_ მიდის სტანდარტულად შემოწმება _ სამუშაო პროცესი შეფერხების გარეშე. სამი ჯგუფია ობიექტზე გასული ამ წუთებში. ყველაფერი ნორმალურად, სამუშაო რეჟიმში მიდის და სიტუაციას სწავლობენ. არის რაღაც პატარა შენიშვნები, კეთდება რეკომენდაციები. თვითონ პროცესი ძალიან დადებითია.
_ ბატონო ლევან, თქვენ იყავით პირველი, რომელიც ამ დასალაგებელი ურთიერთობების სტადიაში შეხვდით რუსეთის მთავარ სანიტარს ონიშჩენკოს. საუბრებიდან და შეხვედრიდან გამომდინარე, რა შეგიძლიათ გვითხრათ _ რამდენად არის შესაძლებელი რომ რუსულ ბაზარზე ქართული ღვინო ისევ გავიდეს?
_ ვფიქრობ, რომ ნაბიჯ-ნაბიჯ მაგ მომენტს ვუახლოვდებით. პირდაპირ და შორი განცხადებებიდან კონკრეტულ სამუშაომდე მივედით და ეს ყველაფერი, ალბათ, ლოგიკურ დასასრულამდე მივა.
_ პრეზიდენტის გუშინდელი განცხადება რამდენად იყო ხელის შემშლელი ამ პროცესისთვის?
_ მე არ მომისმენია, მაგრამ ნებისმიერი განცხადება, რომელიც დაუფიქრებლად იქნება გაკეთებული, ავნებს ამ პროცესს. თქვენ იცით, რამდენად მგრძნობიარეა ეს მოლაპარაკების პროცესი. ამიტომ ფრთხილი და ზომიერი განცხადებები უფრო სწორი იქნება.
_ პრეზიდენტის განცხადებას ონიშჩენკოს კომენტარი მოყვა, რომლის თანახმად, თუკი სიტუაცია არ დალაგდება, ექსპერტები საქართველოს დატოვებენ. თქვენამდე რა სახით მოვიდა ეს განცხადება?
_ მეც პრესიდან გავიგე ეს ინფორმაცია. ყოველ შემთხვევაში, სპეციალისტებს ეს არ უთქვამთ. თქვეს მხოლოდ ის, რომ შეიძლება ანალოგიური განცხადებები იქითა მხრიდანაც გაკეთებულიყო. თუმცა, ჯერჯერობით, ჩვენ სამუშაო პროცესს ვაგრძელებთ.
_ დღეს რუსეთ-საქართველოს ეკონომიკური ურთიერთობების ცენტრმა ონიშჩენკოს წერილი გაუგზავნა. წერილს ხელს გიორგი სეთურიძე აწერს. მისი თქმით, ამ წერილის შედეგია ის, რომ ონიშჩენკო დელეგაციას არ გაიწვევს.
_ არ ვიცი, როგორ გითხრათ? ცოტა მეცინება ამაზე და კომენტარის გაკეთებაც მიჭირს. ვფიქრობ, რომ პროცესი ჩვენი მხრიდან მაღალ დონეზეა ორგანიზებული. სამუშაო პირობები აბსოლუტურად დამაკმაყოფილებელია და ამას ჩამოსული სპეციალისტებიც აღნიშნავენ, რომლებიც მუდმივ კავშირზე არიან ცენტრალურ ოფისთან. სწორედ ეს მომენტი მოქმედებს იმაზე, რომ გრძელდება შემოწმება. თორემ, მე ცოტა შორს ვარ იმ აზრისგან, რომ კერძო აქტივისტების მიერ დაწერილი წერილი პროცესებზე გავლენას ახდენდეს. მით უმეტეს, ასეთ სერიოზულ პროცესებზე.
დავითაშვილის თქმით, იმ შემთხვევაში, თუკი ხმაურიანი განცხადებები არ გაკეთდება და სიტუაციას ფრთხილად და ზომიერად მიუდგებიან, ქართული ღვინო, რუსულ ბაზარზე გაზაფხულის ბოლოს გავა.
