ისინი ყოფილი სასაზღვრო ჯარების სარდლის უფროსის მოადგილეს, ამჟამად გარდაბნის მუნიციპალიტეტის გამგებლის მოვალეობის შემსრულებლად გელა ხუციშვილის დანიშვნას აპროტესტებენ. აქციის მონაწილეები აცხადებენ, თუ დღეს, მთავრობის კანცელარიაში პრემიერ-მინისტრი ბიძინა ივანიშვილი მათ არ მიიღებს, მის “ბიზნესცენტრში” გადაინაცვლებენ.
აქციის ერთ-ერთი მონაწილე მზია ცოფურაშვილი, რომელიც ნინო ბურჯანაძის პარტია “დემოკრატიული მოძრაობა _ ერთიანი საქართველოს” წარმომადგენელია, “გურია ნიუსთან” აცხადებს: “მე არ ვარ “ქართული ოცნების” წევრი, მაგრამ ამ რაიონის წარმომადგენელი ვარ. გარდაბანში დავიბადე, გავიზარდე და 1963 წლიდან ვმუშაობდი სოფელ ნორიოში. ახლა პენსიონერი ვარ. არაფერი არ მაწუხებს, ჩემი ოჯახში ყველა დასაქმებულია, მაგრამ მაწუხებს ჩემი რაიონის სატკივარი. მტკივა ის, რაც იქ ხდება. აქ სწორედ ამიტომ ვარ. ხუციშვილი არის არაკომპეტენტური. ნასამართლევი, უშიშროებიდან შემოგზავნილი, რომელმაც ვერ მოიგო არჩევნები გარდაბნის ქვედა ზონაში. “ქართულმა ოცნებამ” ზემო გარდაბანში არჩევნები მოიგო, მაგრამ, ხუციშვილმა ყველაფერი უკუღმა დაატრიალა. ეს იყო შემოგზავნილი ადამიანი, რომელიც ღამით მიდიოდა და პოლიცია-უშიშროებას აბარებდა ანგარიშს. ამავე დროს არ გასცა ხელფასები, ძალიან დიდი თანხა კი გამოიტანა. უღალატა მამუკა არეშიძეს. ეს პიროვნება არავითარ შემთხვევაში არ უნდა იყოს რაიონის გამგებელი.
ჩვენი მოთხოვნაა მოაცილონ ხუციშვილი გარდაბნის რაიონს. საკრებულოს წინაშე დაისვას საკითხი და რამდენიმე კანდიდატურიდან, რომელსაც ღირსად ჩათვლის დეპუტატთა რაოდენობა, რომელიც ჩვენი რაიონისთვის მისაღებ პროგრამას წარადგენს, ის უნდა იყოს მუნიციპალიტეტის გამგებელი. ამ კაცს გარდაბანთან არანაირი ურთიერთობა არ აქვს. შემოიკრიბა რამდენიმე ყოფილი “ნაციონალი”, რომლებიც როგორც სხვა რეგიონებში, აქაც გადაბარგდნენ “ოცნებაში.” ეს არის ურთულესი რაიონი. ხუციშვილმა ქართველებს და აზერბაიჯანელებს შორის ნაპერწკალი უკვე ჩააგდო.
ჩვენ, მარტყოფში 6 000-მდე ამომრჩეველი გვყავს. სართიჭალაში _ 6 000, ნორიოში _ 6 000, ჩვენი სოფლებიდან არავინ დანიშნულა არსად. ზემო სოფლელებმა ყველაფერი მოვითმინეთ მაგრამ, ხუციშვილის გამგებელობის მოთმენა აღარ შეიძლება.”
აქციის მონაწილე ლელა გოგოლაური: “ერთადერთი მოთხოვნა გვაქვს _ გელა ხუციშვილი, რომელიც გამგებლის მოვალეობის შემსრულებლად დანიშნეს, გაათავისუფლონ და დანიშნონ ვინმე ნორმალური ადამიანი, რომელიც მიხედავს გარდაბანს.
