12 ივლისს, ოზურგეთის მეორე ტურში მერობის მანდატს ან კოალიცია "ქართული ოცნების" წარმომადგენელი ბეგი სიორიძე აიღებს, ან "პატრიოტთა ალიანსის" წევრი შოთა გოგიბერიძე. "გურია ნიუსმა ორივე მათგანთან ვრცელი ინტერვიუ ჩაწერა.
ოპოზიციის კანდიდატი, შოთა გოგიბერიძე, რომელიც "კოალიცია ქართული ოცნების წევრი და "ეროვნული ფორუმის" ლიდერი გახლდათ ოზურგეთში, "პატრიოტთა ალიანსის" რიგებში არჩევნებამდე სულ რამდენიმე დღით ადრე გადავიდა. ამის მიზეზი კი კოალიციაზე განაწყენება გახლდათ. შოთა გოგიბერიძე მიიჩნევს, რომ კოალიციას სწორედ ის უნდა დაესახელებინა მერობის კანდიდატად.
"გურია ნიუსისთვის" მიცემულ ვრცელ ინტერვიუში, რომელსაც ხუთშაბათის საგაზეთო ნომერში შემოგთავაზებთ, შოთა გოგიბერიძე ფორუმიდან წამოსვლის მიზეზებზეც საუბრობს და აცხადებს:
"ეროვნული ფორუმი" და "პატრიოტთა ალიანსი" ძალიან მსგავსი ორგანიზაციები არიან და მათი იდეოლოგიური საფუძვლები ძალიან ჰგავს ერთმანეთს. უბრალოდ, კოალიციის აღვირით დაბმული ეროვნული ფორუმი გახდა აბსოლუტურად ინერტული ყველა იმ პროცესის მიმართ, რომელიც მიმდინარეობდა ქვეყანაში."
შოთა გოგიბერიძის ამ განცხადებასთან დაკავშირებით "გურია ნიუსთან" კომენტარს აკეთებს "ეროვნული ფორუმის" წარმომადგენელი, პარლამენტის წევრი უმრავლესობიდან ანი მიროტაძე:
"შოთა გოგიბერიძეს აქვს იმის უფლება, რომ იფიქროს ისე, როგორც ფიქრობს. რაც შეეხება იმას, ჩვენ რამდენად ვითვალისწინებთ კოალიციის პოზიციებს და რამდენად კარგი გუნდი ვართ, ამაზე გიპასუხებთ, რომ რასაკვირველია, როცა კოალიციაში ხარ, იღებ ვალდებულებას, რომ გაითვალისწინო სხვა სუბიექტების მოსაზრებაც. პარტიას უნდა შეეძლოს ამის გაკეთება, თუ კოალიციურ რეჟიმში თანამშრომლობს. მე მიმაჩნია, რომ ეს არის სწორი პოლიტიკური გადაწყვეტილება.
რაც შეეხება ინერტულობას, ფორუმისგან ეგ ძნელი წარმოსადგენია. ჩვენ ვმუშაობთ პარლამენტში და ყველა პოზიციაზე, სადაც უნდა იმუშაოს ხელისუფლებაში მყოფმა პარტიამ. თუ ვინმეს განსხვავებული მოსაზრებები აქვს კონკრეტულ საკითხთან დაკავშირებით, ეს იმას არ ნიშნავს, რომ ფორუმი ინერტულია.
აწუხებს თუ არა ფორუმს ქვეყნის ბედი და მომავალი, ხმამაღლა ვიტყვი, რომ ქართულ პოლიტიკურ სივრცეში თუ მეგულება ერთი პოლიტიკური ძალა მაინც, რომელიც ქვეყნის მომავალზე ფიქრობს, ეს "ეროვნული ფორუმია".
ამიტომ, მიმაჩნია, რომ შოთა გოგიბერიძეს ეგ განცხადება არც ფაქტებს ეყრდნობა და არც ლოგიკურია. თუ მან საკუთარი თავი ვერ იპოვა კონკრეტულ პარტიაში, არ ვფიქრობ, რომ ეს ტრაგედიაა ან მისთვის ან "ეროვნული ფორუმისთვის".
ჩვენ ბევრი წელი გავატარეთ ერთად, მაგრამ ის ვერ იქნებოდა "ეროვნული ფორუმის" კანდიდატი, რადგან ჩვენ კოალიციაში შემავალი სუბიექტები ვართ და გუნდურად მოთამაშეები. კოალიციას ჰყავს სხვა კანდიდატი და შესაბამისად ფორუმი მხარს უჭერს მას და კოალიციის გადაწყვეტილებას. გუნდურად თამაში ყველაზე კარგი თვისებაა ფორუმის, თუმცა გადაწყვეტილებების მიღებას არავინ გვაიძულებს. უბრალოდ, ზოგჯერ საერთო ინტერესების გათვალისწინებით ვმოქმედებთ."
_ ოზურგეთში საკმაოდ მუსირებს ის აზრი, თითქოს ფორუმი მხარს უჭერს ოპოზიციის კანდიდატს, ამ შემთხვევაში შოთა გოგიბერიძეს.
_ ჩვენ ოზურგეთში საკმაოდ ძლიერი პოლიტიკური ორგანიზაცია გვქონდა, ამ ორგანიზაციიდან წასული წევრები, ანუ ყოფილი ფორუმელები თუ შოთიკო გოგიბერიძეს უჭერენ მხარს, ეს არ ნიშნავს იმას, რომ პარტია "ეროვნული ფორუმი" და მისი ლიდერები უჭერენ მას მხარს. არსებობს პიროვნული ინტერესები და კოალიციური ინტერესები. ამ შემთხვევაში, ჩვენ ვმოქმედებთ კოალიციური ინტერესით და ჩვენ არ ვუჭერთ მხარს შოთიკო გოგიბერიძეს. ის, რომ ეროვნული ფორუმი მხარს ბეგლარ სიორიძეს არ უჭერს, ეს მართალი არ არის. პიროვნულად ვცემ პატივს შოთიკო გოგიბერიძეს, მაგრამ მოხდა ის, რაც მოხდა. ნამდვილად არ ვფიქრობ, რომ გადაწყვეტილება მის სასარგებლოდ რომ არ იქნა მიღებული, ეს დიდი ტრაგედიაა. ეს ჩვეულებრივი ამბავია. თუ გინდა პოლიტიკაში ყოფნა, პიროვნული მოსაზრებების დათმობაც უნდა შეგეძლოს.
