ორი დღეა, რაც კოორდინატორებს და ქვეკოორდინატორებს ხელფასს შტაბის ადმინისტრაციის კოორდინატორი ზურაბ ნინუა ურიგებს, რამაც ყოფილი შტაბის უფროსის, რევაზ ხაბეიშვილის აღშფოთება გამოიწვია.
რევაზ ხაბეიშვილი: “შტაბის უფროსი მე ვიყავი, ხელფასებთან დაკავშირებით რამდენჯერ ჩემი ხარჯით ჩავედი თბილისში, რამდენჯერ მოთხოვნა გავაგზავნე. ბოლოს სიები კიდევ ერთხელ გადავაგზავნე და ახლა ხელფასი ზურაბ ნინუამ ჩამოიტანა, თან, რაც მთავარია, მას ფული ხელზე ჰქონდა და არავინ იცის, საიდან მოიტანა ეს თანხა, ამ გაურკვევლობამ ეჭვი დაბადა “ოცნების” აქტივისტებში _ ხალხი ამბობს, რომ ჩვენი ხელფასები ყოფილ მაჟორიტარ კანდიდატს, ირაკლი საბულუას ჰქონდა აღებული და ახლა თანხის ნაწილი ნინუას ხელით დააბრუნაო. მეც ასეთი ეჭვი გამიჩნდა. რატომ მაინც და მაინც ნინუა? ის ხომ ამასწინათ რეზიდენციასთან იყო და საქართველოს მოქალაქეობის დატოვებით იმუქრებოდა? მე უკვე გავგზავნე განცხადება დავით საგანელიძის და მანანა კობახიძის სახელზე, სადაც დაწვრილებით მაქვს აღწერილი ჩემი მოსაზრებები და ეჭვები. რომ არ დაურიგოს ყველა კოორდინატორს ხელფასი, ხომ ისევ მე მომთხოვენ? მაინც ვერ გავიგე, თუ მე შტაბის უფროსი ვიყავი, რატომ არავინ ჩამაყენა საქმის კურსში?”
“გურია ნიუსი” ზურაბ ნინუასაც დაუკავშირდა.
– ბატონო ზურაბ, ხელფასებს თქვენ არიგებთ?
– დიახ, ორი დღეა დავიწყეთ ხელფასების დარიგება. თითოეულ კოორდინატორთან სახლში მივდივართ, ხელს ვაწერინებთ და კუთვნილ თანხას ვაბარებთ. სულ 35 000 ლარია გამოგზავნილი, ამხელა თანხას მარტო ხომ არ გავიტანთ სოფლებში? ამიტომ პოლიციის თანამშრომლები დაგვყვებიან. თუმცა, უნდა ვთქვა, რომ შტაბის უფროსის მიერ გადაგზავნილ სიებში ბევრი უზუსტობა ვნახეთ. უკვე 8 ადამიანია აღმოჩენილი, რომელსაც საერთოდ არ უმუშავიათ და სიაში არიან. 5 ადამიანი პირველ უბანზე ჰყავდათ ქვეკოორდინატორებად გაფორმებული, მაგრამ რომ დავურეკეთ, აღმოჩნდა, რომ ისინი ზანათში ცხოვრობენ და საერთოდ არ მიუღიათ წინასაარჩევნო პროცესებში მონაწილეობა. 3 ადამიანს სოფლის კოორდინატორი არც კი იცნობს და რომ ვკითხეთ, სიაში საიდან აღმოჩნდნენ,-თქო, გვითხრეს რეზო ხაბეიშვილმა ჩაგვაწერინაო. ასე რომ, თუ ფინანსური დაინტერესება არ აქვს ხაბეიშვილს, რა მნიშვნელობა აქვს ვინ დაარიგებს ხელფასს? მთავარია, იმ ადამიანებმა, რომლებმაც მართლაც დაუღალავად იშრომეს, კუთვნილი ანაზღაურება მიიღონ.
– თქვენ გვარი ფიგურირებდა “ჩანერგილთა” სიაში. როგორ აღმოჩნდა თქვენს ხელში ხელფასები, და როგორ გენდოთ კოალიცია?
