საქართველოს უზენაესი სასამართლოს თავმჯდომარე კონსტანტინე კუბლაშვილი პრემიერ-მინისტრის ინიციატივას, რომლის მიხედვითაც საქართველოს მთავარ პროკურატურაში ქონებების დაბრუნებისთვის სპეციალური სამმართველო ან დეპარტამენტი შეიქმნება, დადებითად აფასებს, თუმცა რამდენიმე დღის წინ, ის ამ ინიციატივას უარყოფითად აფასებდა და იმედს გამოთქვამდა, რომ მსგავსი კომისია არ შეიქმნებოდა.
"ზოგადად ასეთი კომისიების შექმნა არის აბსოლუტურად საწინააღმდეგო ყველანაირი კონსტიტუციური პრინციპისა, რაც კი ეხება როგორც სასამართლოს, ისე პროკურატურის ინტერესებს, ამიტომ, ასეთი კომისიების შექმნა პირდაპირ ევროპული სტანდარტების და ჩვენი კონსტიტუციური პრინციპების დარღვევა. იმედი მაქვს, რომ ეს ასე არ მოხდება", _ აცხადებდა კუბლაშვილი პრემიერის ინიციატივაზე.
დღეს კი, "გურია ნიუსის“ კითხვის საპასუხოდ კონსტანტინე კუბლაშვილმა პრესკონფერენციაზე აღნიშნა, რომ ასეთი დეპარტამენტის შექმნა კონსტიტუციურ ჩარჩოებში ჯდება.
"თუ თავად პროკურატურაში შეიქმნება ცალკე დეპარტამენტი, ვფიქრობ, ეს არანაირი საფრთხის შემცველი არ არის, რადგან პრინციპულად არაფერი იცვლება. დღესაც არსებობს საქართველოს კანონმდებლობაში დებულებები, რომლის მიხედვითაც შესაძლებელია, რომ საბოლოოდ დამთავრებული საქმე გადაისინჯოს. თუ პროკურატურა ჩათვლის, რომ რაღაც პრობლემაა ამა თუ იმ საქმეში, მას შეუძლია ეს გზა გამოიყენოს. თუმცა, ეს უნდა მოხდეს პროკურატურის შუამდგომლობით, ისევ და ისევ სასამართლოს მიერ. ეს კანონით დადგენილი გზა არის და თუ ამ მიმართულებით დაიწყება საქმეების განხილვა, პროცესი ყველა იმ ჩარჩოში ჩაჯდება რაც კონსტიტუციით და ორგანული კანონით გვაქვს. შესაბამისად, აქ მე პრობლემას ვერ ვხედავ.
მაგრამ როდესაც საუბარი იყო კომისიის შექმნაზე, სწორედ ეს იყო ძალიან დიდი, რადიკალური, მიუღებელი ანტიკონსტიტუციური პროექტი, რაც კარგია რომ შეჩერდა და ამაზე არავინ ლაპარაკობს“, _ განაცხადა კუბლაშვილმა.
შეგახსენებთ, რომ 26 დეკემბერს, 2014 წლის შემაჯამებელ პრესკონფერენციაზე პრემიერ-მინისტრმა ირაკლი ღარიბაშვილმა განაცხადა, რომ თებერვლამდე საზოგადოებას წარუდგენენ კონკრეტულ გეგმას იმის თაობაზე თუ როგორ მოხდება სამართლიანობის აღდგენის პროცესის დასრულება:
"მინდა ძალიან მნიშვნელოვანი განცხადება გავაკეთო. თქვენ იცით, რომ ჩვენი ერთ-ერთი მთავარი დანაპირები არჩევნებში გამარჯვების შემდეგ იყო ის, რომ სამართლიანობის დამკვიდრებას და აღდგენას დავიწყებდით და ჩვენ დავიწყეთ ეს პროცესი ორი წლის წინ. ბოლო ორი წლის მანძილზე ჩვენ შევისწავლეთ ყველა განაცხადი, რომელიც ოფიციალურად შევიდა პროკურატურაში. მინდა ახლა საზოგადოებას ვაცნობო, რომ დაასრულა შესწავლა ყველა იმ განაცხადების, რაც დარეგისტრირდა ორი წლის მანძილზე პროკურატურაში.
საქმე ეხება უკანონოდ ჩამორთმეულ ქონებას, ბიზნესებს, სახლებს და ასევე ათასობით რეპრესირებულ ადამიანებს, რომლებიც უკანონოდ იხდიდნენ სასჯელს ციხეებში. ადამიანებს, რომლებიც იყვნენ მსხვერპლი წამებისა და არაადამიანური მოპყრობის, გაუპატიურების.
მაქსიმუმ თებერვლამდე ჩვენ საზოგადოებას წარვუდგენთ კონკრეტულ გეგმას იმის თაობაზე თუ როგორ მოხდება სამართლიანობის აღდგენის პროცესის დასრულება _ დაწყებაც და დასრულებაც. ეს იქნება ხანგრძლივი პროცესი. შეიქმნება პროკურატურაში დეპარტამენტი, სამმართველო, ქონებების დაბრუნებასთან დაკავშირებით და მოხდება ამის კომპენსირება, _ განაცხადა პრემიერ-მინისტრმა.
