ჯანმრთელობის დაცვისა და სოციალურ საკითხთა კომიტეტის თავმჯდომარემ, დიმიტრი ხუნდაძემ და კომიტეტის თავმჯდომარის პირველმა მოადგილემ, მირიან წიკლაურმა ტუნისის რესპუბლიკის დელეგაციას უმასპინძლეს. ვიზიტის ფარგლებში დაგეგმილ შეხვედრაზე მხარეებმა ბავშვთა უფლებების დაცვის გაუმჯობესების მიზნით მიმდინარე და სამომავლოდ დაგეგმილ ღონისძიებებსა და საკანონმდებლო ინიციატივებზე ისაუბრეს.
ჯანმრთელობის დაცვისა და სოციალურ საკითხთა კომიტეტის თავმჯდომარის განცხადებით, საქართველოს მთავრობამ ბავშვთა უფლებების დაცვა და ბავშვზე ზრუნვა სახელმწიფოს ერთ-ერთ პრიორიტეტად აღიარა. დიმიტრი ხუნდაძემ დელეგაციის წევრებს ქვეყანაში ბავშვთა უფლებათა დაცვის და ბავშვზე ზრუნვის სისტემის რეფორმის შესახებ დეტალური ინფორმაცია გააცნო და რეფორმის ფარგლებში, სააღმზრდელო დაწესებულებაში მყოფი ბავშვების დეინსტიტუციონალიზაციის და მათი ოჯახურ გარემოში აღზრდის უზრუნველყოფისკენ მიმართული პროცესის შესახებ ისაუბრა.
_ არაერთი საერთაშორისო კვლევა ადასტურებს, რომ ინსტიტუციური მზრუნველობა ვერ უზრუნველყოფს ბავშვის განვითარების მოთხოვნებს,რთულდება სოციალური ინტეგრაცია. ასეთი ტიპის დიდ ინსტიტუციებში აღზრდილ ბავშვებს აქვთ გონებრივი და ფსიქიკური განვითარების პრობლემები. ისინი კარგავენ სოციალურ კონტაქტებს და შესაბამისად, მათი განვითარების შანსი მინიმალურია,- განმარტა დიმიტრი ხუნდაძემ.
მისივე ინფორმაციით, ამ მიმართულებით რეფორმის განხორციელება 2005 წლიდან დაიწყო, რომელიც დიდი ზომის ინსტიტუციების მცირე ზომის საოჯახო ტიპის სახლებით ჩანაცვლებას ისახავდა მიზნად.
_ დღეს უკვე არის 47 მცირე საოჯახო ტიპის სახლები, სადაც ბავშვები ოჯახურ გარემოში იზრდებიან. იმისთვის, რომ ბოლომდე მოვიდეთ შესაბამისობაში გაეროს ბავშვთა კონვენციის მე-8 და მე-20 მუხლებთან, საჭიროა, ეს პროცესი ბოლომდე მივიყვანოთ, რომ ყველა ბავშვი იყოს ოჯახურ გარემოში, თუ მას არ აქვს ბიოლოგიურ ოჯახში ცხოვრების საშუალება,- განაცხადა დიმიტრი ხუნდაძემ.
მისივე განმარტებით, დეინსტიტუციონალიზაციის პროცესის დასრულება ხარისხიან მონიტორინგს მოითხოვს და საქართველოს მთავრობას კონკრეტული სამოქმედო გეგმა უკვე შემუშავებული აქვს. _ ასეთი პრიორიტეტული მიმართულებებია: რეინტეგრაცია, ბავშვიანი ოჯახების მხარდაჭერა , ალტერნატიული სერვისების განვითარება, რომელიც გულისხმობს მინდობით აღზრდის სხვადასხვა ფორმების განვითარებას, ასევე შშმ ბავშვების მცირე საოჯახო ტიპის მომსახურების კონცეფციის შემუშავება, სოციალური მუშაკისა და ფსიქოლოგის ინსტიტუტის გაძლიერება. ერთ-ერთი მნიშვნელოვანი პრიორიტეტია ზედამხედველობის სისტემების სრულყოფილი და სწორი ჩამოყალიბება,- აღნიშნა დიმიტრი ხუნდაძემ.
ჯანმრთელობის დაცვისა და სოციალურ საკითხთა კომიტეტის თავმჯდომარემ დელეგაციის წევრებს ალტერნატიული მზრუნველობის სხვა ფორმების შესახებაც მიაწოდა დეტალური ინფორმაცია. როგორც დიმიტრი ხუნდაძემ შეხვედრაზე აღნიშნა, ამჟამად მიმდინარეობს მუშაობა „შვილად აყვანისა და მინდობით აღზრდის შესახებ“ კანონზე, შექმნილია შესაბამისი სამუშაო ჯგუფიც.
ჯანმრთელობის დაცვისა და სოციალურ საკითხთა კომიტეტის თავმჯდომარის თქმით, გასაშვილებელ ბავშვთა და შვილად აყვანის მსურველ ოჯახთა რაოდენობას შორის გარკვეული დისბალანსი არსებობს. მისივე განცხადებით, სასურველია, დაიხვეწოს რეგისტრაციის პროცედურა, გათვალისწინებულ იქნას შვილად აყვანის მსურველი ოჯახის სოციალური მდგომარეობა და დადგინდეს ასაკობრივი ზღვარი მშვილებელსა და შვილად ასაყვან ბავშვს შორის.
_ წინასწარი მონახაზით, მაქსიმალური ზღვარი 50 წელი იქნება, სავარაუდოდ, თუმცა უნდა გავითვალისწინოთ, რომ მოზრდილი ბავშვების შვილად აყვანის მსურველთა რაოდენობა ნაკლებია, ამიტომ, 10 წლის ზემოთ ბავშვის გაშვილების დროს, შესაძლოა, ასაკობრივი შეზღუდვის ჭერი უფრო მაღალი იყოს,- განმარტა ჯანმრთელობის დაცვისა და სოციალურ საკითხთა კომიტეტის თავმჯდომარემ.
მისივე განცხადებით, არანაკლებ საყურადღებოა შეზღუდული შესაძლებლობის მქონე ბავშვთა გაშვილების საკითხი.
ჯანმრთელობის დაცვისა და სოციალურ საკითხთა კომიტეტის თავმჯდომარის პირველი მოადგილის, მირიან წიკლაურის ინფორმაციით, უახლოეს მომავალში შეიქმნება მოსამზადებელი კურსები მიმღები ოჯახებისთვის, რომელიც ბავშვზე ზრუნვისთვის აუცილებელი უნარ-ჩვევების ჩამოყალიბებას ისახავს მიზნად.
დიმიტრი ხუნდაძემ და მირიან წიკლაურმა დელეგაციის წევრთა შეკითხვებსაც უპასუხეს. მხარეები სამომავლო თანამშრომლობაზე შეთანხმდნენ.
ტუნისის რესპუბლიკის დელეგაციის ვიზიტი „იუნისეფის“(UNICEF) საქართველოს ოფისის მიერ იყო ორგანიზებული. დელეგაციის შემადგენლობაში ტუნისის რესპუბლიკის ჯანდაცვის, განათლების, იუსტიციის სამინისტროების, სასამართლო სისტემის, არასამთავრობო ორგანიზაციებისა და „იუნისეფის“(UNICEF) ტუნისის ოფისის წარმომადგენლები შედიან.
