რა, მე არ შევდივარ იმ საზოგადოებაში ვისაც ის ბოდიშს უხდის? ეგებ ჩემთვისაც აქვს ბოდიში მოსახდელი? ჩემი ორგანიზაცია თქვენი გადაწყვეტილებების გამო კონკრეტულად დაზარალდა, იმის გამო, რომ თქვენ თავის დროზე ასეთ მხარდაჭერას უცხადებდით შარაშენიძეს. სულ არ ვღებულობ ამ ბოდიშს და, ეგებ, საზოგადოებაც არ ღებულობს ამ ბოდიშს? ოჯახაშენებულო, თუ მონანიება ახლავს ამას, მუქარანარევი ტონით ნუღარ მესუბრები!” _ ასე მიმართავს ” ეროვნული ფორუმის” ოზურგეთის ლიდერი შოთა გოგიბერიძე ოზურგეთელ “რესპუბლიკელებს”.
2 სექტემბერს, “ეროვნული ფორუმის” ოზურგეთის რაიონული ორგანიზაციის თავმჯდომარემ შოთა გოგიბერიძემ ბრიფინგი გამართა, სადაც ის ჟურნალისტებთან “რესპუბლიკელებზე”, კონკრეტულად კი ტიფო მიქატაძისა და მარინა სუნგულიას შესახებ საუბრობს. მისი განცხადებით, წინასაარჩევნო შედეგი გაცილებით უკეთესი იქნებოდა, რომ “რესპუბლიკელების” მხრიდან კოალიციის შიგნით არსებული ვითარების დაძაბვა და საზოგადოებაში უარყოფითი ფონის შექმნა არ ყოფილიყო.
“თითქმის წელიწადნახავარია, “ეროვნულ ფორუმი” თანამშრომლობს კოალიცია “ბიძინა ივანიშვილი _ ქართულ ოცნებაში” შემავალ პოლიტიკურ ძალებთან და ვერავინ იტყვის, რომ ოდესმე ჩვენი მხრიდან ადგილი ჰქონდა ამ პოლიტიკურ პარტიებთან კონფრონტაციული დამოკიდებულების მცდელობას. მეტიც, ბატონმა ბიძინა ივანიშვილმა ბატონ კახა შარტავას “გუნდურობის მასტერკლასის ჩამტარებელი” უწოდა და ჩვენც, “ეროვნული ფორუმის” რეგიონული და რაიონული ორგანიზაციები მხოლოდ ამ პრინციპებით ვხელმძღვანელობთ.
მიუხედავად ამისა, ბოლო პერიოდში გახშირდა ადგილობრივი “რესპუბლიკელებისგან” ჩემი სახელისა და გვარის სხვადასხვა ფორმით სხვადასხვა კონტექსტში ხსენება, რასაც პირადად ჩემს წინააღმდეგ და ზოგადად “ეროვნული ფორუმის” წინააღმდგე მიმართული ქმედებად ვაფასებ, როგორც მიზანმიმირთულ შავ პიარსა და ჩვენი მაღალი საზოგადოებრივი რეიტინგისა და ავტორიტეტისათვის ზიანის მიყენების მცდელობას.
2012 წლის ოქტომბრის არჩევნებამდე და შემდეგაც ჰქონდა ადგილი მსგავს ქმედებებს, მაგრამ არასოდეს მიმიცია ჩემი თავისთვის უფლება, ჩავრთულიყავი შემოთავაზებულ კონფრონტაციულ ინტრიგებში. ვფიქრობდი, რომ მოთმინებით და მათ მიმართ პარტნიორული დამოკიდებულებით საფუძველს ჩავყრიდი შიდაკოალიციურ ჯანსაღ ურთიერთობებსა და ურთიერთპატივისცემის გარემოს, თუმცა როგორც ჩანს, ჩემმა კეთილშობილურმა ჟესტმა შედეგი არ გამოიღო, ისინი ზუსტად იმ რეჟიმში აგრძელებენ საქმიანობას, როგორ რეჟიმშიც განვლილ პერიოდში იყვნენ. კერძოდ, მიუხედავად ” ნაციონალური მოძრაობის ტოტალიტალურ ხელისუფლებასთან სამკვდრო-სასიცოცხლო დაპირისპირებასა ღია კონფრონტაციაში იყვნენ “თავისუფალ დემოკრატებთან” და პიროვნულ დაპირისპირებაში მის ადგილობრივ ლიდერთან, რითაც ჩვენი ჩვენი კოალიციის შიგნით არსებული ვითარების შესახებ საზოგადოებაში უარყოფით ფონს ქმნიდნენ, ხელს უწყობდნენ ჩვენს მიმართ “ნიჰილისტურ” დამოკიდებულების დანერგვას, მთელი პასუხისმგებლობით ვაცხადებ _ რომ არა მსგავსი ურთიერთობები, საარჩევნო შედეგი გაცილებით უკეთესი იქნებოდა, რის თაობაზეც არაერთხელ ჩავაყენე საქმის კურსში მაშინ ჯერ კიდევ მაჟორიტარობის კანდიდატი ზვიად კვაჭანტირაძე.
ბოლოს, საზოგადოებასა და პოლიტიკური პარტნიორების საყურადღებოდ ვაცხადებ _ არაფერი გამიკეთებია და არაფერს გავაკეთებ ისეთს, რომ ტიფო მიქატაძისა და მარინა სუნგულიას მსგავსად, ჩემი ოზურგეთელებისთვის ბოდიშები მქონდეს სახდელი. ვმოქმედებდი და ვიმოქმედებ ჩემი ხალხის სიყვარულით, ჩემი პოლიტიკური გაერთიანების შიდა პარტიული დისციპლინით, ქვეყნის უკეთესი მომავლისათვის,” _ განაცხადა შოთა გოგიბერიძემ.
მარინე სუნგულიას კომენტარს ამ თემაზე რამდენიმე წუთში შემოგთავაზებთ.