– ვიცოდი, რომ სიმართლე გაირკვეოდა. მე ნამდვილად ყველაფერი გავაკეთე “ქართული ოცნების” გამარჯვებისთვის და არასდროს მქონია რამე საერთო “ნაციონალურ მოძრაობასთან”. ყველა ტელეარხით თუ საგაზეთო ინტერვიუთი ყოველთვის ვითხოვდი კოორდინატორებისთვის კუთვნილი ხელფასების დარიგებას. ალბათ, სწორედ ამიტომ დამირეკეს “ქართუ ჯგუფიდან” და მე მომცეს ამ ადამიანების ხელფასები. რაც შეეხება იმ გაუგებრობას, რომ მე “ჩანერგილი” ვიყავი, გაარკვიეს სიმართლე. უბრალოდ, აფექტის მდგომარეობაში შეიძლება ადამიანმა ბევრი რამ თქვას. მათ არასწორი ინფორმაცია ჰქონდათ, თან, როგორც “ქართუ ჯგუფში” მითხრეს, ეს ბრალდებები პიროვნულად არ თქმულაო. რაც მთავარია, სიმართლე გაირკვა და მე ვფიქრობ, რომ ხელფასის ჩემთვის ჩაბარებით ნდობა გამომიხატეს და გააქარწყლეს ის ბრალდებები.
– აბაშაში ჭორი დადის, ხელფასები მაჟორიტარობის კანდიდატმა, ირაკლი საბულუამ აიღო, მერე, როცა ყველა მედია საშუალებით გავრცელდა ინფორმაცია, რომ თანხა არ იყო აქტივისტებამდე მისული და მოთხოვნა ოფიციალურად დაფიქსირდა, საბულუა და ნუნუა ერთმანეთს შეხვდნენ და სწორედ ნინუას ხელით დააბრუნა მაჟორიტარობის კანდიდატმა გაუჩინარებული თანხის ნაწილიო. სხვათაშორის, ამ ეჭვს შტაბის ყოფილი უფროსიც, რევაზ ხაბეიშვილიც გამოთქვამს და უმრავლესობის ლიდერსაც მიმართა განცხადებით. ხაბეიშვილი იმასაც ამბობს, რომ თქვენ არანაირი საბუთი არ გაგაჩნიათ, რომ ეს თანხა ნამდვილად კოალიციიდან მიიღეთ.
– მე ეს თანხა “ქართუ ჯგუფიდან” მიღება-ჩაბარების აქტით მაქვს წამოღებული. არ ვიცი, ვის სჭირდება ასეთი ჭორის და სიბინძურის აგორება. ირაკლი საბულუას რა ხელი აქვს ამ ფულთან? როგორ არ ეშინია ღმერთის სამსჯავროსი ამის მთქმელს? სრული პასუხისმგებლობით ვაცხადებ _ საბულუა კარგა ხანია არ მინახავს და ვისაც სურვილი აქვს, გადაამოწმოს “ქართუ ჯგუფთან”, ან პირადად მოვიდეს ჩემთან, რომ მიღება-ჩაბარების აქტი ვაჩვენო. ხაბეიშვილის ბევრ საქმეზე ვმუშაობ და სწორედ თქვენ იქნებით პირველები, ვისაც ამ ინფორმაციას გადავცემ. ისე კი, მინდა ვისარგებლო ამ ინტერვიუთი და ყველას მოვუწოდო, დაამთავრონ მითქმა-მოთქმა და ხელს ნუ უშლიან სხვას მუშაობაში.
– აბაშაში იმასაც ამბობენ, რომ თქვენ გამგებელთან გარიგება დადეთ და საფინანსო განყოფილების უფროსობა მოითხოვეთ. თანხმობის შემდეგ კი აქციები შეწყვიტეთ და “ოცნების” წინააღმდეგ გაილაშქრეთ.
