კახიშვილმა დღეს ჟურნალისტებთან საუბრის დროს განაცხადა, რომ ღარიბაშვილის კანდიდაურა სწორად იქნა შერჩეული, რადგან ყველა ის ადამიანი, რომელიც აფასებს პოლიტიკას სწორედ მას მოიაზრებდა ახალი პრემიერის პოსტზე, გარდა ამისა ის ასოცირდება ივანიშვილთან, რაც გარანტი იქნება იმისა, რომ გარკვეული პერიოდი კოალიცია შეინარჩუნებს ერთიანობას.
“ღარიბაშვილი არ მიეკუთხვენა არც ერთ პოლიტიკურ პარტიას, შესაბამისად იქნება დეპოლიტიზირებული პრემიერი, რაც საკმაოდ მნიშვნელოვანია, ყველა პარტია იქნება თანასწორუფლებიანი და თანაბარი პირობები ექნება ყველას”.
კახიშვილი შეეხო სააკაშვილის მიერ პატიმრების შეწყალების თემასაც და განაცხადა, რომ ეს ქმედება სააკაშვილს გააზრებულად აქვს გაკეთებული და მიმართულია ახალი ხელისუფლებისთვის პრობლემების შესაქმნელად.
“მაშინ როცა “ერთიანი ნაციონალური მოძრაობა” იყო ქვეყნის სათავეში, პრეზიდენტი ყველას მოუწოდებდა ნულოვანი ტოლარანტობისკენ. ყველას გახსოთ მისი ცნობილი ფრაზა – “ყველანი ციხეში”. დღეს კი ის ცვლის პოლიტიკას და ყველას შეწყალებას აწერს ხელს, რითაც პრობლემებს უქმნის ახალ ხელისუფლებას და საზოგადოებას. მაშინ, როცა ნაციონალები ამბობენ, რომ კრიმინოგენული ვითარება გაუარესდა და ამ ფონზე სააკაშვილი იწყალებს განსაკუთრებით მძიმე დანაშაულის მქონე პატიმრებს, ეს სხვა არაფერია, თუ არა საზოგადოებაში უკმაყოფილების გაღვივება ახალი ხელისუფლების მიერ, ასე თუ გააგრძელა თავისი ვადის ამოწურვამდე, დატოვებს სუბარს სავარძლის გარეშე”.
ექსპერტმა ისაუბრა სასამართლო რეფორმის აუცილებლობაზე. კახიშვილის განცხადებით, დღეს სასამართლოს არავინ ენდობა და მიესალმება პარლამენტის მიერ ვეტოს დაძლევას, რის შემდეგაც მოსამართლეებს დაუწესდებათ სამწლიანი გამოსაცდელი ვადა.
“სასამართლოს არავინ აღარ ენდობა. ნამდვილად არ მინდა მოსამართლეები უვადოდ იყვნენ დანიშნული. მოსამართლეებს გამოჰქონდათ განზრახ არაკანონიერი გადაწყვეტილება, ასრულებდნენ პროკურატურის ნებას და პოლიტიკურ დაკვეთებს, რა გარანტიაა ასე არ მოხდეს დღესაც? ამიტომ აუცილებელია სასამართლო რეფორმების გატარება”.
ექსპერტი აცხადებს, რომ ივანიშვილის გადასვლა საზოგადოებრივ სექტორში ნამდვილად გამოიწვევს არასამთავრობოების გაძლიერებას.
“ივანიშვილს საკმაოდ დიდი ავტორიტეტი აქვს, რომელიც არ არის თანამდებობით მოპოვებული, ავტორიტეტით მოვიდა ის და სწორედ ამიტომ ხალხში უფრო გაიზრდება მისი ნდობა, რაც შეეხება კოალიციას, ივანიშვილის ჩრდილიდან გამოსვლას ამ ეტაპზე ვერ მოახერხებს”, _ განაცხადა საუბრის დასასრულს კახიშვილმა.