მუნიციპალიტეტის გამგებლის მოვალეობის შემსრულებელს ვედავებით იმ ძირითადი აქტივის იგნორირებას, რომელიც “ქართული ოცნების” სახელით არჩევნებში იღებდა მონაწილეობას და რომელმაც საკუთარ ზურგზე გადაიტანა არა მარტო ეს არჩევნები, არამედ ბოლო 9 წელი “ნაციონალებთან” ბრძოლაში გაატარა. ხუციშვილი ოსტატურად გეგმავს პროვოკაციებს და ათას უბედურებებს პარტიასთან მიმართებაში. ჩვენ, როგორც ცენტრში გვეუბნებოდნენ, მას არანაირი პარტიული დავალება არ ჰქონდა. მაგრამ, მაინც მოახერხა… ჩვენი შტაბის უფროსი იყო.”
“გურია ნიუსის” კითხვაზე ვისი კანდიდატურაა გელა ხუციშვილი, გოგოლური პასუხობს: “თუ არ ვცდები, როგორც შტაბის ხელმძღვანელი, გელა ხვედელიძის რეკომენდაციით მოვიდა. მაშინ გელა ხვედელიძე “ქართულ ოცნებაში” კოორდინატორი იყო.
მთელი ამ პერიოდის განმავლობაში, გელა ხვედელიძესთან ბევრი ამბები მიდიოდა. იცოდა, ვინ იყო ჩანერგილი მაგრამ, არავინ გვერდიდან არ მოუშორებია. პირიქით, ტექნიკურად ბლოკავდა. პარტიის კრება ჩაატარებინა ადამიანებს, რომლებიც “ნაციონალების” მხარეს იბრძოდნენ. დამფუძნებლები _ მე და არკადი დარსმელია სიიდან ამოგვიღეს და ვერ ვპოულობთ ჩვენს თავს.”
“გურია ნიუსის” კითხვაზე, თუ იცის შსს მინისტრის მოადგილე გელა ხვედელიძემ, რა მოხდა და რაც ხდება გარდაბანში, გოგოლაურმა გვითხრა, რომ “გელა ხვედელიძე თავზე მადგა, როცა ხელს ვაწერდი დამფუძნებლების სიას. ის, ალბათ, ვერ უარყოფს იმას, რომ სიაში ნამდვილად ვეწერე, რადგან 40-კაციანი სია ჩემი ხელით შევავსე და დავტოვე კარადაში. როდესაც “ქართული ოცნების” გარდაბნის პარტიის თავმჯდომარეს ნიშნავდნენ, გელა ხუციშვილმა გამაფრთხილა, თუ მივიდოდი კონფერენციაზე, პოლიცია გაფრთხილებული იყო და აუცილებლად ამიყვანდნენ. პროვოკაციას მომიწყობდა, რადგან, კონფერენციის დაწყებამდე დავუმტკიცე, რომ კრება არალეგიტიმური იყო და არ შეიძლებოდა მისი ჩატარება. იმ პარტიის წევრები, რომელსაც თვითონ ეძახდნენ პარტიის წევრებს, მხოლოდ 7 კაცი იყო, რომელსაც რეკომენდაციას აძლევდა ერთ-ერთ პარტიის წევრი. იქ იყო 40-ზე მეტი პარტიის წევრი, რეკომენდაციას აძლევდა ადამიანი, რომელიც საერთოდ არ იყო პარტიაში. ასევე იყო კაცი, რომელიც დამფუძნებელი იყო, მაგრამ ანკეტა პარტიის წევრობაზე შევსებული არ ჰქონდა. მე მითხრეს, რომ არ ვარ “ქართული ოცნების” პარტიის წევრი, რაც ძალიან გამიკვირდა. იუსტიციის სახლს მივმართე კითხვით. მომივიდა პასუხი, რომ იმ სიიდან მართლა ამოღებული ვყოფილვარ. რა ფორმით და როგორ, არ ვიცი. მე დღესაც მიგზავნის გელა ხუციშვილი ხალხს, მთავაზობს იმ თანამდებობას, რაც მომინდება. მაგრამ მე თანამდებობისთვის არ მიბრძოლია. ჩემი ერთადერთი მოთხოვნა იყო, შევხვედროდი მას თბილისში, “ქართული ოცნების” ოფისში რომელიმე ჭკუა საკითხავ პიროვნებასთან ერთად.”