– ენას ძვალი არა აქვს. მთავარია, ღმერთთან და საკუთარ თავთან იყო მართალი. სიმართლე უკვე გაირკვა ჩემი “ჩანერგილობის” შესახებ. მე გამგებელი არც მინახავს. ის მაინც ეთქვათ, საკრებულოს თავმჯდომარესთან დადისო. კი, მასთან სამჯერ ვიყავი და თუ საჭიროა კიდევ ათასჯერ მივალ. საქმე იმაშია, რომ ჩემი მეზობლის, კალაძეების ოჯახის ორივე შვილი სასწრაფო ოპერაციას საჭიროებს და მე ვიყავი საკრებულოს თავმჯდომარესთან მოთხოვნით, დაეხმაროს ამ ბავშვებს _ ცხვირის ოპერაციას რომ აფინანსებენ, საკრებულომ ეს გაჭირვებული ბავშვები დააფინანსოს. სად იყო არჩევნები, მე რომ ყველას ვეხმარებოდი? გაიკითხეთ და სხვები გეტყვიან, უხერხულია და არცაა საჭირო კეთილი საქმის აფიშირება. რაც შეეხება იმას, რომ მე “ქართული ოცნების” წინააღმდეგ რამეს გავაკეთებ, ეგ არასდროს მოხდება.
– თქვენ იყავით ის ადამიანი, რომელიც “ქართული ოცნება – დემოკრატიული საქართველოს” აბაშის პარტიის თავმჯდომარის კანდიდატურას აპროტესტებდით. თქვით, რომ ის ნარკომანი და კრიმინალია და პოლიტსაბჭოს გადაწყვეტილებას ეწინააღმდეგებოდით.
– მე გიორგი გვილავას არ ვიცნობდი. მასზე სხვებმა მომაწოდეს ინფორმაცია, მაგრამ იმის მერე, რაც საკუთარ თავზე განვიცადე ცრუ ბრალდებები, დავფიქრდი და გადავამოწმე ინფორმაცია. თან საქმე იმაშია, რომ ვინც მასზე მომიყვა, ის ადამიანები თვითონ აღმოჩნდნენ, რბილად რომ ვთქვათ, მატყუარები _ მათი ნათქვამი არც ერთი სიტყვა არ გამართლდა და ვიფიქრე, რაღა ეს იქნება მართალი,-მეთქი. გავიკითხე, ყველამ დადებითად დაახასიათა გვილავა. მერე გადავამოწმე ყველა მონაცემი და როცა დავრწმუნდი, რომ არ ვიყავი მასთან მართალი, მივედი და ბოდიში მოვუხადე, მე მორწმუნე ვარ და ბოდიშის მოხდის, როცა ეს საჭიროა არ მრცხვენია. მე არა მარტო გიორგის, არამედ მის ოჯახს და განსაკუთრებით დედას ვუხდი ბოდიშს და კიდევ ერთი _ მინდა ეს აუცილებლად დაწეროთ _ გიორგი გვილავას ეკლესიაში ხატის წინ მოვუხდი ბოდიშს. მე ღრმად ვარ დარწმუნებული, რომ ვინც მოღალატეობა დამაბრალა, მასაც უფალმა შთააგონა და სწორი ინფორმაცია მოაძიებინა ჩემზე _ სწორედ ხელფასების ჩემთვის ჩაბარებით აღმიდგინეს რეპუტაცია და ნდობა. აი, ამან დამაფიქრა და სწორედ ხატის წინ მოვუხდი ბოდიშს და ყველას მოვუწოდებ იგივე გააკეთოს, ვინც გიორგის, ან თუნდაც სხვა ადამიანს ცილი დასწამა. ვაპირებ მასთან თანამშრომლობას და როგორც ადრე ვაკეთებდი ყველაფერს “ოცნების” გამარჯვებისთვის, ახლაც არ დავიშურებ ძალ-ღონეს.
– პარტიაში გაწევრიანდებით?
– კი, აუცილებლად. საკმაოდ ბევრი მაქვს გაკეთებული “ოცნების” გამარჯვებისთვის და მგონი, არც პარტიის თავმჯდომარე გაიხსენებს წყენას და უარს არ მეტყვის. ისიც მორწმუნეა და მიტევების უნარიც ექნება. თუ არადა, სხვა ქალაქში წავალ და მაინც გავხდები პარტიის ღირსეული წევრი.
ჩვენ შევეცადეთ დავკავშირებოდით ირაკლი საბულუასაც, მაგრამ ვერ მოვახერხეთ, რადგან იგი რამდენიმე თვეა საქართველოში არ იმყოფება.
