მოქალაქეები საკრებულოსგან ითხოვდნენ ვაკის პარკში სასტუმროს მშენებლობის აკრძალვას და ზოგადად, თბილისის ბაღ-პარკებზე მორატორიუმის გამოცხადებას.
აქციის მონაწილეებმა მოგვიანებით საკრებულოს შენობაში გადაინაცვლეს, სადაც მათ საკრებლოს წევრები შეხვდნენ.
“საკრებულოს ისევ “უმწეო, დაჩაგრული” პოზიცია უკავია და ძალაუფლების უქონლობაზე გვიჩუყებენ გულს. ვერაფრით გამოვტეხეთ, თუ არაფრის მაქნისი ორგანოა, მაშინ რატომ არსებობენ, რაში იღებენ ხელფასს და პრემიასაც კი! შეგვპირდნენ, რომ შაბათს მოვლენ ვაკის პარკში მანიფესტაციაზე, როგორც მოქალაქეები. მერიასთან გადაგვამისამართეს. მოკლედ, სსრკ–ა. შაბათს ვაგრძელებთ პროტესტს, ამჯერად საკრებულოს წარმომადგენლებთნ ერთად”, _ აღნიშნა პარტიზანმა მებაღემ ნატა ფერაძემ.
შეახსენებთ, რომ ვაკის პარკის გადარჩენის მოთხოვნით მსგავსი აქცია კვირას 22 დეკემბერს თბილისის მერიასთანაც გაიმართა. აქციის მონაწილეებმა მერიის ეკოლოგიისა და გამწვანების სამსახურის მიერ გაცემული ბრძანება გააპროტესტეს, რომლის თანახმადაც, ახალ წლამდე, ვაკის პარკის სიახლოვეს სასტუმროს მშენებლობის მიზნით, 9 ხე უნდა მოიჭრას. ვრცელდება ინფორმაცია, რომ შუა ვაკის პარკშიც აპირებენ სასტუმროს აშენებას.
ვაკის პარკის გადარჩენის მოთხოვნით მორიგი აქცია პარკის ცენტრალურ შესასვლელთან შაბათს 2 საათზეც იგეგმება.
