“პირველადი თავდაცვის ობიექტები უნდა აღიმართოს იქ, სადაც უფრო რეალურია საფრთხე. ძირითადი რესურსი არ უნდა დახარჯულიყო თბილისის გამაგრებისთვის. პრეზიდენტმა იცრუა, როცა განაცხადა, თითქოს გენშტაბს ესაუბრა.
ეს რომ სიმართლე იყოს, მაშინ ეცოდინებოდა, რომ ამ საკითხზე იმუშავა სპეციალისტებისგან შემდგარმა სპეციალურმა კომისიამ. სწორედ ამ კომისიის მუშაობის შედეგად გამოვლინდა ის ეფექტური პროექტები, რომლებიც ბოლომდე იქნა მიყვანილი და დღეს ემსახურებიან ქვეყნის თავდაცვას. კომისიამ შეისწავლა და გამოავლინა ის პროექტები, რომელთა ეფექტურობაც უფრო ნაკლები იყო და კი არ შეჩერდა, არამედ დააკონსერვა, რადგან როცა ქვეყანას აქვს მცირე რესურსი, ყოველი თეთრი უნდა იყოს მიზანმიმართულად გახარჯული. როცა იქნება ამის საშუალება, დაკონსერვებული პროექტებიც განხორციელდება. არასწორია, როცა ქვეყნის პრეზიდენტი, მთავარსარდალი დგას კამერების წინ საიდუმლო ობიექტებთან. ნორმალური მთავარსარდალი ამას არ გააკეთებდა.
მაქვს წინადადება, შეიქმნას ნდობის ჯგუფი, რომელიც შეისწავლის თბილისის გარშემო თავდაცვითი ნაგებობების მშენებლობების ეფექტურობას, მიზანშეწონილობას და თანხების განკარგვას,” _ განაცხადა სესიაშვილმა.
ჟურნალისტებთან საუბრისას პარლამენტის თავდაცვისა და უშიშროების კომიტეტის თავმჯდომარე წინასაარჩევნი კამპანიასაც შეეხო.
“ქართული ოცნების” საპრეზიდენტო კანდიდატმა პოზიტივებზე ააგო წინასაარჩევნო კამპანია. მეც მიმაჩნია, რომ არ უნდა ვიყუროთ წარსულში, საჭიროა ვიყუროთ მომავალში და ვუთხრათ ხალხს რა იქნება ხვალ, რა უნდა გაკეთდეს უკეთესი მომავლისთვის. ჩვენ რესურსები არ დაგვიხარჯავს პიარზე და ეს არის სწორი ქმედება. გვირჩევნია გავაკეთოთ და ხალხმა დაინახოს, ვიდრე ვილაპარაკოთ, თუ რის გაკეთებას ვაპირებთ, ვაპიაროთ გასაკეთებელი საქმეები და ხალხს ეჭვი გაუჩნდეს. ჩვენი მოსახლეობა ამ პერიოდის განმავლობაში იღებს ინფორმაციას უკვე გაკეთებულ საქმეებზე და უკვე რეალურად დამდგარ შედეგებზე,” _ აღნიშნა სესიაშვილმა.
შეგახსენებთ, მიხეილ სააკაშვილმა განაცხადა, რომ აგვისტოს ომის შემდეგ თბილისის გარშემო თავდაცვითი ნაგებობები აშენდა. თუმცა, მათი ამოქმედება არ ხორციელდება და როგორც მას გენშტაბის ოფიცრებმა მთავრობის წევრებზე დაყრდნობით განუმარტეს, მსგავსი ნაგებობების მშენებლობით რუსეთი ღიზიანდებაო.
