“ზუგდიდის საზოგადოების უმეტესი ნაწილი მოითხოვს ზუგდიდის დადიანების ისტორიულ მუზეუმს და მის ტერიტორიას მიენიჭოს ნაკრძალის სტატუსი და გახდეს ხელშეუხებელი”.
მიქაიამ აღნიშნა, რომ საკმაოდ წინგადადგმული ნაბიჯია, როცა ადრე ტაბუდადებული თემებით, რომელზეც მხოლოდ თითო–ოროლა ადამიანი იღებდა ხმას, ახლა მთავრობა და საზოგადოების დიდი ნაწილი დაინტერესდა. “დაიცავი საქართველოს” ლიდერმა აღნიშნა, რომ ლევან ქარდავას მფარველობდა სამაგრელო-ზემო სვანეთის ყოფილი გუბერნატორი ზაზა გოროზია, რომელმაც ეს ტერიტორია ბიზნესმენს აყიდინა.
“ეკონომიკის სამინისტრომ, არველაძის მინისტრობის პერიოდში ეს ტერიტორია მუნიციპალიტეტის საკუთრებაში გადასცა, რის შემდეგაც, 2007 წელს ზაზა გოროზიამ სპეციალურად ჩამოიყვანა რუსეთიდან ლევან ქარდავა და აყიდინა ეს ტერიტორია, სადაც სასტუმროს კომპლექსის მშენებლობა იყო დაგეგმილი. ეს თავად ქარდავამაც აღიარა უკვე “ათინათთან” ინტერვიუში. მანაც აღიარა, რომ აქ სასტუმრო უნდა აშენებულიყო და გასასამართლებლად დააყოლა, კიევში არსებული დადიანების სასახლის ასლი იქნებოდა ნაგებობაო. სააკაშვილს თვალი ჰქონდა დადგმული ამ ტერიტორიაზე, ყველას ახსოვს გახმაურებული ჭადრების ჭრის წინააღმდეგ მიმართული საპროტესტო აქციები. მაშინ სწორედ ამ აქციებით შეჩერდა ეს პროცესი, მაგრამ მერე მაინც მოახერხეს გასხვისება. სწორედ ამიტომ არის საჭირო ამ ტერიტორიას ნაკრძალის სტატუსი მიენიჭოს და გახდეს ხელშუხებელი”.
წალენჯიხის მუნიციპალიტეტის მაჟორიტარი დეპუტატი “ერთიანი ნაციონალური მოძრაობიდან” ბიზნესმენი ლევან ქარდავა, რომლის მფლობელობაშია დადიანების ისტორიულ-არქიტექტურული მუზეუმის ეზოს მიმდებარედ მიწის ნაკვეთი აცხადებს, რომ ტერიტორია სამეგრელოს მაშინდელი ხელმძღვანელი პირების თხოვნით 2007 წელს აუქციონზე შეიძინა და იქ დადიანების კიევის სასახლის მსგავსი სასტუმრო უნდა აეშენებინა.
ქარდავა აცხადებს, რომ მის მიერ შეძენილი ტერიტორია არ არის მუზეუმის შემადგენელი ნაწილი. მისი თქმით, ეს არის მიმდებარე ტერიტორია, სადაც იყო “თეატრონი” და ამ ტერიტორიას მისასვლელი სტადიონის მხრიდან ჰქონდა.
“სამეგრელოს, მაშინდელი ხელმღვანელი პირები დამიკავშირდნენ და მთხოვეს ინვესტიცია განმეხორციელებინა და სასტუმრო ამეშენებინა. ეს იყო თხოვნა და არა დავალება, მე ვერავინ ვერაფერს დამავალებს. მე მათ ვუთხარი, თუ არის ადგილი გამოყოფილი, კი ბატონო ავაშენებ მეთქი. სხვათაშორის ამ მიწაში საბაზრო ღირებულებაზე მეტი – 135 ათასი დოლარის ექვივალენტი გადავიხადე ლარებში. საზოგადოების გარკვეულმა ნაწილმა მაშინაც გამოხატა პროტესტი. სანამ, საბოლოოდ მე ამ მიწის საფასურს გადავიხდიდი, ცხონებულ, აბესალომ ტუღუშს (ისტორიკოსი.ავტ) შევხვდი. ჩვენ ბევრი ვისაუბრეთ და მე მას ასეთი რამე ვუთხარი: “მე პრობლემა არ მაქვს, მეგონა, რომ ეს ზუგდიდისთვის საჭირო პროექტი იყო და თუ ამხელა აჟიოტაჟს გამოიწვევს მე ამ პროექტზე უარს ვიტყვი და იმ გადახდილ ბესაც დავკარგავ-მეთქი.” შემდეგ მივედით იმ გადაწყვეტილებამდე, რომ იქ ავაშენებდით სამ სართულიან შენობას, რომელიც უკრაინაში არსებული დადიანების სასახლის ასლი იქნებოდა. ბატონმა აბესალომმა ბოლოს მითხრა, ჯობია ეს პროექტი გაკეთდეს, ვიდრე სხვამ იყიდოს და გააკეთოს ის რაც მას მოესურვებაო. მხოლოდ ამის შემდეგ შევიძინე ეს მიწა. სხვათაშორის მინდა ვთქვა, რომ ამ ტერიტორიის გაყიდვის შესახებ ყველამ იცოდა, მუზეუმის თანამშრომლებმაც კი. და ყველამ თითქოს ეხლა გაიგო. მუზეუმის დირექტორს შორიდან ვიცნობ, მე მას დიდ პატივს ვცემ და ისიც ვიცი, რომ მას დიდი წვლილი მიუძღვის მუზეუმის შენარჩუნებაში. მაგრამ ის ვიღაცას შეცდომაში შეყავას ან ვიღაცა ამაზე რაღაც თემის აგორებას ცდილობს. მე პრინციპში არ მაინტერესებს. ვიცი, რომ სამართლებრივად ყველაფერი წესრიგშია. ვიღაცას სერიოზულ შეცდომაში შეჰყავს საზოგადოება”, _ განაცხადა ბიზნესმენმა რადიო “ათინათისთვის” მიცემულ ინტერვიუში.
