დღეს, საზღვარგარეთ საქართველოს დიპლომატიური წარმომადგენლობების ხელმძღვანელთა შეხვედრა – ამბასადორიალზე, საქართველოს სახელმწიფო მინისტრის პირველი მოადგილე შერიგებისა და სამოქალაქო თანასწორობის საკითხებში, ქეთევან ციხელაშვილი ქართველ ელჩებს შეხვდა.
მის თქმით, დღევანდელი შეხვედრა ჩვენი ქვეყნის უსაფრთხოებას, მის მშვიდობიან მომავალსა და კონფლიქტის მოწესრიგებას უკავშირდებოდა. ასევე დეტალურად განიხილეს ჟენევის საერთაშორისო დისკუსიების ფორმატი.
მინისტრის მოადგილის თქმით, აფხაზეთისა და ცხინვალის ე.წ. ადმინისტრაციების გადაწყვეტილებას პასპორტების დარიგებასთან დაკავშირებით, რომლითაც ე. წ. დეფაქტო ხელისუფლება მანიპულირებს, მსხვერპლი ეთნიკურად ქართველი მოსახლეობა ეწირება.
"დიდი ხანია აფაზეთისა და ცხინვალის რეგიონში საბუთებით მანიპულირება ხდება. ამის მსხვერპლი კი ყოველთვის ეთნიკურად ქართველი მოსახლეობა ხდება.
ჩვენ საქმის კურსში ვართ, ეს როგორც აფხაზეთში, გალის რაიონში, ისე ცხინვალში, ახალგორის რაიონში ხდება. დღეს არსებული ვითარებით, ის ძველი ფორმა №9 რომლის ჩანაცვლება ე.წ. საბუთებით ხდება, რომელიც შესულია ახალგორის ე.წ. ადმინისტრაციაში. დაახლოებით 5 000-მდე განაცხადია შესული. აქედან მხოლოდ ნახევარია ქართველების დაკმაყოფილებული.
ანუ, ჩვენი ინფორმაციით, 2 700 განცხადებაა დაკმაყოფილებულ. პროცესი საკმაოდ გაჭიანურებულია, თუმცა არ გაჩერებულა. ზოგიერთ შემთხვევაში იმ ადამიანებმა, შესვლაზე აბსოლუტურად არაარგუმენტირებულად უარი მიიღეს. ხდება ოჯახების გაყოფა. მაგალითად, ოჯახის ერთ წევრს აქვს შესვლის უფლება, მეორეს არა.
ჩვენ ამის თაობაზე, როგორც ჟენევის, ასევე სხვა ფორმატის შეხვედრებზე ძალიან აქტიურად ვმუშაობთ. ამ საკითხში კონკრეტულად „ეუთო“ არის ჩართული.
ყურადღებას არ მოვადუნებთ, ვფიქრობთ, ჩვენს ძალისხმევას აქვს გარკვეული შედეგი იმისთვის, რომ უარესი თავიდან ავიცილოთ. კიდევ გავაგრძელებთ ამაზე მუშაობას ვიდრე რეალურად ამ ადამიანების განუყოფელი უფლება, საკუთარ სახლებთან ჰქონდეთ წვდომა, არ დაკმაყოფილდება.
რა თქმა უნდა, ჩვენი ამოცანები გაცილებით უფრო ფართოა და ის არა მხოლოდ ახალგორის მოსახლეობის საკუთარ სახლებში დაბრუნებას, არამედ იძულებთ გადაადგილებულ პირების საკუთარ სახლებში დაბრუნებას ეხება", _ განაცხადა ციხელაშვილმა.
