ამასთანავე, ხშირ შემთხვევაში მერიის მიერ შესყიდული სხვადასხვა სახის მომსახურება მის მიერ დაქირავებული კომპანიების მიერ არასათანადოდ იყო შესრულებული, თანხები წინმსწრებად იყო გადახდილი, რაც უკან არ დაბრუნებულა.
პრობლემები აღმოჩნდა პრემიებზე დახარჯულ თანხებთან დაკავშირებით. პრემირების წესის მეორე მუხლის მესამე პუნქტის მიხედვით “პრემიის კონკრეტული ოდენობა განისაზღვრება მუშაობის შედეგში შეტანილი თითოეული მოსამსახურის პირადი წვლილის, ზეგანაკვეთური მუშაობის, განსაკუთრებით საპასუხისმგებლო ფუნქციური დატვირთვის გათვალისწინებით.” აღნიშნული წესის საფუძველზე 2012 წლის 28 იანვარს თბილისის მერის მიერ გაიცა განკარგულება N159, რითაც მერიის საფინანსო სამსახურს დაევალა უზრუნველეყო თბილისის მერზე, ვიცე-მერზე, მერის მოადგილეებზე, საქალაქო სამსახურების უფროსებსა და მათ მოადგილეებზე, გამგებლებზე და მათ მოადგილეებზე და ა.შ. (სულ 70 საშტატო ერთეულზე) პრემიების გაცემა მერიის ადმინისტრაციის ხარჯებიდან. ამ თანხამ შეადგინა თვეში 125 830 ლარი, წლიურად კი 1 510 082 ლარი.
აღსანიშნავია, რომ აღნიშნული თანამდებობის პირებზე გაცემულმა პრემიამ 2012 წლის დეკემბერში შეადგინა 704 397 ლარი, რაც მათ თანამდებობრივი სარგოს 500-600%-ს შეადგენს. არის შემთხვევა, როდესაც საჯარო მოხელეს ერთ თვეში დანამატის და პრემიის სახით მიღებული აქვს ხელფასის შესაბამისი 677%. მაგალითად, მერიის უსაფრთხოების სამსახურის უფროსი, კახა ლეგაშვილი, რომელსაც 2012 წლის დეკემბერში ნამუშევარი აქვს არასრული დღეები, ხელფასი მიღებული აქვს 1600 ლარი, ხოლო პრემიის ოდენობამ შემადგინა 10 047 ლარი, თანამდებობრივი სარგოს 625%. იგივე მდგომარეობაა მის მოადგილეებთან დაკავშირებითაც. მერის მოადგილეს, შოთა ხიზანიშვილს თანამდებობრივი სარგო – 2470 ლარი, ამავე დროს 6 თვის განმავლობაში მიღებული აქვს დანამატის სახით 18 682 ლარი. უნდა აღინიშნოს, რომ მაისის თვეში ამ პიროვნებაზე დარიცხულია 21 776 ლარი, რომელიც არის დანამატი და პრემია (თანამდებობრივი სარგოს 677%).
უნდა აღინიშნოს ისიც, რომ ქალაქის მერმა 2013 წლის 14 მაისს გამოცემული განკარგულებით თავის თავს დაუნიშნა ყოველთვიურად დანამატი 4 320 ლარი, ანუ თანამდებობრივი სარგოს 135%.
თბილისის მერის განკარგულების მეორე მუხლის მიხედვით დანამატი უნდა გაიცეს დარიცხული ხელფასის პროპორციულად. განკარგულებაში არ არის დაფიქსირებული მისი ძალაში შესვლის პერიოდი. შესაბამისად, ის ძალაში შესულად ითვლება 2013 წლის 17 იანვრიდან და დარიცხვაც უნდა მომხდარიყო 2013 წლის 17 იანვრიდან დარიცხული ხელფასების პროპორციულად. მიუხედავად ამისა, იანვარში დანამატის დარიცხვა განხორციელებულია სრულ თვეზე და შეადგენს 258 099 ლარს, ხოლო ფაქტობრივად დარიცხვა უნდა განხორციელებულიყო 17 იანვრის შემდეგ დარიცხული ხელფასის პროპორციულად, რაც ამ შემთხვევაში შეადგენს 129 050 ლარს. შესაბამისად, დარჩენილი 129 049 ლარი დარიცხულია და გაცემულია საფუძვლის გარეშე უკანონოდ.
მთლიანად 2012 წლის იანვრიდან 2013 წლის ივლისამდე შრომის ანაზღაურებაზე მერიის მიერ დახარჯულია 14 552 873 ლარი, აქედან ხელფასებზე 4 284 610 ლარი, თანამდებობრივ სარგოზე 1 507 132 ლარი, ხოლო პრემიებზე 8 761 131 ლარი.
