გიორგი მარგველაშვილი ფოთსა და აბაშაში ადგილობრივ მოსახლეობას შეხვდა და წინასაარჩევნო პროგრამის პრიორიტეტები გააცნო. კოალიციის კანდიდატი საზოგადოებას რეგიონალური განვითარებისა და ინფრასტრუქტურის მინისტრმა დავით ნარმანიამ და ფოთის მაჟორიტარმა დეპუტატმა ეკა ბესელიამ წარუდგინეს.
საპარლამენტო უმრავლესობის წევრის ეკა ბესელიას განაცხადებით, ის დარწმუნებულია რომ როგორც შარშან, ასევე 27 ოქტომბერს ფოთელები ღირსეულ არჩევანს გააკეთებენ კოალიციის საპრეზიდენტო კანდიდატის სასარგებლოდ. “ფოთი განსაკუთრებული როლის და ფუნქციის მატარებელი ქალაქია. დარწმუნებული ვარ, გიორგი გახდება ფოთელების რჩეული, ის ყველას პრეზიდენტი იქნება,” _ განაცხადა ბესელიამ.
კოალიციის საპრეზიდენტო კანდიდატის გიორგი მარგველაშვილის განცხადებით სამეგრელოში ფოთი და აბაშა სტრატეგიულად მნიშვნელოვანი ქალაქებია. ფოთის ადგილმდებარეობა, თვითონ მისი დაკავშირება ინფრასტრუქტურულ არტერიებთან ამ ქალაქს საგანგებო მნიშვნელობას ანიჭებს. სამეგრელოში ბოლო წლების განმავლობაში, ისევე როგორც სხვა რეგიონებში ბევრი პრობლემა დაგროვდა. ადგილობრივი მოსახლეობის დიდი ნაწილი უმუშევარია. კოალიცია ეტაპობრივად მოაგვარებს არსებულ პრობლემებს.
“გრძელდება ის პოლიტიკური კურსი, რომელიც კოალიცია “ქართულმა ოცნებამ” ერთი წლის წინ დაიწყო. პოლიტიკური სტაბილიზაციის ფონზე საქართველოში ეკონომიკა გაძლიერდება, ჩამოყალიბდება ისეთი სამართლებრივი ქვეყანა, სადაც სახელმწიფო აღარ დაჩაგრავს საკუთარ მოქალაქეებს და აღარ მოხდება პოლიციური სისტემის აღორძინება,” _ განაცხადა გიორგი მარგველაშვილმა.
კოალიციის საპრეზიდენტო კანდიდატი დღეს სენაკში ასევე შეხვდა შეზღუდული შესაძლებლობის მქონე პირებს და მათ არსებული პრობლემების მოგვარებას დაპირდა.
(R)
