_ ბატონო უჩა, ბოლო ერთი კვირის მანძილზე დასავლეთ საქართველოს თითქმის ყველა რეგიონში იმყოფებოდით. რა უნდა გაკეთდეს იმისთვის რომ რეგიონებში არსებული მდგომარეობა გამოსწორდეს?
_ ძირითადად საუბარი იყო სოციალურ პრობლემებზე. ვფიქრობ, თვითმმართველობასა და მოსახლეობას შორის ნაკლები კომუნიკაცია არსებობდა. თუნდაც სახალხო დამცველს, არასამთავრობო ორგანიზაციებსა და მოსახლეობას შორის. ჩვენ გვინდა მოსახლეობასთან შეხვედრას რეგულარული სახე მიეცეს. მთავარია, თვითმმართველობებს მეტი უფლებები მიენიჭოს. ძალიან ბევრი პრობლემაა, რომელიც მოსახლეობას აწუხებს. ეს საკითხები შეიძლება ადგილზეც გადაწყდეს. აუცილებელი არ არის ამისთვის ცენტრალური ხელისუფლების შეწუხება, მაგრამ სისტემა ისეა მოწყობილი, გარკვეულ პრობლემებს აჩენს. რეგიონებს უნდა მივცეთ მეტი უფლებები, ადგილზე გადაწყვიტონ გარკვეული საკითხები. მე დავინახე, რომ ამის მოთხოვნა არის საზოგადოებაში. ამას სჭირდება პოლიტიკური ნება, ამისკენ გარკვეული ნაბიჯები უნდა გადაიდგას. მაქსიმალური დეცენტრალიზაცია და მეტი უფლებები მიენიჭოს თვითმმართველობებს.
_ გაფართოვდება თუ არა რეგიონებში სახალხო დამცველის ოფისები?
_ გვინდა რეგიონებში არსებული ჩვენი ოფისების ფუნქციის გაძლიერება. აქამდე ჩვენი რეგიონული ოფისები კონკრეტულ ფაქტებზე რეაგირებას ვერ ახდენდა. კონკრეტულ საქმეებს თბილისში აგზავნიდნენ და აქ ხდებოდა რეაგირება. ეს პრაქტიკა მალე შეიცვლება. ქუთაისიდან დავიწყებთ. შემდეგ სხვა რეგიონებში გადავალთ. ზუგდიდში, ბათუმში. გვინდა სახალხო დამცველის წარმომადგენელი გვყავდეს გურიაში, სვანეთში, კახეთში. და ამაზე უკვე ვიწყებთ მუშაობას. ჩვენს ოფისებს, კონკრეტულ ფაქტებზე, ადგილზე შეეძლებათ რეაგირება. ისინი არ იქნებიან მხოლოდ შუამავლის როლში.
_ თქვენ რეკომენდაციით მიმართეთ სასჯელაღსრულების პრობაციის და იურიდიული დახმარების სამინისტროს პატიმრებისთვის კომუნიკაციის გაფართოების თხოვნით. რა პასუხი მიიღეთ სამინისტროდან?
_ დადებითი პასუხი მივიღეთ. იმისთვის რომ ეს რეკომენდაციები განახორციელონ გარკვეული დრო სჭირდებათ. ისინი გვეთანხმებიან, რომ ციხის ევროპული წესების თანახმად, პატიმრებს უფლება აქვთ მიიღონ საინფორმაციო არხები. ეს პრობლემა არ დგას რამდენიმე დაწესებულებაში. მაგრამ მე-7 და მე-8 საპყრობილეში ეს პრობლემა არსებობს. საკითხთან დაკავშირებით მუშაობა მიმდინარეობს. გარკვეული პერიოდის მერე კვლავ შევეხიანებით და შევამოწმებთ, რამდენად შესრულდა ეს რეკომენდაცია. თუმცა მათ ითხოვეს გარკვეული დრო, რომ საკითხი მოგვარდეს.
_ ბოლო პერიოდში დაკავებული მაღალი თანამდებობის პირების მიმართ ხომ არ ყოფილა ზეწოლის, ან დაშანტაჟების ფაქტები?
_ არც ერთი დაკავებული მაღალი თანამდებობის პირისგან ზეწოლაზე საუბარი არ ყოფილა. პირიქით, საუბრობენ, რომ კარგ პირობებში იყვნენ. პრობლემა არ ჰქონიათ. ამასთან დაკავშირებით მათგან საჩივარი არ ყოფილა.
_ შსს-ს და თავდაცვის ყოფილ მინისტრს, ბაჩო ახალაის პრეტენზიები ხომ არ აქვს ციხის ადმინისტრაციასთან?
_ მას ერთადერთი პრეტენზია ჰქონდა – საინფორმაციო არხებზე წვდომა. იგი საკმაოდ ნორმალურ პირობებშია.
_ ბოლო პერიოდში, ყველაზე ხშირად რეკომენდაციით რომელ უწყებას მიმართავთ და ითვალისწინებენ თუ არა თქვენს რეკომენდაციებს?
_ ვერ ვიტყვი, რომ ასეთი უწყება ერთია. მივმართეთ სხვადასხვა უწყებას. ერთ-ერთი რეკომენდაცია ეხებოდა შეზღუდული შესაძლებლობის პირების დასწრებას სასამართლო პროცესებზე. თბილისის საქალაქო სასამართლოდან პასუხი მივიღეთ, რომ ისინი გაითვალისწინებენ სახალხო დამცველის რეკომენდაციას. რეალურად, საქმე ეხებოდა შენობის გადაკეთებას, ინფრასტრუქტურის ისე მოწყობას, რომ შეზღუდული შესაძლებლობის პირებს სასამართლო დარბაზში დაბრკოლების გარეშე გადაადგილების საშუალება მიეცეთ… სხვადასხვა უწყებებიდან სხვადასხვა პასუხია, თუმცა გამომდინარე იქედან, რომ 2 თვე არ არის, რაც სახალხო დამცველი ვარ, უწყებებში სულ რამდენიმე რეკომდაციაა გაგზავნილი. ზოგი შესრულებულია, ნაწილთან დაკავშირებით ველოდებით კონკრეტულ პასუხს.
_ რამდენად ხშირად ხვდებით საქართველოს პრემიერ-მინისტრს და ითვალისწინებს თუ არა იგი თქვენ რჩევებს ქვეყანაში მიმდინარე პროცესებთან დაკავშირებით?
_ მე ჯერ არ მქონია შეხვედრა პრემიერ-მინისტრთან, ვაპირებ შევხდე და ვისაუბროთ საკითხებზე.
