“სენაკი აუღებელი ქალაქია, აქ ისევ “ნაციონალური მოძრაობა“ დომინირებს”

"გურია ნიუსს" სენაკში მცხოვრები, საქართველოს მწერალთა კავშირის და ჟურნალისტთა ფედერაციის წევრი, ლანდა (მზია) მასხულია დაუკავშირდა და სენაკში შექმნილ მდგომარეობასა და საკადრო პოლიტიკაზე გაამახვილა ყურადღება.

გუშინ, ლანდა მასხულიამ პარლამენტის თავმჯდომარის, დავით უსუფაშვილის სახელზე მიმართვა შეიტანა, რომელსაც  როგორც თავად ამბობს თან ახლავს საქართველოს მწერალთა კავშირის თავმჯდომარის რეკომენდაცია.

ლანდა მასხულიამ წერილი გადმოგვცა და გვთხოვა ფართო მკითხველამდე მიგვეტანა.

"მე ყველა პარტიას ოპოზიციაში ვედექი, ერთადერთი პარტია, რომლის მიმართაც სიმპატიები გამიჩნდა, "ქართული ოცნებაა". უნდა ითქვას, რომ სენაკის მაჟორიტარი დეპუტატი გურამ მისაბიშვილი და გამგებელი ერთ წელზე მეტია მპირდებიან კულტურის სამსახურის უფროსად დანიშვნას ისევ და ისევ ჩემი შრომისა და აქტიურობის გამო, თუმცა სიტუაცია ერთ დღეში შეიცვალა და აღნიშნული სამსახურის უფროსად მოჰყავთ პირწავარდნილი "ნაციონალი", არასპეციალისტი ვასილ ბესელია, რომელიც როგორც ამბობენ არის ეკა ბესელიას ნათესავი, თუმცა მე პირადად ვესაუბრე ეკას და უარყო ვასილ ბესელიასთან ნათესაური კავშირი.

გამოდის, სენაკში სარგებლობენ რა ეკას სახელით, ჩრდილს აყენებენ მის რეპუტაციას და "ქართულ ოცნებასაც". სენაკში ყველამ იცის, რომ რაიონში საკმაოდ მყარად დგას მისაბიშვილისა და ეკას მამის მაფიოზური კავშირი, სწორედ ისინი ეხმარებიან "ნაციონალ" ვასილ ბესელიას. სენაკის გამგებელს, გოჩა დგებუაძე პირდაპირ აძალებენ ამ არაპროფესიონალი კადრის დანიშვნას. ვიცი, რომ ბოკუჩავა საშინელი ზეწოლის ქვეშაა, მაგრამ შეგნებულად არ აწერს დანიშვნის ბრძანებას ხელს.  მე ეს ყველაფერი უკვე მოვახსენე პარლამენტის თავმჯდომარეს, დავით უსუფაშვილს, რომელიც ერთ კვირაში კომისიას გამოყოფს და ჩემს წერილში მოყვანილი ყველა ფაქტის შესწავლა მოხდება.

სენაკში ისევ "ნაციონალური მოძრაობა" დომინირებს. ისინი აღარ უნდა წყვეტდნენ რაიონის საქმეებს. მე უკვე მივმართე სამეგრელო ზემო სვანეთის გუბერნატორს, ლევან შონიას და საქმის კურსში ჩააყენე.

სენაკი აუღებელი ქალაქის, ერთმანეთს უპირისპირდებიან გამგებელი და საკრებულოს თავმჯდომარე, ვერ დალაგდა საჯარო სამსახურებში საკადრო პოლიტიკა, ხალხის მოთმინების ფიალა კი ავსებულია და ეს კარგს არაფერს მოიტანს. არ გავჩერდები, ბოლომდე ვიბრძოლებ და ფარდას ავხდი იმ ნეპოტიზმითა და შავ-ბნელი საქმეებით გაჯერებულ საკადრო დანიშვნებს თუ მანიპულაციებს, რაც დღეს სენაკში ხდება", _ ნათქვამია წერილში.

ლანდა მასხულია აცხადებს, რომ ხვალ ბრიფინგი აქვს დანიშნული და კიდევ ერთხელ გააჟღერებს სენაკში შექმნილ სავალალო მდგომარეობას.