ეს განცხადება მან დღეს სასამართლო პროცესის დაწყებისთანავე გააკეთა: “გუშინ ბადრაგს უნდა წავეყვანე თვალის კლინიკაში. დანარჩენი ბრალდებულები ჩასვეს სხვა მანქანაში. აღსანიშნავია, რომ ჩემს გადაყვანას ახდენდნენ ჩემთვის უცნობი ბადრაგები. ამოვიდა ციხის რეჟიმის უფროსი გია თოდუა და მითხრა ან აღიარებ , რომ 50 ათასის სანაცვლოდ კაცი მოკალი, ან არა შენ თავს დააბრალეო. ხუთმა ბადრაგმა დამიწყო დედის გინება, ჩამარტყეს ფეხში, ახლაც მეტყობა დაზიანება. მერე დამაყენეს ოთხზე, გამომართვეს ჩემი ყავარჯენი და მითხრეს, ამას ხომ ხედავო, თუ არ დაგვიჯერებ, წახვალ საქათმეშიო.”
პატიმარი ყურუა რომ თვალის კლინიკაში იყო გადასაყვანი, გუშინდელ სასამართლო პროცესზე გახდა ცნობილი _ მან სასჯელაღსრულების დეპარტამენტის მიერ გაცემული ცნობა წარმოადგინა, რომლის მიხედვითაც, დღის 4 საათზე ბრალდებული ოფთალმოლოგს უნდა გაესინჯა. პროცესი სწორედ ამ მიზეზით გადაიდო, თუმცა, გაურკვეველია, რატომ შეცვალა სასჯელაღსრულების სამინისტრომ გეგმა და რატომ არ გადაიყვანა პატიმარი თვალის კლინიკაში.
“წარმოდგენილი იყო სასჯელაღსრულების ექიმის მიერ გაცემული ბეჭდიანი ცნობა იმის თაობაზე, რომ 4 საათზე უნდა მომხდარიყო ყურუას ვიზიტი თვალის კლინიკაში. ეს ცნობა იყო ხელნაწერი,” _ ამბობს “გურია ნიუსთან” თბილისის საქალაქო სასამართლოს პრესსამსახურის ხელმძღვანელი ქეთი ბასილაშვილი.
მომხდარის გადამოწმება “გურია ნიუსმა” სასჯელაღსრულების მინისტრის მოადგილე არჩილ თალაკვაძესთან სცადა: “კობა ყურუა გეგმიურად მკურნალობს თვალის პრობლემასთან დაკავშირებით და ახლა გადასაყვანია თუ გადმოსაყვანი, მთავარი არ არის, მთავარია ის, რომ მას მიეწოდება სამედიცინო მომსახურება. გაყვანას გეგმავს სამედიცინო დეპარტამენტი და თუ არ გადაიყვანეს, ესე იგი არ იყო გადაყვანის ჩვენება. მე რამდენადაც ვიცი, ის ერთხელ უკვე იყო გადაყვანილი სამოქალაქო საავადმყოფოში. იქ დაესვა დიაგნოზი, დაენიშნა მკურნალობა და როდესაც გახდება საჭირო განმეორებითი კონსულტაცია, ოფთალმოლოგი ამ კონსულტაციას გაუწევს სასჯელის მოხდის ადგილზე. რაც შეეხება გუშინდელ გაყვანას, არსად არ ყოფილა გაყვანილი, შესაბამისად, არც გზაში არავის უცემია. არ ვფლობ ინფორმაციას, რომ მასზე რაიმე სახის ზეწოლა გახორციელდა. გაყვანილი გუშინ არ ყოფილა და, შესაბამისად, გზაშიც ვერ გააჩერებდნენ. იმის გადამოწმება, რომ ის არსად არ ყოფილა გაყვანილი სამედიცინო მიზნებისთვის, ძალიან იოლია.”
სასჯელაღსრულების სამინისტროს პრესსამსახურის უფროსი ირაკლი კორძაია ამბობს, რომ პატიმარმა ყურუამ თავად სცადა ბადრაგის პროვოცირება: “არ არსებობდა თვალის კლინიკაში გადაყვანის ბრძანება. წინააღმდეგობას წევდა თვითონ და ცდილობდა ბადრაგის პროვოცირებას, რის თაობაზეც შეიქმნა სპეციალური დოკუმენტაცია”.
რეალურად რა მოხდა გუშინ და სასამართლო პროცესის შემდეგ სად გადაჰყავდათ პატიმარი ყურუა, ამას გამოძიება გაარკვევს. ყურუას ადვოკატმა პროკურატურას უკვე ურჩია, დაუყოვნებლივ დაინტერესდეს პატიმრის განცხადებით.
