: “მართალია, ამ ორი აქციის ერთი-ერთი მოთხოვნა შინაარსობლივად იდენტურია, მაგრამ გამგეობის წინ მყოფი ჯგუფი, როგორც ვიცი, შენობის პიკეტირებას და შიგ შეჭრასაც გეგმავს. ჩვენ კი ამას ხაზგასმით ვემიჯნებით. მეც და ჩემი თანამოაზრეებიც კატეგორიულად ვგმობთ ძალადობის გამოვლენის ნებისმიერ მცდელობას.”
პარკში გამართული აქციაც არ გამოირჩეოდა ხალხმრავლობით, მაგრამ მას არ აკლდა ხმამაღალი პოლიტიკური გარჩევები. ლანჩხუთის მაჟორიტარი დეპუტატის თემურ ჩხაიძის მხარდამჭერი და გუნდის წევრი ნუგზარ ცინცაძე, “ცანცუა”, რომელსაც ლანჩხუთელები ამ მეტსახელით უფრო იცნობენ, ხმაურიანი გარჩევებითაა ცნობილი. როგორც კოალიციის წევრები ამბობენ, იგი ხშირად თვითნებურად ესწრება კოალიციის შტაბში გამართულ შეხვედრებსა და მოლაპარაკებებს. ნუგზარ ცინცაძე, როგორც აღმოჩნდა, იმითაა უკმაყოფილო, რომ ადგილობრივი პოლიტიკოსები არ ითვალისწინებენ დეპუტატის შეხედულებებს და მასთან შეთანხმებას ვერ ახერხებენ. დეპუტატის აქტიური და ცოტა არ იყოს, აგრესიული მხარდამჭერი ღიად ადანაშაულებდა იქ მყოფ ლიდერებს ფარულ გარიგებებში. ნუგზარ ცინცაძე, იგივე “ცანცუა” (მის მეტსახელს მხოლოდ იმიტომ ვუსვამთ ხაზს, რომ ლანჩხუთის პოლიტიკაში არის კიდევ ერთი ნუგზარ ცინცაძე, რომელიც აქტიურად იყო ჩაბმული წინასაარჩევნო შეხვედრებში), მიიჩნევს, რომ ყველა ლანჩხუთელი პოლიტიკოსი _ ელგუჯა ჩხაიძე, სოსო ბოლქვაძე, რომან ბიწაძე ერთ თამაშს თამაშობს და ფარულად ცდილობს გადამწყვეტ თანამდებობებზე თავიანთი კანდიდატები გაიყვანონ. მისი თქმით, საკრებულოს თავმჯდომარეობის კოალიციის კანდიდატი დავით წულაძეა, ხოლო გამგებლად მათ რომან ბიწაძე სურთ.
“თავისუფალი დემოკრატების” ადგილობრივი ლიდერი ელგუჯა ჩხაიძე ამბობს, რომ ნუგზარ ცინცაძის ნათქვამი არც ერთი სიტყვა სიმართლეს არ შეეფერება.
_ ბატონო ელგუჯა, ნუგზარ ცინცაძე დეპუტატის მიმართ გამოვლენილ უნდობლობასა და არაკეთილგანწყობაში გადანაშაულებთ. იგი საუბრობს, აგრეთვე, ფარულ გარიგებებსა და მოლაპარაკებებზე, რომლებსაც თითქოს კოალიცია აწარმოებს რევაზ ჩიტიძესთან…
_ ეს მისი პირადი აზრია და არაფერი აქვს საერთო სიმართლესთან. მას ეჩვენება, რომ ყველა თემურ ჩხაიძის პირადი მტერია და მხოლოდ ინტრიგებითაა დაკავებული. 2012 წლის 23 მარტს კოალიციის გაერთიანებულ შეხვედრაზე, თბილისში, როცა მკითხეს თემურ ჩხაიძის შესახებ აზრი, ვთქვი, რომ იგი ყველაზე ღირსეული კანდიდატი იქნებოდა ლანჩხუთიდან. ამის შესახებ შეგიძლიათ ჰკითხოთ პარლამენტის ფრაქცია “თავისუფალი დემოკრატების” თავმჯდომარეს ირაკლი ჩიქოვანს. რაც შეეხება რევაზ ჩიტიძეს, რითაა იგი უფრო ცუდი საკრებულოს თავმჯდომარე, ვიდრე იქნება მაკა კვირკველია? ეს არ ნიშნავს იმას, რომ ჩვენ რამე ფარულ გარიგებაში ვართ ჩიტიძესთან, მაგრამ სანამ რეალურად არ ჩატარდება თვითმმართველობის არჩევნები და ხალხი არ გადაწყვეტს, ვინ იქნება საკრებულოში, დეპუტატი ვერაფერს შეცვლის.
