სამუშაოების შესრულებაზე მილიონ ცხრაასიათას-ლარიანი ტენდერი იყო გამოცხადებული, რომელიც აღნიშნულმა ფირმამ მოიგო. ხელშეკრულების თანახმად, “ტერექსს” სამუშაოები მიმდინარე წლის 4 დეკემბრისთვის უნდა დაესრულებინა.
მიუხედავად ამისა, ლანჩხუთის საკრებულოს ინფრასტრუქტურის კომისიის თავმჯდომარე მერაბ წილოსანი ამბობს, რომ ფირმას სამუშაოების 30%-იც კი არა აქვს შესრულებული.
“ხელშეკრულებით შპს-მ სამუშაოები მიმდინარე წლის ოთხ დეკემბერს უნდა დაასრულოს. მილიონზე მეტის ტენდერი აქვს მოგებული და ამ დროს ფირმის ხელმძღვანელობა პასუხისმგებლობას სრულიად არ გრძნობს. გასაგებია, რომ თუ გადააცილებს დროს, გადაიხდის ჯარიმას, მაგრამ საქმეც ესაა: ამ ფირმისთვის ჯარიმის გადახდა პრობლემას არ წარმოადგენს, გადაიხდის ჯარიმას და მერე გააგრძელებს სამუშაოებს. თუმცა, აქ საკითხავი ისაა, დეკემბერში დაგებული ასფალტი იქნება ხარისხიანი? ჩვენ ჯარიმის გადახდა კი არ გვაინტერესებს, ჩვენ გვაინტერესებს ფირმამ ხელშეკრულებით აღებული პაუსიხსმგებლობა შეასრულოს და ჩვენმა მოსახლეობამ ასფალტირებული გზით ისარგებლოს,” _ ამბობს წილოსანი “გურია ნიუსთან”.
აღნიშულ საკითხთან დაკავშირებით კომენტარი ვთხოვეთ საკრებულოს თავმჯდომარე ამირან გიგინეიშვილსაც.
“საუბარია ხუთი ქუჩის ასფალტირებაზე. “ტერექსი” ნამდვილად ვერ ასრულებს ხელშეკრულებით დაკისრებულ მოვალეობას. ფირმამ მოიგო ტენდერი, გაფორმდა ხელშეკრულება, მაგრამ შესაძლოა ითქვას, რომ სამუშაოები არცკი დაწყებულა. ერთი-ორი გრეიდერი გადაატარეს და ეგ იყო სულ. ფირმის დირექტორს ვურეკავ, მაგრამ ჩემ ზარებს არ პასუხობს. შემდეგ მესიჯიც კი მივწერე, ავუხსენი ვინ ვარ, მაგრამ არავითარი რეაგირება ამას არ მოჰყოლია. იძულებული გავხდი ინფრასტრუქტურის სამინისტროს დავკავშირებოდი. იქ კი მითხრეს, რომ ფირმა შავ სიაში უნდა შევიყვანო, რადგან “ტერექსს” სხვა რაიონებშიც ექნება ეს პრობლემა,” _ დასძინა გიგინეიშვილმა.
ლანჩხუთის მუნიციპალიტეტის გამგებელი ზაზა ურუშაძე ამბობს, რომ ხელშეკრულებით სამუშაოების შესრულების ვადა მიმდინარე წლის ოთხ დეკემბერს სრულდება.
“მილიონის ტენდერი აქვს ფირმას მოგებული და ამ დროს სამუშაოები დაწყებულიც არაა. სამჯერ მივმართე წერილით, რომ შეესრულებინა სამუშაოები და ამაოდ. თავის დროზე ფირმამ ბანკიდან საგარანტიო წერილი მოგვიტანა 50 ათას ლარზე და მერე დაიწყო პროექტის განხორციელებაც. ახლა კი ისღა დაგვრჩენია, რომ საგარანტიოთი მოთხოვნილი თანხა მივიღოთ და ფირმასთან ხელშეკრულება შევწყვიტოთ, ცხადია, კანონიდან გამომდინარე მოვიქცევით. ამის მერე კი, სავარაუდოდ, სხვა ფირმასთან გავაფორმებთ ხელშეკრულებას. თუმცა, ჯერ ეს ყველაფერი ფინანსთა სამინისტროსთან არის შესათანხმებელი. სავარაუდოდ, ასეც მოხდება, რადგან “ტერექსმა” ხელშეკრულებით გათვალისწინებული ვერცერთი პირობა ვერ შეასრულა,” _ აღნიშნავს ურუშაძე.
“გურია ნიუსი” “ტექსერის” ფირმის ერთ-ერთ ხელმძღვანელთან შეეცადა დაკავშირებას, თუმცა, მან ჩვენს ზარებს არ უპასუხა.
9 დეკემბერს საკრებულოს კომისიის ერთ-ერთ სხდომაზე სწორედ ამ შეუსრულებელი პროექტების შესახებ ისაუბრეს, როგორც აღმოჩნდა კიდევ რამდენიმე სოფელში მსგავსი პრობლემაა, ნიგვზიანში, ჩოჩხათში, აკეთში, აცანასა და ნიგოითში სამუშაოებს შპს “ვორქმშენი”, შპს “სამკუთხედი” და შპს “გალაქტიკა” ასრულებს. სოფლის რწმუნებულები ფიქრობენ, რომ ზემოხსენებულმა შემსრულებლებმა ხელშეკრულებით გათვალისწინებულ ვადებში ვერ მოახერხეს სამუშაოების შესრულება, რის გამოც, მათ საჯარიმო სანქციები დაეკისრათ.
გარდა ამისა, პრობლემებია “არქ დიზაინ მშენთან” დაკავშირებით, ფირმა 10 სოფელში ახორციელებს სასმელი წყლის აღდგენით სამუშაობეს. თუმცა, როგორც ირკვევა, პროცესი შეფერხებით მიმდინარეობს. რწმუნებულებს შემსრულებელთან ხარისხთან დაკავშირებით პრეტენზიები აქვთ.
რაც შეეხება კომპანია “ტერექს XXI”, ვერ შეასრულა თავისი მოვალეობა, რის გამოც დაჯარიმებულია თანხით 11 413 ლარის ოდენობით. ხელშეკრულება ცალმხრივად შეწყვეტილია მიმდინარე წლის 4 დეკემბერს და გაეგზავნა მიმართვა ხელშეკრულების საბანკო გარანტიის (50 000 ლარის ოდენობით) ანაზღაურების შესახებ.
გამგეობის მუნიციპალური შესყიდვების სამსახურის უფროს მაია აფხაზავას თქმით, საქართველოს მთავრობას მიმართეს გამარტივებული ტენდერის ჩატარების თანხმობის თხოვნით. ნებართვის შემთხვევაში გამოცხადდება ხელახალი ტენდერი.
