დღეს ის ოკუპაციის მუზეუმში შეკრებილ ჟურნალისტებს და უფლებადამცეველებს მისი დაკავების რეალურ მიზეზებზე ესაუბრა. წითელაშვილი ამბობს, რომ სააკაშვილის წინააღმდეგ იქამდე იბრძოლებს, ვიდრე ეს უკანასკნელი თანამდებობას არ დატოვებს და პასუხს არ აგებს ჩადენილი დანაშაულობების გამო.
გენერალი წითელაშვილი 2008 წლის 26 აგვისტოს დააკავეს. თავიდან მას სახელმწიფო გადატრიალების მომზადების აღიარებას სთხოვდნენ, ბოლოს კი ნარკოტიკული დანაშაულისთვის გაასამართლეს: “დამაკავეს 2008 წლის აგვისტოს მოვლენებთან დაკავშირებით, რადგან ვიყავი საომარი მოქმედებების მონაწილე და ვფლობდი ბევრ ინფორმაციას.
საქართველოს შეიარაღებულმა ძალებმა ცხინვალის მიმართულებით ცეცხლი გახსნა 7 აგვისტოს ღამის 12 საათზე. პარალელურად, დილის 4 საათზე, დავიწყეთ სახმელეთო შეტევა. 8 აგვისტოს, მივიღეთ ბრძანება, რომ დაგვეტოვებინა ჩვენს მიერ კონტროლირებადი ტერიტორიები _ ცხინვალი და მისი მიმდებარე სოფლები. 9 აგვისტოს, სოფელ ნიქოზიდან წამოვედი შტაბში, რადგან ვხედავდი, რომ იქმნებოდა საკმაოდ არაორგანიზებული ვითარება. პარტიული და ნათესაური ნიშნით დანიშნული ბრიგადის და ბატალიონების მეთაურების მხრიდან ადგილი ჰქონდა ქაოსურ ქმედებას. არაორგანიზებულად მიმდინარეობდა როგორც შეტევის, ასევე, ქალაქიდან გამოსვლის პროცესი. მივედი შტაბში, რათა მშვიდობიანი მოსახლეობის ევაკუაციის მიზნით ხელმძღვანელობისთვის მეთხოვა რეზერვისტების დახმარება, რომლებიც ამ დროისთვის სკოლებსა და კლუბებში ჰყავდათ მოთავსებული.”
წითელაშვილი იხსენებს, რომ ხელმძღვანელობის მოლოდინში ერთ-ერთ ოთახში შევიდა და დაღლილს მალე ჩაეძინა. ის ხმაურმა გამოაღვიძა და უნებურად გახდა მაღალჩინოსნების საუბრის მოწმე: “ოთახში იმყოფებოდნენ გიგი უგულავა, გიგა ბოკერია და გოკა გაბაშვილი, რომლებმაც გადაწყვიტეს, რომ უნდა მომხდარიყო მშვიდობიანი მოსახლეობის ჩატოვება, რათა ყოფილიყო მაქსიმალური მსხვერპლი, როგორც მშვიდობიან მოსახლეობაში, ასევე, სამხედრო ძალებში. გამოვედი ოთახიდან, შევხვდი გენერალ ბუცხრიკიძეს და ვთხოვე დახმარება, რათა მოსახლეობის სასწრაფო ევაკუაცია დაწყებულიყო. ომის დასრულების შემდეგ, ხელისუფლების მხილება დავიწყე. ვთქვი, რომ გორსა და ცხინვალში განვითარებულ მოვლენებზე პასუხი მთავარსარდალ სააკაშვილს უნდა ეგო. რამდენიმე დღეში კი დამაპატიმრეს”
გენერალი წითელაშვილი ერთ-ერთია იმ პოლიტპატიმრებს შორის, ვინც პრეზიდენტის მიმართ იმპიჩმენტის დაწყების მოთხოვნას ხელი მოაწერა.
გათავისუფლებული პოლიტპატიმრები 20 აინვარს, ავლაბრის რეზიდენციასთან დაგეგმილ “ღირსების შეკრებასაც” დაესწრებიან, სადაც აქციის მონაწილეები სააკაშვილის პრეზიდენტობის საკონსტიტუციო ვადის დასრულების შესახებ გააკეთებენ განცხადებას.
