სეზონის გახსნამდე ახალდანიშნულმა სამხატვრო ხელმძღვანელმა, ვასილ ჩიგოგიძემ ჟურნალისტებთან პრესკონფერენცია გამართა და განაცხადა, რომ სეზონის გახსნას თეატრალური კვირეული მოჰყვება. ამ დროის განმავლობაში, მაყურებელს საშუალება ექნება, ხუთი სპექტაკლი ნახოს. ასევე, კვირეულში ფარგლებში დაგეგმილია ერთი პრემიერაც.
“ოზურგეთის თეატრი შეიძლება ისე ინტესიურად ვერ დგამდა სპექტაკლებს, მოგეხსენებათ ჩვენი მატერიალური-ტექნიკური ბაზა, მაგრამ სპექტაკლების სიმცირეს ნამდვილად არ განიცდიდა. ყველას მადლობა მინდა გადავუხადო, რომ თეატრი გაჩერებული არ იყო.
ოთხი თვის განმავლობაში ოთხ ახალ სპექტაკლზე ინტესიურად ვიმუშავებთ. ასევე, სეზონის განმავლობაში რეჟისორი ოთარ კუტალაძე ერთ სპექტაკლს შემოგვთავაზებს. ამასთან, ვგეგმავ, რომ ამავე სეზონის განმავლობაში მაყურებელს ჩემი რეჟისორობით დადგული სპექტაკლიც წარვუდგინოთ. სეზონის განმავლობაში დაგეგმილია მაღალკვალიფიციური რეჟისორების მოწვევაც,” _ განაცხადა ჟურნალისტებთან საუბრის დროს ვასილ ჩიგოგიძემ.
მისივე თქმით, ყველა ცნობილი რეჟისორის ჩამოყვანას ვერ შეძლებს. თუმცა, ჩიგოგიძე პირობას დებს, რომ მომავალი 4 წლის განმავლობაში 12 რეჟისორი ოზურგეთის თეატრში სპექტაკლს აუცილებლად დადგამს.
“ამ სეზონზე გაჩვენებთ ერთს ყველაზე დიდი მეტრის და ერთს ყველაზე საინტერესო ახალგაზრდა რეჟისორის სპექტაკლს და ეს არ გადააცილებს აგვისტოს თვეს. თუ მოვახერხებ, ამ სეზონში თემურ ჩხეიძეს დავადგმევინებ სპექტაკლს, მომავალ სეზონში კი რობერტ სტურუას მოვიწვევთ. დანარჩენ დეტალებზე ახლა ვერ ვისაუბრებ, აუცილებლად უნდა დაველოდოთ სიურპრიზებს,” _ თქვა სამხატვრო ხელმძღვანელმა “გურია ნიუსთან” საუბრის დროს.
ვასილ ჩიგოგიძემ ასევე განაცხადა, რომ მისი დიდი სურვილია დადგას “ანტიგონე”, სადაც ზურაბ ცინცქილაძე და რუსკა მაყაშვილი ითამაშებენ.
