მოქალაქეები ითხოვენ, შეწყდეს თბილისის ბაღ-პარკების გასხვისება, თანამდებობიდან გადადგეს თბილისის გამწვანების სამსახურის უფროსი გიორგი ქორქაშვილი, რადგან სწორედ მისი ხელმოწერით იჩეხება დედაქალაქში ხეები. მოქალაქეები აპროტესტებენ იმასაც, რომ სანიტარული ჭრის ნებართვა საღ ხეებზეცაა გაცემული უკანონოდ.
“მთელ თბილისში დღე არ გავა, ბაღ-პარკები არ გაიჩეხოს. ერთი კვირის წინ გაიჩეხა იპოდრომი, შემოღობილია რამდენიმე სკვერი და იქ რა საქმიანობა მიმდინარეობს, არავითარი აბრა არ არსებობს ამის შესახებ. ეს არის თბილისელების ეკოციდი და თუკი საკრებულო თავის ფუნქციას არ შეასრულებს და თბილისელთა ჯანმრთელობაზე არ იზრუნებს, ჩვენ ჩავთვლით, რომ ის ჩვენი სიცოცხლის ხარჯზე გაურიგდა “ნაციონალურ მოძრაობას”. საკრებულომ თვალის ასახვევად შემოიარა გაჩეხილი ბაღ-პარკები, თუმცა, შედეგს ჩვენ თვითონ ვხედავთ, რომ არ არის”, _ აცხადებს აქციის ორგანიზატორი ლაშა ჩხარტიშვილი.
“ქვეყანაში კატასტროფული ეკოლოგიური მდგომარეობაა. რაც გავაცნობიერეთ და ჩავებით ამ პრობლემის მოგვარებაში, შოკირებულები ვართ, იმიტომ რომ მართლა ვდგავართ ეკოლოგიური კატასტროფის წინაშე. იჩეხება ხეები წავკისის, კოჯრის ტყეებში, ასათიანის ქუჩაზე, დიღმის მასივში. მთავრობას სძინავს _ რატომღაც ვერ ხვდება პრობლემის სიმძიმეს. არადა აუცილებელია, შეჩერდეს ეს გრანდიოზული მშენებლობები, რაც საფრთხეს უქმნის გარემოს. ჩვენც უფრო უნდა ვიაქტიუროთ. თუ მოსახლეობამ არ ამოიღო ხმა, უპასუხისმგებლო და დანაშაულებრივ პოლიტიკას არაფერი შეაჩერებს”, _ ამბობს ასათიანის ქუჩის მაცხოვრებელი მარიკა ჩიქოვანი.
აქციის სხვა მონაწილეები მთავრობას დაპირებებს ახსენებენ და მათგან დაუყონებლივ რეაგირებას მოითხოვენ.
ნიკოლოზ წიქარიძე: “ქართული ოცნება” დაგვპირდა, რომ რესურსების რაციონალური ათვისება იქნებოდა, მაგრამ ამის გარდა, ყველაფერი ხდება _ ნადგურდება კულტურული და ბუნებრივი ძეგლები. არის პეტიციები, აქციები, მაგრამ ყურს არავინ იბერტყავს. მე შედეგი მაინტერესებს, როგორც მოქალაქეს და შედეგი არ დგება. ამიტომ ვთვლით, რომ კონსტიტუციის ფარგლებში უფრო რადიკალურ ფორმებზეც უნდა გადავიდეთ”.
სანდრო შანიძე: “ვაპროტესტებ იმ პოლიტიკას, რომ ყველაფრის გასხვისება შეიძლება და რომელიც “ნაციონალურმა მოძრაობამ” დაიწყო. ვაპროტესტებ, რომ ხდება საკუთრების უფლების ხელყოფა და რომ ეს გრძელდება ახალი მთავრობის პირობებშიც. ვითხოვთ, დამკვიდრებული პოლიტიკა შეცვალოს ხელისუფლებამ, რადგან ეს დამღუპველია ქვეყნისთვის”.
აქციის მონაწილეებმა საკრებულოს რეაგირებისთვის ორკვირიანი ვადა მისცეს. წინააღმდეგ შემთხვევაში, ისინი აქციების გაგრძელებას ისევ აპირებენ.