ლელა გოგოლაურის და მზია ცოფურაშვილის ბრალდებებზე გარდაბნის მუნიციპალიტეტის გამგებლის მოვალეობის შემსრულებელი, გელა ხუციშვილი “გურია ნიუსი” ამბობს: “მე გახლავართ “ქართული ოცნების” პარტიის წევრი და ყრილობის დელეგატი. ჩვენს საზოგადოებაში ყველას აქვს აზრის გამოთქმის უფლება. გარდაბნის მუნიციპალიტეტში 110 ათასზე მეტი ადამიანი ცხოვრობს. მე პატივს ვცემ ყველა ადამიანს მოსაზრებას. თუ მათ კონკრეტულად რამეს გარკვევა სურთ, მზად ვარ დღის ნებისმიერ დროს მივიღო და ვესაუბრო. მაგრამ თუ მათ სურთ ასეთი ფორმით გამოხატონ პროტესტი, ეს უკვე მათი უფლებაა. ქალბატონი ლელა ჩემი შტაბის წევრი იყო და მან კარგად იცის, რომ ყველა “ოცნებიდან” ვიყავით.
მე გახლავართ ყოფილი სასაზღვრო ჯარების სარდლის უფროსის მოადგილე. ამდენად, როგორც სასაზღვრო რეგიონი, კარგად ვიცი ეს რაიონი. რაც შეეხება აზერბაიჯანულ მოსახლეობას, ალბათ, სიყვარულის, ურთიერთპატივისცემის და სიყვარულის ნაპერწკალი ჩავაგდე მათში. ამის დამადასტურებელია თითოეულ მათგანთან ჩემი ურთიერთობა. თქვენ ეს ურთიერთობა თუ დაგაინტერესებთ, მზად ვარ, კონკრეტული ფაქტებით და მაგალითით დაგიდასტუროთ ეს.
ადამიანს შეუძლია მოვწონდე, შეუძლია, არ მოვწონდე. მაგრამ, აქ საქმეა გასაკეთებელი. ჩემთან საუბარში ქალბატონმა ლელამ, განაცხადა, რომ იმ პერიოდში ყოფილა გაწევრიანებული “ქართული ოცნების” პარტიაში და ასახელებს დელეგატობას, როცა მე მას არ ვიცნობდი და არ ვიყავი გარდაბანში. შტაბში ჩამომიყვანა და პირადად წარმადგინა მამუკა არეშიძემ. სხვა არავინ ამ საკითხში არ ჩარეულა. რაც შეეხება სიიდან მის ამოღებას, ან პარტიაში მიღებას, ამ საკითხებთან მე არ შემეძლო შეხება მქონოდა, რადგან პარტიული ორგანიზაციის თავმჯდომარე არ ვარ. აქ ეშლება ქალბატონ ლელას. შტაბში 41 ადამიანი მყავდა. ხოლო მთლიანად 344 კოორდინატორი და ქვეკოორდინატორი იყო. ქალბატონი ლელა არის ერთადერთი, ვისაც ასეთი აზრები და შეხედულებები აქვს. რაც შეეხება ბატონ არკადის, დიდ პატივს ვცემ ამ გონიერ და შეგნებულ ადამიანს. ალბათ, მისი აზრიც დამაინტერესებს, თუ ჩემთან გამოთქვამს საკუთარ შეხედულებას. რაც შეეხება ქალბატონ მზია ცოფურაშვილს, რამდენადაც ჩემთვის ცნობილია, იგი ჩვენს აქტივში საერთოდ არ შედიოდა, “ქართულ ოცნებასთან” არავითარი კავშირი და ურთიერთობა არ ჰქონია. იგი არის ნათესავი გამგებლობის ერთ-ერთი სავარაუდო კანდიდატის, ვინმე ცოფურაშვილის,” _ გვითხრა ხუციშვილმა.
