ჩვენთან კომენტარი გააკეთა ოზურგეთის საკრებულოს თავმჯდომარემ ავთანდილ სურგულაძემ და დეპუტატმა მერაბ მჟავიამ.
ავთანდილ სურგულაძე, ოზურგეთის მუნიციპალიტეტის საკრებულოს თავმჯდომარე: _ პირველად იყო რაღაც ემოციები, შემდეგ დაწყნარდა სხდომა, ძალიან ნორმალურად ჩაიარა ყველაფერმა, საკრებულოში ხმაური სულ უნდა იყოს _ ეს ჯანსაღი პროცესია. ბოლოს მოხდა ცუდი ფაქტი _ სიტყვა ითხოვა დიმიტრი კვერღელიძემ, რომელმაც კოტე შარაშენიძეს უთხრა, უწყებათაშორისმა კომისიამ შეაჩერა პროცესი, თორემ შენი პასუხისმგებლობის საკითხი დადგებოდა, ბევრ კითხვებზე მოგიწევს პასუხის გაცემაო. მთლად ზუსტად სიტყვები არ მახსოვს, შინაარსი ასეთი იყო. დიმას გამოსვლის გამო, იჭარბა ემოციებმა კოტეში, თავი ვეღარ შეიკავა და მიმართა ცუდი სიტყვებით, თუმცა არ უხსენებია “ვირთხა“, უთხრა კორუმპირებული ხარ, ყოველთვის რაღაცას კირკიმალობ და ეძებ, იძახი, დაგიჭერ, მოდი, საქმე გააკეთე თუ შეგიძლიაო. ამის შემდეგ მეც ვთხოვე, გაჩერებულიყო და შემოვიყვანე ოთახში. იმ პერიოდში მოხდა მჟავიასთან დაკავშირებული ინციდენტი ანუ ამ ფაქტის მომსწრე მე არ ვყოფილვარ. უშუალოდ როგორ შეუშალა ხელი, არ დამინახავს. ვიდეოსიუჟეტი ვნახე და თუ ხელი შეუშალა, არასწორია, არ უნდა შეეშალა ხელი. თუმცა, იყო საქმიანი საკრებულოს სხდომა და სამწუხაროა, რომ ასეთი ინციდენტი მოხდა.
_ ამის შემდეგ თქვენ გქონდათ მერაბ მჟავიასთან საუბარი?
_ არა, არ მქონია, არ შევხვედრივარ, _ გვითხრა სურგულაძემ.
მერაბ მჟავია, საკრებულოს დეპუტატი: _ არაფერი ხელშეშლა არ ყოფილა , იყო შემთხვევით ხელის გადაფარება იმ სიტუაციაში.
_ რატომ?
_ მიზეზი არ იყო არაფერი, შემთხვევითობამ განაპირობა, არც სასწაული არ ყოფილა არაფერი, ისეთი არგადასაღები. მოკლედ, უნებლიედ მოხდა ეს ყველაფერი. აქ გამიზნული არაფერი ყოფილა. რატომ ვეცდებოდი იმის დამალვას, რაც არაა დასამალი. იყო ელემენტარული პაექრობა, როგორიც ყოველთვის არსებობდა და იარსებებს; იყო საუბარი საქმის კეთებაზე. კოტე ძალიან მაგრად, ენერგიულად აკეთებს საქმეებს, კაცურად და მოლოდინსაც გადააჭაარბა, ბევრი ვერ შეედრება. მან შეძლო იმაზე ასჯერ მეტი, ვიდრე წარმოგვედგინა, საქმის მკეთებელს ახლავს ასეთი შური, თორემ უსაქმურს არ გააკრიტიკებს ვინმე _ მოლაყბეს არც ოპონენტი არ ჰყავს. მე პირადად მინახავს ის დილის 7 საათზე კაბინეტში, როგორ დათენებია თავზე. ჩექმებით და უნიფორმით დარბის, მანქანაში უდევს, რომ ძებნა არ დასჭირდეს. არც დიმასთვის მიუყენებია პიროვნული შეურაცხყოფა, პირდაპირ უთხრა, ნუ იჩხრიკები ჩემს გაკეთებულ საქმეებში, ხელს ნუ მიშლი, თუ გსურს, მოდი და საქმე აკეთეო.
_ თუ რაიმე ისეთი არ იყო, რატომ არ გინდოდათ, რომ გადაეღოთ ჟურნალისტებს?
_ არაფერი არ ყოფილა დასამალი მაქ. უბრალოდ შეიძლება რაღაც მომენტში ჩათვალო, რომ სახალხოდ არ იყო გამოსატანი. მოხდა შემთხვევით ხელის მიფარება ვიდეოკამერაზე. მე ბოდიშს ყოველთვის მოვუხდი ჟურნალისტს, იმიტომ, რომ იგი ყოველთვის მართალი., თუ რაიმე საწყენი იყო, ბოდიშს მოვიხდი. მთავარია. რომ გამიზნულად არაფერი არ გამიკეთებია და პიროვნული არაფერი არ დამიფიქსირებია.
