გარდაცვალების ზუსტი მიზეზი ამ დრომდე უცნობია, ექსპერტიზის საბოლოო დასკვნა ჯერ არ გამოქვეყნებულა.
თავიდან, მარიამის გარდაცვალების სხვადასხვა მიზეზს ასახლებდნენ, რომლებსაც ოჯახი კატეგორიულად გამორიცხავს:
_ კარგი იქნებოდა, ჟურნალისტებს გადაემოწმებინათ, რას წერდნენ. ჩვენთან არავინ მოსულა, ისე დაწერეს რაღაცეები. არ ვარ კონფლიქტური ადამიანი და ამაზე დავას არ ვაპირებ, თუმცა, ერთ-ერთ ჟურნალისტზე ძალიან გაბრაზებული ვარ. პირისპირ შევხვდები და ადამიანურად ვეტყვი ჩემს სათქმელს, _ ამბობს “გურია ნიუსთან” საუბრისას მარიამის მამა გია ჩავლეიშვილი.
მარიამს მამასთან განსაკუთრებული ურთიერთობა ჰქონდა. ჩანაწერებში, რომელიც ოჯახმა მისი გარდაცვალების შემდეგ ნახა, ეს ბევრგან აქვს აღნიშნული:
_ მე მიყვარს მამა, _ წერდა მარიამი.
როგორც ოჯახის წევრები იხსენებენ, გარდაცვალების დღეს, მარიამი განსაკუთრებით თბილი იყო:
_ ჯერ ბებიასთან და ბაბუასთან დაწვა, მერე მშობლებთან შემოვიდა, პატარა დას ძალიან ბევრი ეფერა, _ იხსენებს გია ჩავლეიშვილი.
მისივე მონათხრობით, მარიამს გარდაცვალების დღეს, ხუთი საათისთვის ესაუბრა:
_ მითხრა, რომ მეგობრებთან მიდიოდა. ძალიან კარგი ბავშვი იყო, ჩემთან განსაკუთრებული ურთიერთობა ჰქონდა. არაფერს მიმალავდა. თავისუფლებას არ ვუზღუდავდი, თუმცა, ვაკონტროლებდი. ვიცოდი, რომ იმ დღეს, მეგობრებიდან წამოსული დედასთან ავიდოდა, რომელიც ოჯახის ნათლიის დაბადების დღეზე იმყოფებოდა. 8 საათამდე არ შევხმიანებივარ. რომ დააგვიანდა, ავფორიაქდი. ბევრი ვეძებეთ. დილით ჩემმა უფროსმა ვაჟმა და მისმა თანაკლასელმა იპოვეს გარდაცვლილი, _ ამბობს გია ჩავლეიშვილი.
მარიამის ოჯახის წევრების თქმით, გოგონა ეკლესიურად ცხოვრობდა, მარხულობდა, ზიარებას იღებდა, გალობდა.
_ თვითმკვლელობის ვერსია გამორიცხულია. მეშინოდა, რომ ძალადობის მსხვერპლი არ ყოფილიყო. ამას ძალიან განვიცდიდი. ექსპერტმა, რომელმაც თავდაპირველი ექსპერტიზა ჩაუტარა, მითხრა, რომ არანაირი ძალადობის კვალი არ აღენიშნებოდა. მალე გახდება ცნობილი საჯარო ექსპერტიზის საბოლოო დასკვნა. ვერ ვხვდები, რა მოხდა. მარიამი გარდაცვალებამდე რამდენიმე დღით ადრე ავად იყო, ჰაერის უკმარისობა ჰქონდა. 4 დღის გასული იყო სკოლაში. არ გამოვრიცხავ, რომ იმ დღეს ცოტა დალია. ამ ასაკში მეც დამილევია, ალბათ, ყევლას დაულევია ცოტა. არ ვიცი, რამ გამოიწვია ჩემი შვილის გონების დაკარგვა, მაგრამ ვიცი, რომ ის ვერსიები, რაც პრესაში გამოითქვა, სიმართლესთან ახლოს არ არის. დაიწერა, თითქოს, პოლიციამ მოაწყო ყველაფერი. ასე როგორ შეიძლება? უამრავი ჟურნალისტი იყო იქ. ხომ შეიძლებოდა, მეორე, მესამე დღეს, როცა შოკიდან ცოტათი მაინც გამოვედით, ჩვენთვის რაიმე ეკითხათ? თქვენ რომ შემითანხმდით შეხვედრაზე, ისე შემთანხმებოდნენ. ვეტყოდი, რაც ვიცოდი და ასეთ რამეებს არ დაწერდნენ, _ ამბობს მარიამის მამა ჩვენთან საუბრისას.
მარიამ ჩავლეიშვილის ოჯახის წევრების ინფორმაციით, გარდაცვალების დღეს, მარიამი მეგობრებს ადრე დაემშვიდობა და დედასთან წავიდა:
_ გუნდაობდნენ ბავშვები. მარიამმა თქვა, რომ ადრე უნდა წასულიყო, რადგან დედა ელოდებოდა. შეიძლება მისი წამოსვლა შეუმჩნეველიც კი დარჩა. იქ ცუდი გზა იყო. ვფიქრობთ, რომ ფეხი დაუცდა, წაიქცა და გონება დაკარგა. მალე პოვნა ვერ მოხერხდა და გაიყინა, _ გვიამბობენ ახლობლები.
მათივე თქმით, 16 წლის გოგონას დიდი გეგმები ჰქონდა _ უცხო ენების შესწავლას და სწავლის საზღვარგარეთ გაგრძელებას აპირებდა, ბევრს კითხულობდა: _ განსაკუთრებით ლექსების კითხვა უყვარდა. შეეძლო, მთელი დღე ეკითხა. საგალობლებსაც უსმენდა. სხვანაირი ბავშვი იყო. ვინც მას იცნობდა, ყველა აღნიშნავს მის სითბოს. შეეძლო ერთი საათის გაცნობილ ადამიანთან საერთო ენა გამოენახა, _ ამბობენ მარიამ ჩავლეიშვილის ახლობლები.
მარიამს 17 წელი აპრილში შეუსრულდებოდა. მანამდე კი, როგორც შინაგან საქმეთა სამინისტროში გვითხრეს, ექსპერტიზის საბოლოო დასკვნა და, შესაბამისად, გამოძიების შედეგები ცნობილი გახდება.
