_ ხშირად საუბრობენ იმის შესახებ, რომ ამომრჩეველთა სიაში ბევრი უზუსტობაა. კონკრეტულად გეტყვით, რომ სიებში ბევრი გარდაცვლილის გვარი დაფიქსირდა. ასევე, ისინიც, ვინც ფაქტობრივად იმ ოჯახებში არ ცხოვრობენ…
_ გუშინ შემოვიდა “დემოკრატიული მოძრაობა – ერთიანი საქართველოს” პრეზიდენტობის კანდიდატ ნინო ბურჯანაძის ოზურგეთის შტაბის ხელმძღვანელ თამარ ნადირაძის განცხადება სიებთან დაკავშირებით. აღმოჩნდა, რომ ამომრჩეველთა სიაში შეტანილია ასეულობით ადამიანი, რომელიც არ წარმოადგენს რეალურ მცხოვრებს და იმ კონკრეტულ მისამართზე ოჯახის წევრები არ ფლობენ არანაირ ინფორმაციას.
კანონი განსაზღვრავს, რომ საარჩევნო რეგისტრაცის მქონე პარტიას, საარჩევნო ბლოკს აქვს უფლება გადაამოწმოს სიები და უზუსტობის აღმოჩენის შემთხვევაში არჩევნებამდე არაუგვიანეს 16 დღისა უნდა მოემართა საოლქო საარჩევნო კომისიისთვის. ეს ყველა ვადა გასულია, მაგრამ ჩვენ მაინც პირადად გადავამოწმეთ სოფელი დვაბზუ. აღმოჩნდა, რომ ეს ადამიანები არის ყველა დვაბზუს მცხოვრებლები. მაგალითად: ჯაფარიძე ნაზი, ეს არის ჩემი მეზობელი, რომელიც ბრეგვაძის მეუღლეა და უბანში მას ნაზი ბრეგვაძით იცნობენ. რაც მთავარია ჩაწერილია სოფელ დვაბზუში. კიდევ ერთი ფაქტის მოყვანა შემიძლია – გობრონიძე ერეკლე, გობრონიძე ნანა, გობრონიძე ნიკოლოზ – ერეკლე და ნანა არის ნიკოლოზ გობრონიძის შვილები, რომლებიც ცხოვრობენ რამდენი წელია ბათუმში, მაგრამ ისინი ჩაწერილები არიან სოფელ დვაბზუში. არიან ისეთებიც, რომლებიც ვიღაცამ ვერ იცნო, მაგრამ ეს იმას არ ნიშნავს, რომ ისინი არ უნდა იყვნენ ამომრჩეველთა სიაში. აქვე მინდა გითხრათ, რომ უბნიდან მოსული განცხადების საფუძველზე სიიდან 121 გარდაცვლილი ამოვიღეთ, 161 ადამიანს საზღვარგარეთ მყოფის სტატუსი მიეწერა.
სრული პასუხისმგებლობით ვაცხადებ, წინა არჩევნებზე მოვიდა 42 911 ამომრჩეველი. არ ყოფილა არც ერთი ფაქტი, რომ ვინმე მოსულიყო და ეთქვა – სიაში არ ვარო. იგივე სია გვაქვს. რა თქმა უნდა, არის ცოტა ცვლილებები, ამოღებულია გარდაცვლილები და ასევე, საზღვაგარეთ წასულები. ყველა ადამიანი არის სიაში და არანაირი პრობლემა არ არსებობს.
_ რამდენად აქტიური არიან პოლიტიკური პარტიის წარმომადგენლები? 2012 წლის საპარლამენტო არჩევნების დროს ისინი ძალიან აქტიურები იყვნენ და ხშირად მოგმართავდნენ სხვადასხვა დარღვევის შესახებ. ახლა რა მდგომარეობა ამ კუთხით?
_ ახლაც აქტიურად მუშაობენ. ჩვენ მზად ვართ მათ ყველა კითხვას გავცეთ პასუხი.
_ როგორც ჩვენთვის არის ცნობილი, ყველაზე მეტი განცხადება ნინო ბურჯანაძის საარჩევნო შტაბს აქვს შემოტანილი…
_ ნაწილს საჩივარს დავარქმევთ და ნაწილს კი განცხადებას. კი გეთანხმებით. უფრო მეტ აქტიურობას იჩენს ნინო ბურჯანაძის შტაბი. ჩვენ ყველა მათ მოწერილ განცხადებაზე და საჩივარზე გვაქვს შესაბამისი რეაგირება. ახლა მიმდინარეობს მოკვლევა მათ მოწერილ განცხადებაზე, სადაც წერია, რომ გიორგი მარგველაშვილის წინასაარჩევნო შეხვედრაზე ოზურგეთის მუნიციპალიტეტის საკრებულოსა და გამგეობის საჯარო მოხელეების დასწრებას ორგანიზებას უწევდა ამავე საკრებულოს თავმჯდომარე ავთანდილ სურგულაძე და საკრებულოს თანამდებობის პირი მერაბ მჟავია. ასევე, შეხვედრაზე წინასაარჩევნო აგიტაციის მიზნით, სურგულაძის უშუალო მოთხოვნით, ოზურგეთის მუნიციპალიტეტის დაფინანსებაზე მყოფმა ანსამბლმა “შვიდკაცამ” იმღერა. ნინო ბურჯანაძის შტაბის წევრები მოითხოვდნენ შემდეგს: შეისწავლეთ ზემოთაღნიშნული ფაქტები და დააკისრეთ კანონით გათვალისწნებული პასუხისმგებლობა იმ პირებს, რომელთა ქმედებებშიც გამოიკვეთა საარჩევნო კანონმდებლობის დარღვევის მიზნით.
_ და რა ეტაპზეა ამ განცხადების განხილვა?
_ მიმდინარეობს მოკვლევა. შესაბამისი გადაწყვეტილება იქნება მიღებული და თანაც, ძალიან მალე.
_ 17 ოქტომბერს სოფელ ლიხაურში ნინო ბურჯანაძის სარეკლამო ბანერი ჩამოხსნეს…
_ შემოსული იყო განცხადება, მაგრამ კანონის შესაბამისად პლაკატების ჩამოხევასთან დაკავშირებით ადგილობრივი თვითმმართველობის ორგანოები აკეთებენ შესაბამის რეაგირებას და ჩვენც ეს განცხადება, რომელიც ნინო ბურჯანაძის შტაბიდან შემოვიდა, ოზურგეთის მუნიციპალიტეტის გამგეობაში გადავგზავნეთ.
_ წელს რამდენიმე საარჩევნო უბანზე ახალი თავმჯდომარეები დაინიშნა…
_ დიახ, რამდენიმე უბანზე, მაგრამ ჩვენ სათანადო ტრენინგებიც ჩავატარეთ. ყველა მათგანი გადამზადდა და იმედი მაქვს, რომ ისინი დაკისრებულ საქმეს თავს გაართმევენ და არჩევნები დარღვევების გარეშე ჩაივლის.
