ეს ინფორმაცია “გურია ნიუსს” მუნიციპალიტეტის გამგეობიდან მიაწოდეს, თუმცა, ინფორმაციას სამსახურების უფროსების თანამდებობიდან წასვლის შესახებ ოზურგეთის მუნიციპალიტეტის გამგებლის მოვალეობის შემსრულებელი კოტე შარაშენიძე უარყოფს.
შარაშენიძე “გურია ნიუსთან” აღნიშნავს, რომ მას არც ერთი სამსახურის უფროსისთვის არ დაუვალებია განცხადების დაწერა.
_ სამსახურიდან წასვლის შესახებ განცხადება საკუთარი ნებით დაწერა ზედამხედველობის სამსახურის უფროსმა შუქრი გაბრიჩიძემ. ეს განცხადება დაკმაყოფილებულია.
უკვე სრულდება სამი თვე, რაც მე შევუდექი ჩემს უფლებამოსილების გახორციელებას. აქედან გამომდინარე, შემიძლია გითხრათ, რომ მაქვს ჩემი მხედველობა ამა თუ იმ საქმესთან და სამსახურთან დაკავშირებით. არიან ადამიანები, რომლებიც ვერ ამყვნენ საქმეში და ამას თავად ხვდებიან. არანაირი ზეწოლა არ ყოფილა და არც არავისთვის არაფერი არ დამივალებია. არც არანაირი რეორგანიზაცია არ მიმდინარეობს, რადგან რეორგანიზაციას აქვს თავისი წესი და პროცედურები, თუმცა, არ გამოვრიცხავ, რომ უახლოეს მომავალში საკრებულოსთან ერთად მივიღოთ ამის გადაწყვეტილება. თუმცა ეს მოხდება მაშინ, როცა შეიქმნება საატესტაციო კომისია.
არ არსებობს არც მასიურად განცხადებების დაწერის პრეცედენტი და არც ზეწოლა სამსახურიდან წასვლის შესახებ. ამ ეტაპზე თანამდებობა მხოლოდ შუქრი გაბრიჩიძემ დატოვა, _ გვითხრა შარაშენიძემ.
