ლანჩხუთის მუნიციპალიტეტის საკრებულოს ბიუროს სხდომაზე, რომელიც 7 აგვისტოს ჩატარდა, 21 საკითხი იყო გამოტანილი. საკრებულოს თავმჯდომარე გოგი ხელაძემ, მისმა მოადგილე გელა კილაძემ, ლანჩხუთის მუნიციპალიტეტის გამგებელმა ზაზა ურუშაძემ და დეპუტატებმა 21 საკითხი 30 წუთში განიხილეს.
ბიუროს სხდომაზე ცნობილი გახდა, რომ საკრებულოს აპარატის 12 საშტატო ერთეულიდან სამსახურს 9 თანამშრომელი შეინარჩუნებს.
ასევე, ცნობილი გახდა, რომ საკრებულოში დამტკიცების შემთხვევაში, გამგებელს ორი მოადგილე, ერთი მრჩეველი და გამგებლის 16 წარმომადგენელი ეყოლება. ამ ეტაპზე არ არის ცნობილი, თუ ვინ ჩაიბარებს ამ თანამდებობებს. ერთ-ერთ მოადგილედ ვახტანგ ზენაიშვილის კანდიდატურა განიხილება, რომელიც ბიუროს სხდომას ესწრებოდა.
დეპუტატმა ალექსანდრე სარიშვილმა წამოაყენა წინადადება, რომ მზრუნველობას მოკლებულთა სასადილოს 60 ბენეფიციარის რიცხვი 100-მდე გაიზარდოს.
_ სამწუხაროდ, ეს არის რეალობა და თუ ამის საშუალება იქნება, ეს საკითხი აუცილებლად გავიაროთ და ადამიანებს დავეხმაროთ, _ თქვა სარიშვილმა.
ზაზა ურუშაძის თქმით, ამ საკითხის გადაჭრა ასე ადვილი არ არის, რადგან 2014 წლის ბიუჯეტი უკვე დამტკიცებულია. გამგებლის მოადგილის მოვალეობის შემსრულებელმა, ვახტანგ ზენაიშვილმა თქვა, რომ უპოვართა საკითხი სერიოზული ბიზნესია. იგი "გურია ნიუსთან" საუბრისას ამბობს, რომ განცხადებაში იგულისხმა ფაქტი, რომ მზუნველობა მოკლებული ბენეფიციარები ქუჩაში 50-70 ლარს შოულობენ.
_ არსებობს გარკვეული კატეგორია ადამიანებისა, რომლებსაც პროფესიასავით აქვთ ქუჩაში გამოსვლა და საკმაოდ დიდ ფულსაც აგროვებენ. ეს თანხა ხან 50-70 ლარს შეადგენს. მე ჩემს განცხადებაში ვიგულისხმე თბილისი. სამწუხაროდ, ჩვენს ქვეყანაში არსებობენ სოციალურად შეჭირვებული ადამიანები და მათ ნამდვილად სჭირდებათ დახმარება, _ გვითხრა ვახტანგ ზენაიშვილმა.
დეპუტატი რომან ბიწაძე კი უპოვართა სასადილოს პროგრამის უკმაყოფილოა. მისი თქმით, მზრუნველობა მოკლებულთათვის სასადილო საერთოდ უნდა გაუქმდეს:
_ ბიუროს სხდომაზე მოითხოვეს ბენეფიციარების რაოდენობის გაზრდა. ბუნებრივია, ჩვენი მოსახლეობის სოციალური ყოფა ძალიან მძიმეა, მაგრამ ასე არ შეიძლება. სასადილოში აყვანის კრიტერიუმი არის დასახვეწი და გადასახედი. ეს არის ჩემი აზრი და კარგი იქნებოდა, კონკრეტული პირები კი არ დადიოდნენ სასადილოში, ის თანხა, რომელიც იხარჯება მთლიანად ამ ყველაფერში, მათ მიეცეს. იქ გამოთავისუფლდება ხელფასები, ელექტროენერგიის, გაზის და სხვა დანახარჯების თანხა. მოკლედ, დასახვეწია ეს მექანიზმი. წლების განმავლობაში მიშვებული იყო ეს საკითხი, _ თქვა ბიწაძემ.
ბიუროს სხდომაზე ასევე გაჟღერდა ინფორმაცია, რომ ის, ვისაც ბუნებრივი აირი აქვს სახლში შეყვანილი, შეშის ვაუჩერს ვერ მიიღებს.
_ ვადასტურებ, რომ ეს ინფორმაცია ჩვენც გავიგეთ და ახლა მიმდინარეობს ამ ამბის დაზუსტება, _ გვითხრა საკრებულოს თავმჯდომარე გოგი ხელაძემ.
