ამიტომ ჩათრევას ჩაყოლა ამჯობინეს და დეპუტატს საკუთარი კანდიდატის გაყვანაზე თითქმის ასპროცენტიანი თანხმობა განუცხადეს.
თუმცა, სანაცვლოდ მათაც აქვთ მოთხოვნები, რომელთა შესრულების პირობას დებენ დეპუტატიც და გამგებლობის უკვე უალტერნატივო კანდიდატი ზაზა ურუშაძეც. კოალიციის წარმომადგენელთა მთავარი მოთხოვნა ასე ჟღერს: ზაზა ურუშაძემ მათი მხარდაჭერის სანაცვლოდ, აუცილებლად უნდა დაასაქმოს კოალიციის ყოფილი კოორდინატორები და აქტივისტთა ნაწილი. ეს მოთხოვნა თავდაპირველად “ქართული ოცნების” “კარდაკარის” პროგრამის მონაწილემ შოთა ფირცხალაიშვილმა გაახმოვანა _ ის და მისი მეუღლე “კარდაკარში” იღებდნენ მონაწილეობას, მაგრამ ხელფასები დღემდე არ მიუღიათ. როგორც თავად ფირცხალაიშვილი ამბობს, იგი კუთვნილ ხელფასს აღარც ელოდება, მაგრამ მისთვის უფრო მნიშვნელოვანია ის ხალხი, რომლებიც მან მიიყვანა წინასაარჩევნო გადამწყვეტ ბრძოლაში: _ ეს თოთხმეტი ადამიანი დღესაც დაუსაქმებელია. მათ, ფაქტობრივად, თავი გაწირეს ამ საქმისთვის და ამაში ერთი თეთრიც არ აუღიათ. მე არ ვითხოვ არაფერს, მაგრამ მათი დასაქმების პირობას კი ველოდები თქვენგან, _ მიმართა შოთა ფირცხალაიშვილმა მომავალ გამგებელს.
ზაზა ურუშაძე დაპირებებს გულუხვად გასცემდა, თუმცა, როგორ აპირებს ამდენი უმუშევრის მხოლოდ საჯარო სექტორში დასაქმებას, ძნელი ასახსნელია. შეიძლება ითქვას, რომ მას არც კერძო ბიზნესი და მასთან დაკავშირებული ნიუანსები დავიწყებია. ურუშაძემ კიდევ ერთი “ხმამაღალი” პირობა დადო _ დაეხმარება ყველა მსურველს დაბალპროცენტიანი სახელმწიფო სესხების აღებაში. ეს სესხები კი, როგორც მომავალმა გამგებელმა განმარტა, მხოლოდ სოფლის მეურნეობისა და მცირე ბიზნესის გასავითარებლად გაიცემა.
შეხვედრამდე რამდენიმე დღით ადრე, კოალიციის შტაბში კიდევ ერთი შეხვედრა გაიმართა, რომლის შესახებ ჟურნალისტებისთვის მხოლოდ ახლა გახდა ცნობილი _ თბილისიდან ჩამოსულმა სტუმარმა, კერძოდ, კოალიციის გურიის რეგიონის კოორდინატორმა ბესო ღვინიაშვილმა მთავარი საბჭოს გზავნილი ჩამოიტანა ლანჩხუთში: “რესპუბლიკელები” მხოლოდ იმ შემთხვევაში დათანხმდებიან ზაზა ურუშაძის გამგებლობას, თუ მოადგილედ რომან ბიწაძე დაინიშნებაო.
რომან ბიწაძე, ჩვენთან სატელეფონო საუბარში აცხადებს, რომ მანაც ღვინიაშვილიდან გაიგო ეს ამბავი და ამ თემასთან დაკავშირებით პარტიის ლიდერებთან საუბარი არ ჰქონია _ იგი თბილისში მიემგზავრება “რესპუბლიკური პარტიის” ეროვნული კომიტეტის მორიგ სხდომაზე დასასწრებად და ალბათ უკან დაბრუნებულს უფრო მეტი ინფორმაცია ექნება მედიისთვის.
დღეს უკვე ყველა თანხმდება იმაზე, რომ ძალიან მალე ლანჩხუთის გამგებლის ვაკანტურ თანამდებობას ზაზა ურუშაძე დაიკავებს, ხოლო მისი მოადგილე, ნუგზარ ცინცაძის წინააღმდეგობის მიუხედავად, რომან ბიწაძე დაიკავებს.
