ანაკლიაში, ადგილობრივი მოსახლეობის ერთმა ნაწილმა აქცია გამართა. მათი მთავარი მოთხოვნა, კაზანტიპის ფესტივალის ჩატარება იყო.
"აქ რა არის დანაშაული, იქნება ვინმე მოვიდეს და აგვისხნას. ელექტრონული მუსიკის ფესტივალია და ადგილობრივი მოსახლეობა პურის ფულს იშოვნის. გარყვნილებებზე საუბრობენ და ხალხზე არავინ არ ფიქრობს.
დავინახავთ ყველა რაც იქნება და წინასწარ ნუ შევქმნით პრობლემებს. გვაქვს ბანკის კრედიტები აღებული და ახლა ეს რომ არ ჩატარდეს არ ვიცი რა იქნება. 20 დღის განმავლობაში ასევე ადგილობრივებს საშუალება გავყიდოთ ჩვენს მიერ მოყვანილი სასოფლო პროდუქტი და ეს ჩვენი ოჯახებისთვის დამატებითი სამუშაო იქნება. ყველას ვთხოვთ თავი შეიკავონ ზედმეტი კომენტარებისგან და ხალხის გვერდით დადგნენ. ჩვენ, ხალხს გვინდა ჩატარდეს კაზანტიპი საქართველოში", _ განაცხადეს აქციის მონაწილეებმა "გურია ნიუსთან" საუბრის დროს.
კაზანტიპის პრეზიდენტმა ნიკიტა მარშუნოკმა რამდენიმე დღის წინ გამართულ პრესკონფერენციაზე განაცხადა, რომ ყველას ბოლომდე არ ესმის რა არის კაზანტიპი.
"ვითვალისწინებთ მენტალიტეტს და გახსნილ შესაძლებლობებს. ჩვენ გამოვიყენებთ გამოცდილებას, რომ ეს პროექტი სხვა დონეზე ავიყვანოთ. დიდი ხანია მასშტაბური გავაკეთოთ, მაგრამ უნდა გესმოდეთ, რომ ეს მარტო ჩვენზე არ არის დამოკიდებული", _ თქვა მარშუნოკმა.
კაზანტიპის ფესტივალის ჩატარებასთან დაკავშირებით, დღეს საქართველოს საპატრიარქომ სპეციალური განცხადება გაავრცელა, რომელსაც "გურია ნიუსი" უცვლელად გთავაზობთ.
"გავრცელებული ინფორმაციის თანახმად, გადაწყდა, რომ გარკვეული ცვლილებების შეტანის შემდეგ ე.წ. კაზანტიპი ა.წ. 20-30 აგვისტოს ჩატარდება საქართველოში, მაცხოვრის კვართისა და ღვთისმშობლის სამოსლის მცველ ჩვენს კურთხეულ ქვეყანაში და თანაც მარიამობის მარხვაში.
კაზანტიპის მომწვევის, ტურიზმის დეპარტამენტის ხელმძღვანელის, გიორგი სიგუასა და უკრაინაში ამ ფესტივალის დამაარსებლის, ნიკიტა მარშუნოკის თქმით, ,,წელს ანაკლიაში არ იქნება ნარკოტიკები და თავისუფალი სექსი, მაგრამ იქნება ხმა, განათება, კარგი განწყობა და სიყვარული". ღონისძიებას სახელიც შეუცვალეს (,,რეალობის ანტირეალობა" დაარქვეს) და, ალბათ, კიდევ სხვა საშუალებებითაც შეალამაზებენ, მაგრამ, ანტიდისკრიმინაციული კანონის მსგავსად, არსით იგი მაინც უცვლელი დარჩება და ეს ლოგიკურიცაა (უკრაინაშიც თავდაპირველად ეს საქმიანობა შედარებით რბილი ფორმებით დაიწყეს და შემდეგ მიიღეს ის სახე, რაც დღეს აქვთ).
,,კაზანტიპს" სწორედ აღვირახსნილობის გამო სტუმრობს ამდენი ,,ტურისტი" მსოფლიოს სხვა და სხვა ქვეყნიდან. მათ სწორედ მასობრივი ორგიები და თავაშვებულობა იზიდავთ და არა მუსიკა ან რაიმე კულტურული ღონისძიება, მით უმეტეს ჩვენი ქვეყნის აღორძინების სურვილი.
არაერთხელ აღგვინიშნავს, რომ ცოდვა ყველა დროში არსებობდა, მაგრამ დღეს მისი არა თუ ლეგალიზება, შეიძლება ითქვას, იძულებითი დანერგვა ხდება როგორც სარწმუნოების, ისე ზნეობისა და ეროვნული ფასეულობის დამცირების ფონზე; ამგვარ ვითარებაშიც კი ,,რეალობის ანტირეალობა, – კაზანტიპი" მკვეთრად განსხვავებული მოვლენაა, რადგან გარყვნილების ასეთი მასშტაბური ფორმა არასდროს მოუფიქრებიათ. ასეთი უზნეობა ყოვლად მიუღებელია ნებისმიერი სარწმუნოების ადამიანისათვის.
ჩვენის აზრით, ჩვენს საზოგადოებას ხმა არ მიუცია საქართველოს სახელმწიფოს ამ მიმართულებით განვითარებისათვის. საქართველო უძველესი კულტურის ქვეყანაა და იგი არ შეიძლება გახდეს აღვირახსნილობის ხელშემწყობი.
რა თქმა უნდა, გვესმის ისიც, რომ მძიმე ეკონომიურ მდგომარეობაში მყოფ ადგილობრივ მოსახლეობას, ლამის, სიცოცხლის ფასად უღირს ის შემოსავალი, რაც მათ ბინების ან
ტერიტორიის გაქირავების ფასად შეიძლება აიღონ, გვესმის, რომ ახალგაზრდებს, შეიძლება მოუნდეთ რეკლამირებულ სანახაობებზე მისვლა, ხელისუფალთ, ალბათ, ინფრასტრუქტურის განვითარებაც სურს… მაგრამ ყველამ უნდა იცოდეს, რომ ამ ფესტივალში ნებისმიერი სახით მონაწილეობა და მისი მხარდაჭერა უმძიმესი შედეგების მომტანი იქნება ქვეყნისთვისაც და ცალკეული პიროვნებებისთვისაც.
ეკლესია, სულიერ შვილებზე ზრუნვიდან გამომდინარე, ვალდებულია, ამის შესახებ გააფრთხილოს საქართველოს მოსახლეობა", _ ნათქვამია განცხადებაში.
