"პოლიტიკური ვენდეტა არჩევნებით დასრულდა"; "შეუძლებელია ომის დაწყება საკუთარ ტერიტორიაზე“; "ჩვენ არ ვაპირებთ ტერიტორიული პრობლემების მოგვარებას რაიმე სახის სამხედრო მოქმედებების გზით, იქნება ეს ცხინვალის რეგიონსა თუ აფხაზეთში“; მზად ვარ წავიდე მოსკოვშიც და სხვა ნებისმიერ ქალაქში , სადაც აფხაზეთისა და ცხინვალის რეგიონის საკითხები განიხილება და არა – მაგალითად, სტალინის ბავშვობა“; "რაც ახლა უკრაინაში ხდება, ჩვენ ვხედავთ, როგორც 2008 წელს საქართველოში განვითარებული მოვლენების გაგრძელებას“; "ჩვენი მშვიდობიანი, წყნარი, სტაბილური ეკონომიკური გარემო, რაც თავისთავად ნიშნავს მშვიდობიან, მშვიდ, სტაბილურ ეკონომიკურ კავკასიას, არის დიდი შესაძლებლობა რუსული ბიზნესის სტაბილურობისთვის. გამოდის, რომ ჩვენ რუსეთის პრობლემებზეც ვზრუნავთ”, – ეს იმ განცხადებების მცირე ნაწილია, რომელიც საქართველოს პრეზიდენტმა გიორგი მარგველაშვილმა ბოლო ორი დღის განმავლობაში BBC-ს გადაცემა Hard talk-ის ეთერში და ლონდონის საერთაშორისო საქმეთა ინსტიტუტში სიტყვით გამოსვლისას გააკეთა.
ექსპერტთა ნაწილი მიიჩნევს, რომ გიორგი მარგველაშვილის რიტორიკა შეცვლილია და ის დღითიდღე უმჯობესდება, თუმცა რას შეცვლის პრეზიდენტის განცხადებები საერთაშორისო ასპარეზზე, ძნელი სათქმელია.
"საზოგადოებრივი კომუნიკაციების მართვის“ სპეციალისტი არჩილ გამზარდია "გურია ნიუსთან“ საუბრისას აცხადებს, რომ "გიორგი მარგველაშვილის გააქტიურება მის სამოღვაწეო მიზნებს უნდა უკავშირდებოდეს“.
"ადრევე, რადგანაც გადაწყვიტა პრეზიდენტობაზე კენჭი ეყარა, ე.ი. მას კიდეც ჰქონდა გარკვეული ხედვა, როგორ აეგო სამომავლო აქტივობები. ის მოცემული მომენტისათვის საკმაოდ სახარბიელო მდგომარეობაშია, მას ართმევენ უფლებებს, ესეც მარგველაშვილის წყალზე ასხამს წყალს, ნაკლები უფლება – ნაკლებ პასუხისმგებლობადაც აღიქმება; პრეზიდენტი დიდი ხნის განმავლობაში ჩუმად იყო, ამით მან მოახერხა საზოგადოებას პრეზიდენტის სახენაცვალი სტატუსი აღექვა, ხალხი გადაერთო პრემიერზე, პრეზიდენტი თავისებურად გათავისუფლდა ვალდებულებებისაგან და ეს უკანასკნელიც კიდევ უფრო ამორფული გახდა საზოგადოების ცნობიერებაში.
ამანაც მარგველაშვილის წისქვილზე დაასხა წყალი, ამას უკვე დაემატა მისი გარკვეული თვისებები, რომელსაც უკვე საკმაოდ ეფექტურად წარმოადგენს, ეს არის მისი მოზომილი საუბარი, კარგად გააზრებული ხედვა პოზიციების გამოხატვისა და თვითწარმოდენისა და ა.შ. საბოლოო ჯამში საზოგადოებამ პრეზიდენტის შეფასება მისი პოზიციებითა და საუბრებით დაიწყო, რაც მარგველაშვილს, ძირითადად კარგად გამოსდის“, _ ამბობს გამზარდია.
მისივე თქმით, "პრეზიდენტი ახლა მშვენიერი "სთართ აფის“ პოზიციაშია და ეფექტურ პერსპექტივებს იქმნის როგორც შიდა აუდიტორიაზე – საქართველოს მოსახლეობაში, ისე გარე აუდიტორიაზეც – საერთაშორისო საზოგადოებაში“.
ექსპერტი სოსო ცინცაძე "გურია ნიუსთან“ საუბრისას აცხადებს, რომ "მარგველაშვილის აქტიურობა, რასაკვირველია, უკავშირდება მის პირად სურვილს, რაც შეიძლება მეტი საპატიო ადგილი დაიმკვიდროს პოლიტიკურ ელიტაში“.
"პრეზიდენტი პირველად მოხვდა ასეთ საზოგადოებაში თავისი პოლიტიკური კარიერის მანძილზე და მისი მცდელობა ბუნებრივია. რაც შეეხება თვითონ განცხადებების ანატომიას, მარგველაშვილი ჭკვიანი ადამიანია, ერუდიტი, ინტელექტუალი, ამიტომ მას შესწევს ძალა და უნარი ყურადღება თავისი განცხადებებით მიიქციოს. მაგრამ განცხადებები მთავარი არ არის მთავარი, აქ მთავარი შედეგია. დღეს ისეთი რეალობაა უელსში და მთელ მსოფლიოში, რომ პატარა ქვეყნის წარმომადგენელმა რაც არ უნდა დროული, მომწიფებული, კრეატიული განცხადებები ან ინიცატივები წამოაყენოს, თუ ამ განცხადებების და ინიციატივების უკან ძალა არ დგას, ეს სამწუხაროდ, ლირიკად იქცევა“, _ აცხადებს ცინცაძე.
ექსპერტის აზრით, იმის თქმა, რომ მარგველაშვილის განცხადებები რამეს შეცვლის და სიახლეს შეიტანს, გამორიცხულია.
"რადგან იმისთთვის, რომ საერთაშორისო ცხოვრებაში რაიმე შეიცვალოს, საჭიროა ამის ინიცატივა ძალიან ძლიერი პოლიტიკური მოთამაშისგან მოდიოდეს და არა პატარა, სუსტი, ღარიბი, ტერიტორიადაკარგული სახელმწიფოს თუნდაც პრეზიდენტისგან“, _ აცხადებს ცინცაძე და დასძენს, რომ ნატო-სთან მიმართებაში საქართველოს საკითხი დიდი ხნის გადაწყვეტილია და მარგველაშვილის განცხადებები ვერაფერს შეცვლის.
