“ინაუგურაციაზე სხვა ქვეყნების პრეზიდენტების არ დასწრება, საპროტოკოლო ვადებით იყო გამოწვეული”

ინაუგურაციას სხვა ქვეყნის პირველი პირებიდან მხოლოდ ლიტვის პრეზიდენტი ესწრებოდა, რამაც გარკვეულ წევრებში წარმოშვა კითხვა – ხომ არ ნიშნავს ეს ახლადარჩული პრეზიდენტის უპატივცემულობას მისი კოლეგების მხრიდან?

საპარლამენტო უმრავლესობის ფრაქცია “ქართული ოცნების” ახალი თავმჯდომარე გია ვოლსკი ამ საკითხთან დაკავშირებით აღნიშნავს, რომ სურვილის მიუხედავად საპროტოკოლო ვადები არ აძლევდა პირველ პირებს დასწრების საშუალებას და ინაუგურაციაზე წარმოდგენილი ოფიციალური პირები იმ უფლებამოსილებით სარგებლობდნენ, რომლითაც ქვეყნის პრეზიდენტები.

“საორგანიზაციო კომიტეტმა ოფიციალური მოსაწვევები დაუგზავნა სხვადასხვა პოლიტიკური პარტიების იმ წევრებს, რომლებსაც ოფიციალური თანამდებობები უკავიათ, არეალი იყო საკმაოდ შეზღუდული, აქედან გამომდინარე ვერ მოხერხდა ყველას მიწვევა. რაც შეეხება იმას, რომ ინაუგურაციას არ ესწრებოდნენ სხვა ქვეყნების პრეზიდენტები, ეს გამოწვეული იყო საპროტოკოლო ვადებით. ქვეყნის პრეზიდენტის და პრემიერის ვიზიტები სულ ცოტა ორი თვით ადრე იგეგმება, ამ პროტოკოლის გათვალისწინებით გამოდის ჯერ კიდევ სააკაშვილს უნდა დაეგზავნა მოწვევები 17 ოქტომბრის ინაუგურაციაზე, ეს კი ყველას კარგად ესმის რომ შეუძლებელი იყო, რადგან “ნაციონალური მოძრაობის პრეზიდენტი” ამას არ გააკეთებდა. მისი ინაუგურაციაზე სხვადასხვა მიზეზებით არ დასწრებაც ნათელი გამოხატულებაა ამის და იმისაც, რომ არ სურს ქვეყანაში სტაბილიზაცია, რომელიც ასე საჭიროა ჩვენი უკეთესი მომავლისთვის. ასე რომ საორგანიზაციო კომიტეტს და თავად მარგველაშვილს პროტოკოლთან საკმაოდ აცილებული ვადები ჰქონდათ პირველა პირებთან მოლაპარაკებისა და მოწვევისთვის”.

ვოლსკომ აღნიშნა, რომ ინაუგურაციაზე დამსწრე ლიტვის პრეზიდენტი მხოლოდ ლიტვას არ წარმოადგენდა და მას საკმაოდ დიდი პოლიტიკური წონა გააჩნია, განსაკუთრებით ლიტვის სამიტის წინა პერიოდში.